Amazon-Flipkart નહીં આ ઈ-કોમર્સ વેબસાઈટ પર મળી રહ્યું છે ભારે ડિસ્કાઉંટ

ઋતંકર મુખર્જી, કલકત્તા: ભારતના ઈ-કોમર્સ સેક્ટર પર રાજ કરતાં ફિલ્પકાર્ટ અને અમેઝોન ઈંડિયાને હવે મોટી ટક્કર મળી શકે છે. ટાટા ગ્રુપની ઈ-કોમર્સ વેબસાઈટ ટાટા ક્લિકે પોતાની સ્ટ્રેટજીમાં બદલાવ કર્યો છે. ટાટા ક્લિક સ્માર્ટફોન, ટેલિવિઝન જેવા વાઈટ ગુડ્સ પર મોટું ડિસ્કાઉંટ આપવાનું શરૂ કર્યું છે. ટાટા ક્લિકનો ઉદ્દેશ પહેલાથી જ સ્થાપિત ફ્લિપકાર્ટ અને અમેઝોનને હરાવવાનો છે.
અત્યાર સુધી ટાટા ક્લિક ઓછા ડિસ્કાઉંટ સાથે જ મોટાભાગની પ્રોડક્ટ્સ વેચતી હતી, એટલે વસ્તુના ભાવ રિટેલ સ્ટોર્સ જેટલા રાખવાના મોડલ પર ચાલતું હતું. ઈ-કોમર્સ માર્કેટના કુલ વેચાણમાં આ ત્રણ કેટગરીનો 50-55 ટકા ભાગ છે. ટાટા ક્લિક અહીં માર્કેટ શેર વધારવા માગે છે. જેનાથી તેને દિવાળી વખતે ફેસ્ટીવ સિઝન દરમિયાન પણ સેલ્સ વધારવાનો મોકો મળશે.
ટાટા ક્લિકે પોતાના ભાવ ફ્લિપકાર્ટ અને અમેઝોન પર મળતી વસ્તુઓની કિંમતની બરાબર રાખ્યા છે. તો કેટલીક લોકપ્રિય બ્રાંડ અને મોડલની કિંમતમાં ઘટાડો કર્યો છે. એક હોમ અપ્લાયંસ કંપનીના સીનિયર એક્ઝક્યુટિવે જણાવ્યું કે, “ટાટા ક્લિક એ સ્થાન લેવાની કોશિશ કરી રહ્યું છે, જે સ્નેપડીલ એ ખાલી કર્યું છે. અમારી કંપની તરફથી સેલરને જે કિંમતે AC વેચવામાં આવ્યા તેનાથી પણ ઓછી કિંમતે ટાટા ક્લિક તેને વેચી રહ્યું છે.”
એક કન્ઝ્યૂમર કંપનીના સીનિયર એક્ઝક્યુટિવે જણાવ્યું કે, “આવતા વર્ષે રિલાયંસ ઈ-કોમર્સ માર્કેટમાં પદાર્પણ કરવા જઈ રહ્યું છે, તે પહેલા ટાટા ક્લિક ટોપની 3-4 ઈ-કોમર્સ કંપનીઓમાં પહોંચવા માગે છે. કંપની ડિજિટલ માર્કેટિંગ પર પણ ઘણો ખર્ચ કરી રહી છે.” જો કે આ મામલે ટાટા ક્લિક તરફથી કોઈ પ્રતિક્રિયા આવી નથી.
ટાટા ક્લિકની શરૂઆત મે 2016માં થઈ હતી. આની માલિકી અને ઓપરેટર ટાટા યૂનિસ્ટોર છે. રજિસ્ટ્રાર ઑફ કંપનીઝને આપેલા ડેટા અનુસાર, 2016-17માં સેલ્સ 12 કરોડ રૂપિયા અને લોસ 162 કરોડ રૂપિયા હતો. કન્ઝ્યૂમર ઈલેક્ટ્રોનિક કંપનીઓને આશંકા છે કે જો ભારે ડિસ્કાઉંટ આપવાની ટાટા ક્લિકની રણનીતિ ચાલુ રહી તો, દિવાળી સુધીમાં ઈ-કોમર્સ માર્કેટમાં પ્રાઈસ વૉર વધી શકે છે.
પેનાસોનિક ઈંડિયાના CEO મનીષ શર્માએ કહ્યું કે, “ટાટા ક્લિક અને અન્ય ઈ-કોમર્સ કંપનીઓ પાસે ઘણી ઈન્વેંટરી બચી છે, કારણ કે ગયા વર્ષે દિવાળી બાદ મોટાભાગની કેટગરીમાં સેલ્સ ઘટ્યું છે અથવા ફ્લેટ રહ્યું છે. આ જ કારણે કંપનીઓ ભારે ડિસ્કાઉંટ આપી રહી છે.”