દેશમાં ઇન્ટરનેટની સુવિધા વધુ સસ્તી થવા જઈ રહી છે. જિયો દ્વારા જોરદાર પ્રતિસ્પર્ધાનો યુગ શરુ થયા પછી એક પછી એક નવા આઇડિયા સાથે નવી કંપનીઓ મેદાનમાં ઉતરી રહી છે. ત્યારે વાઈફાઈ ડબ્બા નામે એક સ્ટાર્ટઅપે આ કલ્પના સાકાર કરી છે. આ કારણે ડેટાપેક્સ હજુ વધુ સસ્તા કરવા માટે ટેલિકોમ કંપનીઓએ મજબૂર બનવું પડશે.
બેંગાલુરુની એક સ્ટાર્ટઅપ કે જેનું નામ જ વાઈફાઈ ડબ્બા છે. તેમનું કહેવું છે કે ભારતમાં જિયો ભલે લોંચ થયું હોય પરંતુ હજુ ડેટા મોંઘો છે. આ ડેટા પ્રાઇસને હજુ પણ સસ્તી કરી શકાય છે. જેને લઇને કંપની કેટલાક પ્લાન લાવી છે.
આ સ્ટાર્ટઅપના ડેટા પ્લાનની પ્રાથમિક કિંમત માત્ર બે રુપિયા છે. રૂપિયા 2માં 100 MB જેટલો ડેટા મળે છે. આ ઉપરાંત 10 રુપિયામાં 500 MB, 20 રુપિયામાં 1 GB ડેટા મળે છે. ત્રણે પેક્સની વેલેડિટી 24 કલાક જ છે. જો જિયોની વાત કરીએ તો કંપની હાલ રુપિયા 19માં અનલિમિટેડ વોયસ કોલિંગ સાથે 0.15 GB ડેટા આપે છે જેની વેલિડિટી 24 કલાક છે.
વાઇફાઇ ડબ્બાનું ડેટા પેક લોકલ ચાની કિટલી અથવા બેકરી પર પણ ઉપલબ્ધ રહેશે. હાલ આ પ્રોજેક્ટની શરુઆત ફક્ત બેંગાલુરુ પુરતી જ કરવામાં આવી છે. મોબાઇલના ટોપઅપ કૂપનની જેમ વાઈફાઈ ડબ્બાના કૂપન પણ મળશે. જેમાં લખેલ કોડને કંપનીને વેબસાઇટ પર જઈને ફીલ કરવો પડશે અને લોગ ઇન આઇડી અને પાસવર્ડ નાખતા તમારુ કનેક્શન ઓન થઈ જશે.
વાઈફાઈ ડબ્બા એક ઇન્ટરનેટ સર્વિસ પ્રોવાઇડર છે. જે ફાઇબર ઓપ્ટિક્સની મદદથી ઇન્ટરનેટ પ્રોવાઇડ કરે છે. કંપની પોતાના રાઉટર્સને રસ્તા પર, દુકાનોમાં લગાવી શકે છે. જેથી 100-200 મીટરના રેડિયસમાં 50 Mbpsની સ્પીડે ઇન્ટરનેટ આપી શકાય છે. કંપનીએ હાલ બેંગાલુરુમાં 350 જેટલા રાઉટર્સ લગાવ્યા છે અને તેમનો દાવો છે કે 1800 જેટલી કનેક્શન રિક્વેસ્ટ વેઇટિંગમાં છે. આ માટે વાઇફાઈ ડબ્બાએ સ્થાનિક કેબલ ઓપરેટર સાથે પાર્ટનરશિપ કરી છે.