સેલ્ફ-ડ્રાઈવ કાર ભાડે લેતા પહેલા ચોક્કસ વાંચો આ શરતો, નહીંતર ખિસ્સા પર પડશે ભારે ભાર
આજકાલ બહાર ફરવા જવા માટે કે પછી શહેરમાં આવન-જાવન માટે ‘સેલ્ફ-ડ્રાઈવ કાર’ (Self-Drive Car) ભાડે લેવાનો ટ્રેન્ડ ખૂબ વધી ગયો છે. લોકો ઓનલાઈન એપ કે વેબસાઇટ પર કારનું ભાડું જોઈને તુરંત જ બુકિંગ કરી લેતા હોય છે. પરંતુ જો તમે પણ ફક્ત સ્ક્રીન પર દેખાતી કિંમત જોઈને કાર બુક કરી લેતા હોવ, તો થોડું રોકાઈ જવાની જરૂર છે. કારણ કે ઓનલાઈન બુકિંગ વખતે દેખાતું ભાડું અને પ્રવાસ પૂરો થયા પછી ચૂકવવાની રકમ બંને અલગ હોઈ શકે છે.
માત્ર ભાડાની શરૂઆતની કિંમત જોઈને બુકિંગ ન કરો
સેલ્ફ-ડ્રાઈવ કાર બુક કરતી વખતે ગ્રાહકોનું ધ્યાન સામાન્ય રીતે દૈનિક ભાડા (Daily Rental Price) પર જ જતું હોય છે. પરંતુ બુકિંગની નિયમો અને શરતો (Terms & Conditions) માં ઘણા એવા છુપાયેલા ચાર્જિસ હોય છે, જે ખાસ પરિસ્થિતિઓમાં લાગુ થઈ શકે છે. તેથી કાર ભાડે લેતા પહેલા તેના નિયમો ચોક્કસ વાંચવા જોઈએ.
‘Revv’ ના ફાઉન્ડર અને સીઈઓ અનુપમ અગ્રવાલના જણાવ્યા મુજબ, ગ્રાહકે સૌથી પહેલા એ સમજવું જોઈએ કે કારનો વીમો (Insurance) અને કાર ભાડે લેનારની જવાબદારી (Renter’s Liability) બંને અલગ-અલગ બાબતો છે. બુકિંગ સમયે મળતું ‘ડેમેજ વેયવર’ (Damage Waiver) એ નક્કી કરે છે કે ગાડીને નુકસાન થાય તો ગ્રાહકે પોતાની ખિસ્સામાંથી કેટલી રકમ ચૂકવવી પડશે.
કારને નુકસાન થાય તો કેટલા રૂપિયા ચૂકવવા પડી શકે?
કાર પર કોઈ ખરોંચ આવે અથવા કોઈપણ પ્રકારનું નુકસાન થાય, તો તેની ભરપાઈ કરવાની રકમ ડેમેજ વેયવર અને લાયબિલિટી કેપ (Liability Cap) પર આધાર રાખે છે. તેથી બુકિંગ પહેલાં જરૂર તપાસો કે તમારી મહત્તમ જવાબદારી કેટલી છે અને કઈ પરિસ્થિતિઓમાં આ વેયવર કામ નહીં કરે.
ઉદાહરણ તરીકે, નશાની હાલતમાં ડ્રાઇવિંગ કરવા જેવી ગંભીર સ્થિતિમાં ડેમેજ પ્રોટેક્શનનો લાભ મળતો નથી. જો કે, સામાન્ય રીતે ગાડી પર થતા નાના-મોટા સ્ક્રેચિસ માટે વધારાનો ચાર્જ વસૂલવામાં આવતો નથી હોતો.
કાર પરત કર્યા પછી પણ આવી શકે છે ચલણ (Traffic Challan)
ઘણા લોકો એવું માને છે કે કાર કંપનીને પાછી આપી દીધી એટલે આપણી જવાબદારી પૂરી થઈ ગઈ. પરંતુ એવું હંમેશાં હોતું નથી. યાત્રા દરમિયાન થયેલ ઓટોમેટેડ ઈ-ચલણ (E-Challan) ઘણીવાર પ્રવાસ પૂરો થયા પછી ગ્રાહક સુધી પહોંચતું હોય છે. આ ઉપરાંત, કેટલીક કંપનીઓ ટ્રાફિક ચલણ ટ્રાન્સફર કરવા માટે એડમિનિસ્ટ્રેટિવ ફી પણ વસૂલતી હોય છે.
તે જ રીતે, ફ્યુઅલ (બળતણ) નો ખર્ચ પણ તમારું બિલ વધારી શકે છે. જો કાર પાછા આપતી વખતે ટેન્કમાં નક્કી કરેલી માત્રામાં પેટ્રોલ કે ડિઝીલ નહીં હોય, તો કંપની પોતાની રીતે ફ્યુઅલ ભરાવીને તેનો ખર્ચ ગ્રાહક પાસેથી વસૂલ કરશે. આમાં ફ્યુઅલની કિંમત ઉપરાંત રિફ્યુઅલિંગ સર્વિસ ચાર્જ પણ જોડાઈ શકે છે.
બુકિંગ કરતા પહેલાં આ મહત્વની બાબતો ચોક્કસ ચકાસો
કોઈપણ સેલ્ફ-ડ્રાઈવ કાર ભાડે લેતા પહેલા નીચેની બાબતો અવશ્ય વાંચી લો:
ડેમેજ વેયવર અને લાયબિલિટી લિમિટ
કયા સંજોગોમાં વીમો લાગુ નહીં પડે (Exclusions)
કેન્સલેશન ચાર્જિસ અને ફ્યુઅલ પોલિસી
ટ્રાફિક ફાઈન નિયમો
જો બુક કરેલ મોડેલ ઉપલબ્ધ ન હોય, તો કંપનીની રિપ્લેસમેન્ટ પોલિસી શું છે તે પણ જાણી લો. કેટલાક કિસ્સાઓમાં સમાન સેગમેન્ટની બીજી કાર અથવા અપગ્રેડ ગાડી આપવામાં આવતી હોય છે. ટૂંકમાં, ભાડાની કારની અસલી કિંમત ફક્ત ઓનલાઈન દેખાતું ભાડું નથી. બુકિંગ કન્ફર્મ કરતા પહેલા નાના અક્ષરોમાં લખેલી શરતો વાંચવી જ તમને ભવિષ્યના મોટા બિલથી બચાવી શકે છે.
