ત્રણ દિવસમાં ૪૦૦ રિક્ષા ડિટેઈન, દંડમાં વસુલ્યા લાખો રૂપિયા
અમદાવાદ શહેરમાં વાહનચાલકો ટ્રાફિક અને આરટીઓના નિયમોનું પાલન કરતા નથી. પરિણામે હાલમાં આરટીઓ અને ટ્રાફિક પોલીસની કડક કામગીરી ચાલી રહી છે. ખાસ કરીને રિક્ષા ચલાવનારાં પર મોટા પ્રમાણમાં કાર્યવાહી થઈ રહી છે. છેલ્લાં માત્ર ત્રણ દિવસમાં ૪૦૦થી વધુ રિક્ષાઓને ડિટેઈન કરવામાં આવી છે અને એક રિક્ષા ચાલકના નામે સરેરાશ ૮થી ૧૦ હજાર સુધીનો દંડ ફટકારવામાં આવ્યો છે.
કયા નિયમ ભંગે કેટલો દંડ?
ફિટનેસ ન હોવા પર: રૂ. ૫,૦૦૦
પરમીટ વિના વાહન ચલાવતાં: રૂ. ૨,૫૦૦
પીયુસી ન હોવા પર: રૂ. ૧,૦૦૦
લાઇસન્સ ન હોવા પર: રૂ. ૨,૦૦૦
વીમો ન હોવા પર: રૂ. ૧,૦૦૦
બધી ચીજો ગુમ હોય તો: રૂ. ૧૦,૦૦૦થી વધુ
આ દંડની રકમ દેખાડે છે કે વાહનચાલકોએ દરેક દસ્તાવેજ યોગ્ય રીતે નિયત સમયમર્યાદામાં નવા કરાવા જોઈએ, નહીં તો દંડનો ભોગ બનવો પડી શકે છે.
અનધિકૃત રિક્ષાઓ અને કડક ચેકિંગ
અનધિકૃત રીતે વાહન ચલાવનારાઓ સામે કડક કાર્યવાહી હાથ ધરવામાં આવી રહી છે. અમદાવાદના ઇન્ચાર્જ આરટીઓ શ્રી નીરવ બક્ષી મુજબ, અનેક રિક્ષાઓ પણ ફિટનેસ અને પરમીટ વિના ચલાવવામાં આવી રહી હતી. ટ્રાફિક પોલીસ અને આરટીઓ દ્વારા સંયુક્ત રીતે શહેરમાં ચેકિંગ અભિયાન ચલાવવામાં આવી રહ્યું છે.
દસ્તાવેજનું નિયમિત પાલન કરવું અનિવાર્ય
એક રિક્ષા ચાલકને દસ્તાવેજો પૂરાં કરવા માટે લગભગ નીચે પ્રમાણેનો ખર્ચ થાય છે:
ફિટનેસ: રૂ. ૧,૫૦૦
પરમીટ: રૂ. ૧,૫૦૦થી ૨,૦૦૦
વીમો: રૂ. ૫,૦૦૦થી ૮,૦૦૦
પીયુસી: રૂ. ૧૦૦
આ રીતે કુલ ખર્ચ રૂ. ૮થી ૧૨ હજાર જેટલો થાય છે, પરંતુ જો આ દસ્તાવેજો સમયસર ન કરાવાયા હોય, તો દંડના રૂપમાં તેના કરતાં પણ વધુ ચૂકવવું પડે છે.
ખાનગી વાહન ચાલકો માટે પણ ચેતવણી
માત્ર રિક્ષા ચાલકો જ નહીં પરંતુ ખાનગી વાહનચાલકો માટે પણ નિયમોનું પાલન ફરજિયાત છે. દંડથી બચવા માટે દરેક દસ્તાવેજ સચોટ અને સમયસર નવો કરાવવો જોઈએ.
