નોકરી અને અભ્યાસ અટવાઈ ગયેલા આદિવાસી યુવાનોનો આક્રોશ
જિલ્લાના અમીરગઢ વિસ્તારમાં આજે અનેક શાળાઓમાં શિક્ષકો હાજર હોવા છતાં વર્ગખંડો સંપૂર્ણ ખાલીખમ જોવા મળ્યા. આદિવાસી સમાજે પોતાના બાળકોને જ્ઞાતિ સંબંધી દાખલાઓની ગંભીર સમસ્યાને કારણે શાળાએ ન મોકલવાનો નિર્ણય કર્યો છે. સરકાર દ્વારા વિદ્યાર્થીઓ અને નોકરી શોધતા યુવાનોને 1950ના સમયના પુરાવા માંગવામાં આવતા ભારે મુશ્કેલીઓ ઊભી થઈ છે. અનેક રજૂઆતો મુખ્યમંત્રી સુધી પહોંચી છતાં નિરાકરણ ન આવતા આજે વાલીઓએ શાળાઓ બહિષ્કૃત કરીને વિરોધ વ્યક્ત કર્યો.
દાંતા–અમીરગઢમાં દાખલાની સમસ્યાને લઈ ઉગ્ર અસંતોષ
અમીરગઢ અને દાંતા તાલુકામાં આદિવાસી સમાજના યુવાનોને જાતિના દાખલા મેળવવામાં પડતી મુશ્કેલીઓ લાંબા સમયથી ચાલતી આવી છે. છતાં સ્થાનિક કચેરીઓ, કલેકટર કચેરી અને રાજ્યસ્તરે રજૂઆતો બાદ પણ હકારાત્મક પગલું ન લેવાતા સમાજમાં અસંતુષ્ટિ વધી રહી છે. 1950ના પુરાવા ન હોવાને કારણે વિદ્યાર્થીઓ ઉચ્ચ અભ્યાસમાં પાછળ પડી રહ્યા છે અને નોકરી માટે પસંદ થયેલા યુવાનોની નિમણૂક અટકી રહી છે. આજે આ વિરોધના ભાગરૂપે વિસ્તારમાં સ્થિત શાળાઓમાં એકપણ વિદ્યાર્થી હાજર નહોતો.
નોકરી અટકેલી યુવાનોની પીડા અને સમાજની ચીમકી
સ્થાનિક તારાભાઈએ જણાવ્યું કે તેમનો દીકરો 2023માં સિવિલ એન્જિનિયર તરીકે પસંદગી પામ્યો હોવા છતાં દસ્તાવેજ ચકાસણી દરમિયાન 1950ના પુરાવા રજૂ ન કરી શકતા આજે સુધી તેને નિયુક્તિ ઓર્ડર મળ્યો નથી. સમાજના અનેક યુવાનો આવી જ મુશ્કેલીમાંથી પસાર થઈ રહ્યા છે. આ સ્થિતિ યથાવત્ રહે તો સમાજે રસ્તા રોકો અને ગાંધીનગર ઘેરાવ જેવા કાર્યક્રમો હાથ ધરવાની ચેતવણી આપી છે.
ધારાસભ્યનો સરકારને સીધો સંદેશ: દાખલા સરળ બનાવો
આ મુદ્દે અમીરગઢના ધારાસભ્ય કાંતિ ખરાડી પણ વાલીઓના પક્ષમાં ઊભા રહ્યા. તેમણે જણાવ્યું કે આદિવાસી બાળકોને શાળાએ ન મોકલવાનો વાલીઓનો નિર્ણય ત્રાસદાયક નીતિઓ સામેનો સ્વાભાવિક પ્રતિસાદ છે. અગાઉ જે રીતે જાતિના દાખલા આપવામાં આવતા હતા, તેવી જ પદ્ધતિ ફરી શરૂ કરવામાં આવે એવી માંગ તેમણે કરી. ધારાસભ્યએ સરકારને ચેતવણી આપતાં કહ્યું કે જો સમયસર પગલાં ન લેવાય તો આંદોલન અન્ય સમાજ સુધી ફેલાય શકે છે અને આદિવાસી સમાજ પર થતો અત્યાચાર વધુ ગંભીર બનશે.
