મુખ્ય સચિવ પંકજ જોશીની અધ્યક્ષતામાં UIDAI સાથે સમીક્ષા બેઠક, સેવા વિતરણમાં ઝડપ લાવવાનો ઉદ્દેશ
ગાંધીનગર ખાતે મુખ્ય સચિવ પંકજ જોશીની અધ્યક્ષતામાં આધાર-UID અમલીકરણ સમિતિ (UIDIC)ની મહત્વની બેઠક યોજાઈ હતી. આ બેઠકનો મુખ્ય ઉદ્દેશ રાજ્યમાં આધાર (UIDAI) સંબંધિત સેવાઓને વધુ સચોટ, ઝડપી અને સરળ બનાવવાનો હતો. UIDAIના અધિકારીઓ અને રાજ્ય સરકારના વિવિધ વિભાગોના વરિષ્ઠ અધિકારીઓની ઉપસ્થિતિમાં યોજાયેલ આ બેઠકમાં અનેક નિર્ણાયક મુદ્દાઓ પર ચર્ચા કરવામાં આવી.
મુખ્ય સચિવ શ્રી પંકજ જોશીએ બેઠકને સંબોધતાં જણાવ્યું કે, “ગુજરાત રાજ્યને આધાર આધારિત સેવા વિતરણમાં આગવું સ્થાન મળે તે માટે સતત નવીનતા અને કાર્યક્ષમતા અત્યંત આવશ્યક છે.” તેમણે તમામ વિભાગોને નવી ટેક્નોલોજી અને UIDAIના તાજેતરના ઉપક્રમોનો વધુ સક્રિય રીતે અમલ કરવા માટે આહવાન પણ કર્યું.
બેઠક દરમિયાન બાળક નોંધણીની પ્રક્રિયામાં આધારના સહયોગ, ફરજિયાત બાયોમેટ્રિક અપડેટ્સ, તેમજ સરળતાથી સર્વિસ ઍક્સેસમાં સુધારાની જરૂરીયાત જેવા મુદ્દાઓ ઉપર વિશેષ ચર્ચા થઈ. ડાયરેક્ટ બેનિફિટ ટ્રાન્સફર (DBT) જેવી કલ્યાણકારી યોજનાઓમાં આધાર આધારિત ઓળખની ભૂમિકા અને તેની વિશ્વસનીયતાને વધુ મજબૂત કરવાની દિશામાં પણ સૂચનો આપવામાં આવ્યા.
UIDAIના પ્રતિનિધિઓ દ્વારા યુનિવર્સલ ક્લાયન્ટ એપ્લિકેશન, ફેસ ઓથેન્ટિકેશન, SWIK પોર્ટલ અને મોબાઇલ આધાર એપ્લિકેશન જેવી નવી પહેલોના પ્રેઝન્ટેશન પણ આપવામાં આવ્યા. આ નવી ટેક્નોલોજી દ્વારા નાગરિકો માટે આધાર સેવા વધુ સરળતાથી ઉપલબ્ધ બની શકે છે.
મુખ્ય સચિવએ બેઠકના અંતે જણાવ્યું કે સર્વિસ ડિલિવરીમાં સાર્વજનિક અનુભવ મહત્વનો છે અને દરેક વિભાગે પરિણામમુખી અભિગમ સાથે આ ટેકનોલોજીના અભ્યાસ દ્વારા લોકો સુધી વધુ ઝડપથી અને વિશ્વસનીય રીતે સેવાઓ પહોંચાડવી જોઇએ.
