અમૂલ જલ્દી જ ‘હલ્દી દૂધ’ અને ‘આઈરીશ મોકટેલ’ કરશે લૉંચ

એશિયાની સૌથી મોટી દૂધની બ્રાંડ અમૂલ ટૂંક સમયમાં જ રાષ્ટ્રીય સ્તરે ‘હલ્દી દૂધ’ (હળદરવાળું દૂધ) લૉંચ કરશે. દેશની નવી પેઢીના સ્વાદને સંતોષવા માટે ‘હલ્દી દૂધ’ સાથે અમૂલ ‘આઈરીશ ડ્રિંક મોકટેલ’ પણ લોંચ કરશે. બંને પ્રોડક્ટ દેશમાં પ્રથમ વખત રજૂ થઈ રહી છે. ખેડા જિલ્લાની દૂધ ઉત્પાદક મંડળી જે અમૂલના નામે જાણીતી છે, તેના દ્વારા દૂધની બે નવી વેરાયટિ બહાર પાડવામાં આવશે. જે ઈઝી ટુ ઓપન કેન્સ (EoE)માં મળશે. અમૂલ ડેરીના મેનેજિંગ ડિરેક્ટર ડૉ. કે રત્નમે કહ્યું કે, ‘અમે દરેક પ્રોડક્ટના દોઢ લાખ યુનિટ ઉત્પાદિત કરવા માટે સક્ષમ છીએ. દૂધની આ બે નવી વેરાયટિનું ઉત્પાદન પણ આણંદ સ્થિત અમૂલ ડેરીના પ્લાંટમાં જ થશે.’ GCMMFના મેનેજિંગ ડિરેક્ટર આર. એસ. સોઢીએ કહ્યું કે, ‘રોગપ્રતિકારક શક્તિ વધારવા માટે હળદર જાણીતી છે. બીમારીમાં ખાસ કરીને હળદરવાળું દૂધ પીવાનો ઉલ્લેખ આયુર્વેદમાં પણ કરાયો છે. હળદરવાળું દૂધ ફક્ત ભારતમાં જ નહીં વિશ્વમાં પણ ‘Turmeric latte’ તરીકે જાણીતું છે. ઘરગથ્થુ ઈલાજ તરીકે હળદરનું દૂધ વપરાય જ છે.’આઈરીશ ડ્રિંક મોકટેલનો વિચાર આયર્લેંડની જાણીતી આઈરીશ કોફી પરથી આવ્યો. GCMMFના અધિકારીઓએ કહ્યું કે, ‘આ બે નવા દૂધના પીણાં લોંચ કરીને દેશની સૌથી મોટી સહકારી મંડળી કુલ દૂધ આધારિત પીણાંના માર્કેટના આશરે 5 ટકા એટલે કે રૂ. 100 કરોડનું લક્ષ્યાંક રાખી રહી છે. અમને વિશ્વાસ છે કે આઈરીશ ડ્રિંક મોકટેલ બેવરેજ માર્કેટમાં ધમાલ મચાવશે અને 2018માં સૌથી વધુ પીવાતું પીણું બનશે.’