અમેરિકા અને ઈરાન વચ્ચે આરપારની જંગ: હોર્મુઝની નાકાબંધીના એલાન સામે ઈરાનની ‘ગણિત’ વાળી ધમકી!
પાકિસ્તાનમાં અમેરિકા અને ઈરાન વચ્ચે ચાલી રહેલી શાંતિ વાટાઘાટો કોઈ પરિણામ વગર જ નિષ્ફળ ગઈ છે. અમેરિકા તરફથી જેડી વેન્સ અને ઈરાન તરફથી ગાલિબાફ આ વાતચીતનું નેતૃત્વ કરી રહ્યા હતા. આ બેઠક નિષ્ફળ જતા જ અમેરિકાએ ઈરાન સામે કડક વલણ અપનાવ્યું છે અને વ્યૂહાત્મક રીતે મહત્વની ગણાતી હોર્મુઝની સામુદ્રધુની (Strait of Hormuz) પર નાકાબંધી કરવાની જાહેરાત કરી છે.
ડોનાલ્ડ ટ્રમ્પનું આક્રમક એલાન
વાતચીત નિષ્ફળ ગયા બાદ અમેરિકી રાષ્ટ્રપતિ ડોનાલ્ડ ટ્રમ્પે સ્પષ્ટ કર્યું છે કે અમેરિકી નૌસેના હોર્મુઝમાં અવરજવર કરતા તમામ જહાજો પર રોક લગાવશે. અમેરિકી સેન્ટ્રલ કમાન્ડ (CENTCOM) એ જાહેર કર્યું છે કે સોમવારથી ઈરાનના તમામ બંદરોની નાકાબંધી શરૂ કરી દેવામાં આવશે. આ નાકાબંધીમાં માત્ર ઈરાની જહાજો જ નહીં, પરંતુ અન્ય કોઈ પણ દેશના જહાજો જો ઈરાની બંદરોમાં પ્રવેશવાનો કે બહાર નીકળવાનો પ્રયાસ કરશે તો તેમને રોકવામાં આવશે.
ઈરાનનો વળતો પ્રહાર: પેટ્રોલના ભાવની યાદ અપાવી
અમેરિકાના આ એલાન સામે ઈરાની સંસદના અધ્યક્ષ મોહમ્મદ બગેર ગાલિબાફે કટાક્ષ કર્યો છે. તેમણે અમેરિકામાં વધતા પેટ્રોલના ભાવનો મુદ્દો ઉઠાવીને ચેતવણી આપી છે. ગાલિબાફે વ્હાઇટ હાઉસ પાસેના એક પેટ્રોલ પંપના ભાવની તસવીર સોશિયલ મીડિયા પર શેર કરી અને લખ્યું, “અત્યારે જે પેટ્રોલના ભાવ છે તેનો આનંદ માણી લો. આ કહેવાતી નાકાબંધીને કારણે ટૂંક સમયમાં તમે $4-5 પ્રતિ ગેલન વાળા પેટ્રોલને પણ યાદ કરશો.”
ગાલિબાફનું રહસ્યમય ‘ગણિત’ અને ફોર્મ્યુલા
ઈરાની નેતાએ X (ટ્વિટર) પર એક જટિલ સમીકરણ શેર કર્યું છે: $ΔO\_BSOH>0 ⇒ f(f(O))>f(O)$. આ ફોર્મ્યુલા દ્વારા તેમણે સમજાવવાનો પ્રયાસ કર્યો છે કે જો હોર્મુઝની નાકાબંધીની ગંભીરતા વધશે, તો તે તેલની કિંમતોમાં માત્ર સાદો વધારો નહીં કરે, પરંતુ તે કિંમતોમાં એક અકલ્પનીય ઉછાળો લાવશે. નિષ્ણાંતોના મતે આનો અર્થ એ છે કે સપ્લાય ચેઈન ખોરવાતા કિંમતો પર તેની વિઘાતક અસર થશે જે અમેરિકી જનતા માટે મોંઘી સાબિત થશે.
Enjoy the current pump figures. With the so-called ‘blockade’, Soon you’ll be nostalgic for $4–$5 gas.
ΔO_BSOH>0 ⇒ f(f(O))>f(O) pic.twitter.com/rVxlC6vFWG
— محمدباقر قالیباف | MB Ghalibaf (@mb_ghalibaf) April 12, 2026
શું થશે નાકાબંધીની અસર?
સેન્ટકોમ (CENTCOM) ના જણાવ્યા મુજબ, તેઓ ગેર-ઈરાની બંદરો વચ્ચે મુસાફરી કરતા જહાજોને હોર્મુઝની સામુદ્રધુનીમાંથી પસાર થવાની મંજૂરી આપશે, પરંતુ ઈરાન સાથે વેપાર કરતા કોઈ પણ જહાજને છોડવામાં આવશે નહીં.
વિશ્વના કુલ ખનિજ તેલના વેપારનો મોટો હિસ્સો હોર્મુઝમાંથી પસાર થાય છે, ત્યારે જો આ સ્થિતિ લાંબો સમય ચાલે તો વૈશ્વિક અર્થવ્યવસ્થા અને ખાસ કરીને ક્રૂડ ઓઈલના ભાવમાં મોટી ઉથલપાથલ થવાની પૂરેપૂરી શક્યતા છે.
