અમેરિકી સંરક્ષણ મંત્રાલયનો મોટો ખુલાસો: UFO અને એલિયન્સની ફાઈલોમાંથી શું મળ્યું?
બ્રહ્માંડમાં આપણે એકલા છીએ કે પછી બીજું પણ કોઈ છે? આ પ્રશ્ન દાયકાઓથી માનવજાતને મૂંઝવી રહ્યો છે. આ રહસ્ય પરથી પડદો ઉંચકવા માટે અમેરિકી સંરક્ષણ મંત્રાલય ‘પેન્ટાગોન’ એ એક અત્યંત મહત્વનું પગલું ભર્યું છે. ઈતિહાસમાં પહેલીવાર, પેન્ટાગોને UFO (અનઆઈડેન્ટિફાઈડ ફ્લાઈંગ ઓબ્જેક્ટ્સ) અને એલિયન્સ સાથે જોડાયેલી 161 ગોપનીય ફાઈલો જાહેર કરી છે. આ ખુલાસાએ સમગ્ર વિશ્વમાં ફરી એકવાર બીજા ગ્રહના જીવો અંગેની ચર્ચાઓ તેજ કરી દીધી છે.
ટ્રમ્પના આદેશથી પારદર્શકતાની શરૂઆત
આ દસ્તાવેજો જાહેર કરવા પાછળ રાષ્ટ્રપતિ ડોનાલ્ડ ટ્રમ્પનો મહત્વનો રોલ રહ્યો છે. ટ્રમ્પે સત્તા સંભાળ્યા બાદ સ્પષ્ટ કર્યું હતું કે એલિયન્સ અને યુએફઓ પ્રત્યે લોકોમાં ભારે જિજ્ઞાસા છે, તેથી સરકાર પાસે જે કંઈ પણ માહિતી છે તેમાં પારદર્શકતા હોવી જોઈએ. તેમના આદેશ બાદ, દાયકાઓથી દબાયેલી ફાઈલો હવે જાહેર જનતા માટે ખુલ્લી મુકવામાં આવી છે. પેન્ટાગોનનું કહેવું છે કે આ તો માત્ર શરૂઆત છે, આગામી સમયમાં વધુ દસ્તાવેજો પણ સામે આવી શકે છે.
અવકાશયાત્રીઓના ચોંકાવનારા દાવા: એપોલો મિશનના રહસ્યો
આ જાહેર કરાયેલા દસ્તાવેજોમાં સૌથી વધુ રસપ્રદ માહિતી 1960 અને 1970 ના દાયકાના એપોલો મિશનની છે. ચંદ્ર પર જનારા વિશ્વના બીજા માનવી બઝ એલ્ડ્રિને 1969માં આપેલા એક ઈન્ટરવ્યુમાં જણાવ્યું હતું કે, ચંદ્રની સફર દરમિયાન તેમણે એક અત્યંત તેજસ્વી અને રહસ્યમય પ્રકાશ જેવી વસ્તુ જોઈ હતી. તેમને લાગ્યું કે જાણે કોઈ ચમકતી લાઈટ અવકાશમાં તેમની સાથે સમાંતર મુસાફરી કરી રહી છે.
તેવી જ રીતે, એપોલો-12 મિશનના એસ્ટ્રોનોટ એલન બીને પણ દાવો કર્યો હતો કે તેમણે અવકાશમાં ‘ફ્લેશિંગ લાઈટ’ જોઈ હતી. એવું લાગતું હતું જાણે ચંદ્રની સપાટી પરથી કોઈ કણો સતત બહાર નીકળી રહ્યા હોય. 1972ના એપોલો-17 મિશનના મુસાફરોએ પણ આકાશમાં આતશબાજી જેવી ચમક જોયાની વાત કરી હતી. જોકે, પાછળથી આ વૈજ્ઞાનિકોએ એવી દલીલ પણ કરી હતી કે કદાચ તે બરફના ટુકડા પર પડતો સૂર્યપ્રકાશ હોઈ શકે છે, પરંતુ રહસ્ય હજુ પણ અકબંધ છે.
જેમિની-7 અને આકાશમાં દેખાયેલા લાખો કણો
ફાઈલોમાં 1965ના ‘જેમિની-7’ મિશનની ઓડિયો રેકોર્ડિંગ પણ સામેલ છે. જેમાં અવકાશયાત્રી ફ્રેન્ક બોરમેને મિશન કંટ્રોલને જાણ કરી હતી કે તેમણે તેમના યાનની નજીક એક અજાણી વસ્તુ અને લાખો ચમકતા કણો જોયા છે. આ પ્રકારના પુરાવાઓ સાબિત કરે છે કે અવકાશયાત્રીઓએ ઘણી વખત એવી વસ્તુઓનો સામનો કર્યો છે જે વિજ્ઞાનની સામાન્ય સમજ બહારની છે.
મિડલ ઈસ્ટના યુદ્ધ ક્ષેત્રોમાં રહસ્યમય યાન?
પેન્ટાગોને આ ફાઈલો સાથે કેટલાક વીડિયો પણ રિલીઝ કર્યા છે, જે મુખ્યત્વે મધ્ય પૂર્વ (મિડલ ઈસ્ટ) ના દેશો જેવા કે ઈરાક, સીરિયા અને યુએઈના છે. અમેરિકી સેનાના ડ્રોન અને કેમેરા દ્વારા રેકોર્ડ કરાયેલા આ વીડિયોમાં ઈંડા આકારની (Oval shape) અત્યંત વેગીલી વસ્તુઓ હવામાં ઉડતી દેખાય છે. લશ્કરી અહેવાલોમાં તેને ‘સંભવિત મિસાઈલ’ ગણાવવામાં આવી છે, પરંતુ તેની ગતિ અને આકાર સામાન્ય મિસાઈલ કરતા ઘણા અલગ છે.
સામાન્ય નાગરિકોના અનુભવો અને FBI રિપોર્ટ
માત્ર સૈનિકો કે વૈજ્ઞાનિકો જ નહીં, પણ સામાન્ય નાગરિકોએ પણ દાયકાઓથી આવી ઘટનાઓ નોંધી છે. 1957માં એક વ્યક્તિએ FBI ને રિપોર્ટ કર્યો હતો કે તેણે જમીન પર ઉતરેલી એક ગોળાકાર મોટી ઉડતી રકાબી જેવી વસ્તુ જોઈ હતી. તેમજ 2023માં પણ અમેરિકાના કેટલાક નાગરિકોએ આકાશમાં ધાતુ જેવી તેજસ્વી વસ્તુઓ જોયાનો દાવો કર્યો હતો. આ તમામ રિપોર્ટ્સ હવે પેન્ટાગોનની સત્તાવાર ફાઈલોનો ભાગ છે.
