ટ્રમ્પ સરકારમાં $5 કરોડનું મોટું હેલ્થકેર કૌભાંડ ખુલ્યું: FBI એ 8 ભેજાબાજોની કરી ધરપકડ
અમેરિકામાં ડોનાલ્ડ ટ્રમ્પના બીજા કાર્યકાળ દરમિયાન સ્વાસ્થ્ય સેવાઓમાં એક મોટું કૌભાંડ સામે આવ્યું છે. ફેડરલ બ્યુરો ઓફ ઇન્વેસ્ટિગેશન (FBI) એ આ મામલે કેલિફોર્નિયામાં મોટી કાર્યવાહી કરીને 8 લોકોની ધરપકડ કરી છે. આ આરોપીઓ પર રાષ્ટ્રીય સ્વાસ્થ્ય સુરક્ષા પ્રણાલી (મેડિકેર) સાથે આશરે 5 કરોડ ડોલર (અંદાજે 400 કરોડ રૂપિયાથી વધુ) ની છેતરપિંડી કરવાનો ગંભીર આરોપ છે.
કાગળ પર ચાલતા હતા નકલી કેર સેન્ટર
FBI ના અહેવાલ મુજબ, પકડાયેલા આરોપીઓ કથિત રીતે નકલી “હોસ્પિસ કેર” (ગંભીર બીમારીના અંતિમ તબક્કાની સારવાર) કેન્દ્રો ચલાવી રહ્યા હતા. આ કેન્દ્રો વાસ્તવમાં અસ્તિત્વમાં નહોતા અથવા માત્ર કાગળ પર જ દર્દીઓની સારવાર બતાવતા હતા. ખરેખર કોઈ સારવાર આપવામાં આવતી નહોતી, પરંતુ તેના બદલામાં આ કેન્દ્રો સરકારી તિજોરી એટલે કે ‘મેડિકેર’ માંથી જંગી રકમ વસૂલતા હતા.
તબીબી વ્યવસાય સાથે જોડાયેલા લોકોની સંડોવણી
આ કૌભાંડની ગંભીરતા એ વાત પરથી સમજાય છે કે પકડાયેલા લોકોમાં માત્ર વ્યાપારીઓ જ નહીં, પણ ત્રણ નર્સ, એક કાઇરોપ્રેક્ટર અને એક મનોવૈજ્ઞાનિકનો પણ સમાવેશ થાય છે. આ લોકો એવા દર્દીઓને હોસ્પિસ સેવાના લાભાર્થી તરીકે બતાવતા હતા જેઓ ખરેખર ગંભીર રીતે બીમાર નહોતા. ધરપકડ કરાયેલા લોકોમાં ગ્લેડવિન અને એમેલો ગિલ નામનું દંપતી પણ સામેલ છે, જેઓ એક હોસ્પિસ કંપનીના માલિક છે.
જીવિત રહેવાનો દર પાંચ ગણો વધતા ફૂટ્યો ભાંડો
આ આખું કૌભાંડ ત્યારે પ્રકાશમાં આવ્યું જ્યારે તપાસકર્તાઓએ જોયું કે આ કેન્દ્રોમાં દર્દીઓનો જીવિત રહેવાનો દર (Survival Rate) સામાન્ય 17 ટકાની સરખામણીએ પાંચ ગણો વધારે હતો. સામાન્ય રીતે હોસ્પિસ કેર એવા લોકો માટે હોય છે જેઓ જીવનના અંતિમ તબક્કામાં હોય, તેથી ત્યાં દર્દીઓનું લાંબુ જીવવું અસામાન્ય માનવામાં આવે છે. આ શંકાસ્પદ આંકડાઓને આધારે જ્યારે તપાસ કરવામાં આવી ત્યારે આ મસમોટી છેતરપિંડી બહાર આવી.
ટ્રમ્પ સરકારનું કડક વલણ
રાષ્ટ્રપતિ ડોનાલ્ડ ટ્રમ્પે સત્તા સંભાળતાની સાથે જ સરકારી ખર્ચમાં થતી ગેરરીતિઓ રોકવા માટે એક ખાસ કમિટીની રચના કરી હતી, જેનું નેતૃત્વ ઉપરાષ્ટ્રપતિ જેડી વેન્સ કરી રહ્યા છે. આ કમિટીની સક્રિયતાને કારણે જ આ કૌભાંડ ઝડપથી પકડાઈ ગયું છે. સત્તાવાળાઓના જણાવ્યા અનુસાર, દક્ષિણ કેલિફોર્નિયા હેલ્થકેર છેતરપિંડી માટે હાઈ-રિસ્ક ઝોન છે અને આવી છેતરપિંડીનો સીધો બોજ અમેરિકાના કરદાતાઓ પર પડે છે.
