US: ટ્રમ્પ વહીવટીતંત્રે 17 ઇમિગ્રેશન કોર્ટના ન્યાયાધીશોને હટાવ્યા, જાણો શું છે આખો મામલો
US: અમેરિકામાં ડોનાલ્ડ ટ્રમ્પના પ્રશાસને ૧૦ રાજ્યોમાંથી ઈમિગ્રેશન કોર્ટના ૧૭ ન્યાયાધીશોને બરતરફ કરીને ખળભળાટ મચાવ્યો છે. આ કાર્યવાહી કોઈ પૂર્વ સૂચના વિના કરવામાં આવી છે, જેના કારણે રાજકીય વર્તુળોમાં અને ન્યાયિક ક્ષેત્રે સનસનાટી વ્યાપી ગઈ છે. આ તમામ ન્યાયાધીશો ઈમિગ્રેશન કોર્ટ સાથે સંકળાયેલા હતા.
રાષ્ટ્રપતિ ટ્રમ્પના પ્રશાસન દ્વારા વિદેશી નાગરિકોના મોટા પાયે દેશનિકાલની પ્રક્રિયાને ઝડપી બનાવવાના પ્રયાસો વચ્ચે આ પગલું ભરવામાં આવ્યું છે.એવું માનવામાં આવે છે કે બરતરફ કરાયેલા મોટાભાગના ન્યાયાધીશો ટ્રમ્પના આ નિર્ણયોના વિરોધમાં ચુકાદાઓ આપી રહ્યા હતા. આ જ કારણોસર, ટ્રમ્પ પ્રશાસને એકસાથે ૧૦ રાજ્યોની ઈમિગ્રેશન અદાલતોના ૧૭ ન્યાયાધીશોને બરતરફ કરીને હડકંપ મચાવ્યો છે.
જજોને બરતરફ કરવાનું કારણ નથી જણાવ્યું
ટ્રમ્પ પ્રશાસને આ ન્યાયાધીશોને શા માટે બરતરફ કર્યા છે, તેનું કોઈ સ્પષ્ટ કારણ જણાવ્યું નથી. જોકે, એકસાથે આટલી મોટી સંખ્યામાં જજોને હટાવવાથી વ્યાપક ચર્ચા જાગી છે. ન્યાયાધીશોનું પ્રતિનિધિત્વ કરતા સંગઠન ‘ધ ઇન્ટરનેશનલ ફેડરેશન ઓફ પ્રોફેશનલ એન્ડ ટેકનિકલ એન્જિનિયર્સ’ (The International Federation of Professional and Technical Engineers) એ આ અંગે માહિતી આપી છે. સંગઠને એક અખબારી યાદીમાં જણાવ્યું હતું કે શુક્રવારે ૧૫ અને સોમવારે વધુ બે ન્યાયાધીશોને “કોઈ કારણ દર્શાવ્યા વિના” બરતરફ કરવામાં આવ્યા છે.
આ સ્થળોએ હતી તૈનાતી
સંગઠને વધુમાં જણાવ્યું હતું કે જે ન્યાયાધીશોને બરતરફ કરવામાં આવ્યા છે તેઓ કેલિફોર્નિયા, ઇલિનૉઇસ, લ્યુઇસિયાના, મેરીલેન્ડ, મેસેચ્યુસેટ્સ, ન્યૂયોર્ક, ઓહાયો, ટેક્સાસ, યુટા અને વર્જિનિયાની ઇમિગ્રેશન અદાલતોમાં સેવા આપી રહ્યા હતા.
સંગઠનના પ્રમુખ, મેટ બિગ્સે, આ પગલાને “ખૂબ જ નિંદનીય અને જાહેર હિતની વિરુદ્ધ” ગણાવ્યું. તેમણે કહ્યું, “એ સંપૂર્ણપણે વાહિયાત છે કે એક તરફ, કોંગ્રેસે 800 નવા ઇમિગ્રેશન ન્યાયાધીશોની નિમણૂકને મંજૂરી આપી છે, અને બીજી તરફ, મોટી સંખ્યામાં ઇમિગ્રેશન ન્યાયાધીશોને કોઈ કારણ વગર દૂર કરવામાં આવી રહ્યા છે.” તેમણે ઉમેર્યું કે આ ન્યાયાધીશોને દૂર કરવાનો નિર્ણય એવા સમયે લેવામાં આવ્યો છે જ્યારે ટ્રમ્પ વહીવટીતંત્રની કડક ઇમિગ્રેશન નીતિઓ હેઠળ અધિકારીઓ મોટી સંખ્યામાં વિદેશી નાગરિકોની ધરપકડ કરી રહ્યા છે અને પીડિત પક્ષો કોર્ટમાં ન્યાય માંગી રહ્યા છે.
ટ્રમ્પના વિરોધમાં થતા હતા નિર્ણયો
ભલે ટ્રમ્પ પ્રશાસને જજોને હટાવવાનું કોઈ સત્તાવાર કારણ ન આપ્યું હોય, પરંતુ વ્યાપકપણે એવું માનવામાં આવે છે કે આ તેમની ડિપોર્ટેશન નીતિને વધુ ઝડપી બનાવવા માટેનું એક કડક પગલું છે. ટ્રમ્પ પ્રશાસનના આદેશ પર મે મહિનાથી જ ઈમિગ્રેશન એન્ડ કસ્ટમ્સ એન્ફોર્સમેન્ટ (ICE) અધિકારીઓ અદાલતોની બહારથી પણ પ્રવાસીઓની ધરપકડ કરી રહ્યા છે. જોકે, ઘણીવાર ન્યાયાધીશો આવા કેસોને રદ કરી દેતા હતા અથવા કેટલીકવાર અદાલતોએ ટ્રમ્પની આ ઇમિગ્રેશન નીતિઓને ગેરકાયદેસર ઠેરવીને તેના પર રોક લગાવી હતી. આવી સ્થિતિમાં, ટ્રમ્પ પ્રશાસનની આ કાર્યવાહી તે અગાઉના ચુકાદાઓનું જ પરિણામ માનવામાં આવી રહી છે.
