વડોદરા શહેરમાં બપોર બાદ અડધા કલાકમાં 2 ઇંચ વરસાદ ખાબકતા નિચાણવાળા વિસ્તારોમાં પાણી ભરાઇ ગયા હતા. સાંજે પણ અડધા કલાકમાં 1 ઈંચ વરસાદ ખાબકી ગયો છે અને હજુ વરસાદ પડી રહ્યો છે. શહેરમાં કુલ 3 ઈંચ વરસાદ પડ્યો છે. જેના કારણે સામાન્ય લોકોને ભારે હાલાકી ભોગવવાનો વારો આવ્યો હતો. બપોર પછી ધોધમાર વરસાદ થતાં શહેરના અનેક વિસ્તારોમાં ઘૂંટણસમા પાણી ભરાઈ ગયા છે. શહેરના રેલવે સ્ટેશન પાસે આવેલા ગરનાળામાં પણ ભારે વરસાદના પગલે પાણી ભરાઈ ગયું હતું. તો બીજી તરફ ભીમનાથ ઓવરબ્રિજ પર ભારે ટ્રાફિક જામના દ્રશ્યો જોવા મળ્યા હતા.
સાંજે પણ મેઘરાજાની જમાવટ
વડોદરા શહેર અને જિલ્લામાં સાંજે પ્રચંડ ગાજવીજ અને વાવાઝોડા સાથે ભારે વરસાદ પડ્યો છે. વડોદરા શહેરમાં અડધો કલાકમાં એક ઇચ જેટલો વરસાદ પડ્યો છે. સમગ્ર શહેર જળબંબાકારની સ્થિતિ સર્જાઈ છે. જ્યારે નોકરી ધંધાથી ઘરે જઈ રહેલા લોકો રસ્તામાં જ અટવાયા હતા. નિચાણવાળા વિસ્તારોમાં પાણી ભરાયા છે.
ભારે પવન સાથે વરસાદ વરસ્યો
વડોદરા શહેરમાં આજે બપોર બાદ ભારે પવન સાથે ધોધમાર વરસાદ શરૂ થયો હતો. વડોદરાના નીચાણવાળા વિસ્તારોમાં પાણી ભરાઇ ગયા હતા. જેને પગલે લોકોને મુશ્કેલીનો સામનો કરવો પડ્યો હતો. આજે વહેલી સવારથી વડોદરા શહેરના વાતાવરણમાં પલટો આવ્યો હતો. જોકે બપોર બાદ ભારે પવન ફૂંકાવાની શરૂ થયો હતો અને ભારે વરસાદ પણ શરૂ થઈ ગયો હતો. વડોદરા શહેરના માંડવી મંદિર રાવપુરા કારેલીબાગ ફતેગંજ અને અલકાપુરી સહિતના અનેક વિસ્તારોમાં રસ્તા પર પાણી ભરાઇ ગયા હતા તેને કારણે વાહનચાલકોને ભારે મુશ્કેલીનો સામનો કરવો પડ્યો હતો.
વડોદરાના રેલવે સ્ટેશન પાસે આવેલા અલકાપુરી ગરનાળામાં થોડા વરસાદમાં પણ પાણી ભરાઈ જતું હોય છે, ત્યારે વડોદરામાં બપોર પછી થયેલા ભારે વરસાદના પગલે ગરનાળામાં પાણી ભરાઇ ગયું હતું. જેના કારણે વાહન ચાલકોને ભારે મુશ્કેલીનો સામનો કરવો પડ્યો હતો. આ ઉપરાંત વડોદરા શહેરના નીચાણવાળા વિસ્તારોમાં પાણી ભરાયા હતા. જેના કારણે અવર જવર કરવામાં લોકોને મુશ્કેલીનો સામનો કરવો પડ્યો હતો.
દર વર્ષે ચોમાસામાં ગરનાળામાં પાણી ભરાવાની સમસ્યા સર્જાય છે. તેમ છતાં ગરનાળામાં ભરાતાં વરસાદી પાણીનો યોગ્ય નિકાલ થાય તે માટે તંત્ર દ્વારા કોઈ યોગ્ય પગલા લેવામાં આવતાં નથી. જેના કારણે નાગરિકોને હાલાકી ભોગવવાનો વારો આવે છે.
રાજ્યમાં 6 જિલ્લામાં ઓરેન્જ એલર્ટ અને 20 જિલ્લામાં આજે યલો એલર્ટ આપવામાં આવ્યું છે. રાજ્યમાં આગામી પાંચ દિવસ ભારે વરસાદ થવાની પણ આગાહી કરવામાં આવી છે. ભારેથી અતિભારે વરસાદની આગાહી વચ્ચે અમદાવાદમાં આજે વહેલી સવારે 6 વાગ્યાથી કડાકાભડાકા અને ઠંડા પવન સાથે ભારે વરસાદ પડ્યો હતો. વહેલી સવારે માત્ર પશ્ચિમ વિસ્તારમાં અડધો કલાક વરસાદ પડ્યો હતો, જેમાં ચાંદખેડામાં 1 ઇંચ, ગોતા અને સોલામાં અડધો ઇંચ જેટલો વરસાદ પડ્યો હતો.
