VADODARA: વિશ્વામિત્રી પ્રોજેક્ટની કામગીરી વડોદરા કોર્પોરેશન બે એન્જિનિયરને સોંપી

વડોદરાની વિશ્વામિત્રી નદીનો આરંભ થાય છે તે સ્થળ પાવાગઢથી અંતિમ છેડા ઢાઢર નદી સુધીના વિસ્તારનો સર્વગ્રાહી વિકાસ કરવાના આયોજનને ઓપ આપવા માટે તાજેતરમાં મુખ્યમંત્રીએ સુચના આપી હતી. ગાંધીનગરમાં વિશ્વામિત્રી પ્રોજેકટ અંગે રજૂ થયેલા પ્રેઝન્ટેશનમાં મુખ્યમંત્રીએ વડોદરા કોર્પોરેશનને જલ્દી આ પ્રોજેક્ટ માટે વિગતવાર રિપોર્ટ તૈયાર કરીને કેન્દ્ર સરકારમાં સહાય માટે રિપોર્ટ રજૂ કરવા પણ કહ્યું હતું એ પછી વડોદરા કોર્પોરેશનમાં સંસદ સભ્ય અને ધારાસભ્યોની મળેલી સંકલન સમિતિમાં વિશ્વામિત્રી પ્રોજેકટ અંગે ચર્ચા થઈ હતી અને વિગતવાર પ્રોજેક્ટ રિપોર્ટ તૈયાર કરીને સરકારની મંજુરી મેળવી વહેલી તકે આ પ્રોજેક્ટને લગતી કામગીરી શરૂ કરવા કહ્યું હતું. દરમિયાન વડોદરા કોર્પોરેશનના ડેપ્યુટી કમિશનરે એક પરિપત્ર જારી કરીને જણાવ્યું છે કે કોર્પોરેશનના ફ્યૂચરિસ્ટિક સેલ દ્વારા અગાઉ વિશ્વામિત્રી રિવરફ્રન્ટ ડેવલપમેન્ટ કોર્પોરેશનની વિગતવાર રિપોર્ટ બનાવવાની કામગીરી કરાઈ છે તેથી હવે પણ આ કામગીરીમાં એકસૂત્રતા જળવાઈ રહે તે માટે આ સેલમાં ફરજ બજાવતા કાર્યપાલક એન્જિનિયર અને નાયબ કાર્ય પાલક એન્જિનિયરે વિશ્વામિત્રી પ્રોજેકટની જરૂરી કાર્યવાહી કરવાની રહેશે.