વલભીપુરમાં સમરસતાનો અનોખો પંથ
ભાવનગર જિલ્લાના વલભીપુર ખાતે વાલ્મિકી સમાજ દ્વારા દર વર્ષે શ્રાવણ માસના પ્રથમ બુધવારે મહાદેવને જળ ચઢાવવાનો અને ધ્વજારોહણનો ભવ્ય કાર્યક્રમ યોજાય છે. આ યાત્રા માત્ર ભક્તિનો નહિ પરંતુ સમાજિક સમરસતાનો જીવંત પ્રતીક બની રહી છે.
ભક્તિ યાત્રામાં ઉમટ્યું ભાવનાનું મોજું
આ વર્ષે પણ વાલ્મિકી સમાજના લોકો ઢોલ-નગારા સાથે “જય મહાદેવ”ના ઘોષ સાથે યાત્રા કાઢી, જેમાં સમગ્ર સમુદાય પગપાળા મહાદેવના મંદિરે પહોંચી ગયા હતા…. મુખ્ય બજાર અને હાઈવે માર્ગે રેલીની ભવ્ય ઝાંખી જોવા મળી. મંદિર પરિસરમાં ધ્વજારોહણ બાદ રાસ-ગરબાનો સંગીતમય માહોલ છવાઈ ગયો.
મહાદેવના દર્શનથી અનુભવ્યો આત્મીય શાંતિનો અહેસાસ
સમાજના સભ્યો જણાવે છે કે, પ્રગટેશ્વર મહાદેવના દર્શન કર્યા પછી એક અદભૂત શાંતિ અને ધન્યતા અનુભવાય છે. પૂનમબેન સહિત અનેક મહિલા સભ્યો પણ આ ઉજવણીમાં જોડાયા અને કહ્યું કે આજનો દિવસ અમારા માટે સોનાથી પણ વધુ કિંમતી છે.
કોઈ ભેદભાવ નહીં, માત્ર ભક્તિ અને ભાવે સમરસતા
મંદિરના મુખ્ય પૂજારી વિપુલગીરી ગોસાઈએ જણાવ્યું હતું કે, “આ કાર્યક્રમમાં કોઈ જાતિ કે જ્ઞાતિનો ભેદ નથી. અહીં હ્રદયપૂર્વકના ભાવથી બધા ભક્તો ભેગા થાય છે, અને આ ભક્તિની ઉજવણી ગુજરાત માટે ગૌરવની વાત છે.”
દીકરીઓની ભાગીદારી અને પ્રેરણાદાયક પહેલ
પૂનમબેન જેવી મહિલાઓનું યોગદાન પણ ખાસ નોંધપાત્ર રહ્યું. તેમણે જણાવ્યું કે સમાજના લોકો હવે ભક્તિ માટે પણ પહેલ કરી રહ્યા છે અને દર્શન તેમજ જળાભિષેક દ્વારા મહાદેવના આશીર્વાદ લે છે.
વાલ્મિકી સમાજની આ અનોખી પરંપરા એક આધ્યાત્મિક પ્રસંગથી વધુ બની ગઈ છે — એ સમાનતા, ભક્તિ અને એકતા તરફ આગળ વધવાનો માર્ગ છે. સમાજમાં ભક્તિ દ્વારા સમરસતા સ્થાપિત થાય તેવા કાર્યક્રમો આજે ખૂબ જ મહત્વના બની રહ્યા છે.
