વાપી :- વાપીમાં કાર્યરત વેલસ્પન ઇન્ડિયા લિમિટેડ કંપનીમાં ઝારખંડની યુવતીઓ ફસાઈ હોવાનું અને તેમને મદદ કરવામાં આવે તેવી અધૂરી માહિતી સાથે ઝારખંડના ધારાસભ્યએ કરેલા એક ટ્વીટથી વલસાડ વહીવટીતંત્ર, પોલીસ વિભાગ અને કંપની સંચાલકો નાહકના દોડતા થયા હતાં. જો કે સમગ્ર મામલે અહીં યુવતીઓને તમામ સુવિધાઓ આપવામાં આવતી હોવાનું અને 127 યુવતીઓમાંથી માત્ર 22 યુવતીઓ જ ઘરે જવા તૈયાર થતા તેમને વાપીથી ટ્રેનમાં વતન રવાના કરવામાં આવી હતી.
વાપી નજીક મોરાઈ ગામે આવેલ વેલસ્પન ઇન્ડિયા લિમિટેડ કંપનીમાંથી ઝારખંડ ના જમશેદપુરના પોટકાની 22 યુવતીઓને ફૂડ પેકેટ્સ આપી ટ્રેનની ટીકીટ કઢાવી આપી વતન રવાના કરાઈ હતી. જો કે આ ઘટનાએ એક અધૂરી માહિતીના ટ્વીટને લઈને કેવી મુસીબત સર્જી શકે છે તેનું ઉદાહરણ પણ પૂરું પાડ્યું હતું. હકીકતમાં આ યુવતીઓમાંથી કોઈ એક બે યુવતીઓએ ઝારખંડના બહારાગોરાના પૂર્વ ધારાસભ્ય કુણાલ ષાડગીને, પોટકાના ધારાસભ્ય સંજીબ સરદારને ટ્વિટ અને વોટ્સએપ મેસેજ કર્યો હતો કે તેઓ વતન આવવા માંગે છે તે માટે કોઈ વ્યવસ્થા ના હોય અહીં ફસાયેલ છે. આ ટ્વીટની વિગતો ઝારખંડના મુખ્યમંત્રી પાસે પહોંચી અને તે બાદ ગુજરાતના CID ક્રાઈમ ના ડૉ શમશેર સિંહ પાસે જેઓએ તાત્કાલિક આ અંગે વલસાડ જિલ્લા પોલીસ સાથે વાત કરી સ્થાનિક પોલીસને કંપનીમાં મોકલી તપાસ કરતા હકીકત કઈંક જુદી જ સામે આવી હતી જેમાં 127 યુવતીઓમાંથી માત્ર 49 યુવતીઓ જ વતન જવા માંગતી હોય તમામને વતન મોકલવાની વ્યવસ્થા તંત્રએ અને કંપની સંચલોકોએ હાથ ધરી હતી. ત્યારે છેલ્લી ઘડીએ માત્ર 22 યુવતીઓ જ વતન જવા તૈયાર થઈ હતી. બાકીની યુવતીઓએ વતન જવાનું મુલતવી કરી દીધું હતું. વતન જવા નીકળેલી યુવતીઓએ આ અંગે કંપનીનો આભાર માની અહીં રહેવાથી માંડીને પગાર સહિતની તમામ સુવિધાઓ ખૂબ જ સારી હોવાનું જણાવ્યું હતું.
તો, આ સમગ્ર ઘટના અંગે વેલસ્પન કંપનીના HR મેનેજર બ્રિજેશ શર્માએ જણાવ્યું હતું કે કંપનીમાં કોઈ જ યુવતી કે કામદાર ફસાયા નથી. કંપની તરફથી તમામને રહેવાની અને અન્ય તમામ સુવિધાઓ પુરી પાડવામાં આવે છે. સમયસર પગાર પણ ચુકવવામાં આવે છે. કોરોના જેવી મહામારી દરમ્યાન સોશ્યલ ડિસ્ટન્સ, માસ્ક, સેનેટાઇઝ સહિતના તમામ નિયમોનું પાલન કરવામાં આવે છે. પરંતુ કોઈકના બહેકાવવામાં આવી જઇ કોઈ યુવતીએ આ ટ્વીટ કર્યું હતું જે બાદ અમે જે યુવતીઓ વતન જવા માંગે છે તે તમામની ટ્રેન ટીકીટ કઢાવી આપી, પ્રવાસ દરમ્યાન ફૂડ પેકેટ્સ આપી, આરોગ્ય ચકાસણી કરી ટ્રેનમાં વતન રવાના કરી છે.
ઉલ્લેખનીય છે કે આ ટ્વીટ 130 યુવતીઓ ફસાયેલ હોવાની વિગતો ઝારખંડ ના ધારાસભ્યએ આપી હતી. જે તપાસ બાદ અહીં તમામ સુવિધાઓ પુરી પાડવામાં આવતી હોવાનું ફલિત થયું હતું. અને માત્ર 22 યુવતીઓ જ વતન જવા તૈયાર થઈ હતી. જો કે ઝારખંડના ધારાસભ્યએ આ અંગે સોનુ સુંદને પણ ટ્વીટ અને મેસેજ કરી કાચું કાપ્યું હતું. જેને લઈને વલસાડ વહીવટીતંત્ર, પોલીસતંત્ર અને કંપનીના સંચાલકોને નાહકના દોડતા કર્યા હતાં.