VALSAD: નીરા મંડળીમાં ‘ગોબચારી’ આચરનારાઓ પાસે 20.63લાખ વસૂલવા આદેશ

મંડળીના ખેરના વૃક્ષો કાપી નાખી બારોબાર વેચી મારવાનું પ્રકરણ બહાર આવ્યું. વલસાડમાં ગેરરીતિના મામલા બહાર આવતા રહેતા હોય છે ત્યારે નીરા મંડળીમાં પણ વધુ એક કૌભાંડ બહાર આવ્યું છે. વલસાડ તાલુકા નીરા તાડગોળ મંડળીની મગોદ ખાતે આવેલી જમીનના અનામત ખૈર અને વૃક્ષો કાપી વેચી મારવાના મામલામાં મંડળીઓના રજિસ્ટ્રારે માજી ઉપપ્રમુખ અને માજી મંત્રી પાસેથી રૂ.20.63 લાખની વસુલાત કરવાનો હુકમ કર્યો છે. આ સાથે વ્યવસ્થાપક કમિટિના માજી સભ્યોને પણ 1 ટર્મ સુધી મંડળીની ચૂંટણી માટે ગેરલાયક ઠેરવવામાં આવ્યા છે. વિગતો મુજબનીરા તાડગોળ ઉત્પાદક સહકારી મંડળીની વલસાડના મગોદ ફાર્મમાં અનામત ખેર અને સાદડા અને બિનઅનામત બાવળના વૃક્ષો કાપી તેના લાકડા વેચાણ કરવા મંડળીએ 2 માર્ચ 2016ના રોજ જાહેરાત આપી ટેન્ડરો મંગાવી કોન્ટ્રાકટ અપાયો હતો. 2016-17ના વર્ષના ઓડિટમાં સ્પેશ્યિલ ઓડિટર સહકારી મંડળી(ઉદ્યોગ) સુરત દ્વારા મંડળીના મગોદ ફાર્મના ઝાડ કાપી લાકડા વેચાણમાં ગેરરિતી થતાં મંડળીને આર્થિક નુકસાનની જવાબદારી નક્કી કરવા ગુજરાત સહકરી મંડળીઓના અધિનિયમ 1961ની કલમ-86 હેઠળ કાર્યવાહી કરવા અહેવાલ રજૂ કરાયો હતો. સહકારી મંડળીઓના રજિસ્ટ્રાર દ્વારા જવાબદારોને શોધી કાઢવા માટે મંડળીના આ પ્રકરણની તપાસ હાથ ધરવા ચોકસી અધિકારીની નિયુક્તિ કરાઇ હતી.જેમાં વેચાણમાં ગેરરિતી અને આર્થિક નુકસાન બહાર આવ્યું હતું.ચોકસી અધિકારી બી.એ.પટેલે આ મામલે અહેવાલ રજિસ્ટ્રાર સમક્ષ રજૂ કર્યો હતો.જેમાં તથ્ય જણાતા આ મંડળીના માજી ઉપપ્રમુખ ભગુ બાવાભાઇ પટેલ રહે.નાનીસરોણને નુકસાન પેટે 10,31,798 અને માજી મંત્રીગણપત ઉકાભાઇ પટેલને પણ 10,31,798 મળી કુલ 20,63,596ની વસુલાત કરવા સહકારી મંડળીઓના રજિસ્ટ્રાર એચ.બી.પટેલે હુકમ કરતા આ કિસ્સા એ સબંધીતોમાં ભારે ચકચાર જગાવી છે.