વલસાડ જિલ્લા કક્ષાના પ્રજાસત્તાક પર્વની ઉજવણી વલસાડ ખાતે થશે પ્રજાસત્તાક પર્વની ઉજવણી સંદર્ભે બેઠક મળી

માહિતી બ્‍યૂરોઃ વલસાડ :તા.૧૫: વલસાડ જિલ્લા કક્ષાના આગામી પ્રજાસત્તાક પર્વની ઉજવણી વલસાડ ખાતે કરવામાં આવનાર છે. આ ઉજવણીના સુચારુ આયોજન સંદર્ભે જિલ્લા કલેકટર સી.આર.ખરસાણના અધ્‍યક્ષસ્‍થાને કલેકટર કચેરી ખાતે યોજાયેલી બેઠકમાં પોલીસ હેડકવાર્ટર ગ્રાઉન્‍ડ-વલસાડ ખાતે ધ્‍વજવંદન કાર્યક્રમનો નિર્ણય સર્વાનુમતે કરવામાં આવ્‍યો હતો. બેઠકમાં પ્રજાસત્તાક પર્વ ઉજવણી દરમિયાન વિવિધ વિભાગોએ કરવાની થતી કામગીરી બાબતે વિસ્‍તૃત ચર્ચા-વિચારણા કરવામાં આવી હતી. સ્‍વાતંત્ર્ય સેનાનીઓનું સન્‍માન, રંગારંગ સાંસ્‍કૃતિક કાર્યક્રમો, સરકારી મકાનોમાં રોશની, ટેબ્‍લોઝ, માર્ચ પાસ્‍ટ, શ્રેષ્‍ઠ કામગીરી બદલ રમતવીરો, અધિકારી, કર્મચારીઓનું સન્‍માન સહિતનું આયોજન પણ કરાયું હતું. આ અવસરે જિલ્લા વિકાસ અધિકારીશ્રી ગૌરાંગ મકવાણા, નાયબ જિલ્લા પોલીસ અધિક્ષકશ્રી એલ.બી.ઝાલા, નિવાસી અધિક કલેકટર શ્રી આઇ.જે.માલી, પ્રાયોજના વહીવટદારશ્રી ચુડાસમા સહિત અમલીકરણ અધિકારીઓ હાજર રહ્યા હતા.