રડાવી દે તેવી હાલત! સચિન તેંડુલકરના બાળપણના યાર વિનોદ કાંબલીનો વીડિયો જોઈ ફેંક્સ હેરાન!
ભારતીય ક્રિકેટ જગતના દિગ્ગજ અને સચિન તેંડુલકરના બાળપણના ખાસ મિત્ર વિનોદ કાંબલી હાલમાં ફરી એકવાર ચર્ચામાં આવ્યા છે. સોશિયલ મીડિયા પર તેમનો એક વીડિયો સામે આવ્યો છે, જેમાં તેઓ એક કેર સેન્ટર (ઓલ્ડ-એજ હોમ કે કેર સેન્ટર)માં નજરે પડી રહ્યા છે. આ વીડિયો જોયા પછી ક્રિકેટ જગત અને તેમના પ્રશંસકોમાં થોડી ચિંતા ફેલાઈ ગઈ છે, કારણ કે વીડિયોમાં વિનોદ કાંબલીનો અવાજ અને બોલવાની રીત થોડી લથડતી એટલે કે અસ્પષ્ટ દેખાઈ રહી છે. જો કે, આ બધી બાબતો વચ્ચે રાહતની વાત એ છે કે વિનોદ કાંબલી ખુદ આ વીડિયોમાં ત્યાંની સુવિધાઓ અને સચવાતી કાળજી અંગે ખૂબ જ હકારાત્મક વાત કરી રહ્યા છે.
વીડિયોમાં શું કહ્યું વિનોદ કાંબલીએ?
આ વાયરલ વીડિયોની શરૂઆત કરતા વિનોદ કાંબલી પોતાનો પરિચય આપે છે અને કહે છે કે તેઓ હાલમાં ‘નિદાન’ નામના કેર સેન્ટરમાં છે. તેઓ આ સેન્ટર દ્વારા પૂરી પાડવામાં આવતી સેવાઓની મુક્તકંઠે પ્રશંસા કરે છે. વીડિયોમાં તેઓ ખાસ કરીને ત્યાંની સ્વચ્છતા (હાઇજીન) અને એકંદરે ઉપલબ્ધ સુવિધાઓનો ઉલ્લેખ કરે છે અને તેને ઉત્તમ ગણાવે છે.
Vinod Kambli’s latest video, he is presently at an elderly care centre in Thane.
Praying for his recovery soon. https://t.co/6k1plg1aCl
— Abhishek ✨ (@ImAbhishek7_) September 25, 2026
‘ઘરથી દૂર હોવાનો અહેસાસ થતો નથી’
વિનોદ કાંબલી આગળ વાત કરતા જણાવે છે કે તેમને આ કેર સેન્ટરમાં જે પ્રકારની સારવાર અને કાળજી મળી રહી છે, તેનાથી તેઓ ખૂબ જ સંતુષ્ટ છે. તેમણે ભાવનાત્મક રીતે કહ્યું કે આ વાતાવરણમાં રહ્યા પછી તેમને જરાય એવું અનુભવાતું નથી કે તેઓ પોતાના ઘરથી દૂર કોઈ અજાણી જગ્યાએ છે. તેમણે એવું પણ ઉમેર્યું કે તેમને અહીં આસપાસના લોકો તરફથી ખૂબ જ પ્રેમ અને સ્નેહ મળી રહ્યો છે. વીડિયોના અંતમાં તેઓ પોતાના તમામ પ્રશંસકોનો આભાર માને છે. આ વીડિયો સામે આવ્યા બાદ સોશિયલ મીડિયા પર તેમના ચાહકો સતત ચિંતા વ્યક્ત કરી રહ્યા છે અને ભૂતપૂર્વ ક્રિકેટરના સારા સ્વાસ્થ્ય માટે પ્રાર્થના કરી રહ્યા છે.
વિનોદ કાંબલીની શાનદાર આંતરરાષ્ટ્રીય ક્રિકેટ કારકિર્દી
વિનોદ કાંબલીની ક્રિકેટ સફર પર નજર કરીએ તો, તેમણે વર્ષ 1991માં પાકિસ્તાન સામે પોતાની આંતરરાષ્ટ્રીય કારકિર્દીની શરૂઆત કરી હતી. તેમણે ભારત માટે ટેસ્ટ અને વનડે (ODI) મળીને કુલ 121 મેચોમાં પ્રતિનિધિત્વ કર્યું હતું.
ટેસ્ટ ક્રિકેટ: કાંબલીએ 17 ટેસ્ટ મેચ રમી હતી, જેમાં તેમણે 54.20 ની શાનદાર સરેરાશથી 1,084 રન બનાવ્યા હતા. આ દરમિયાન તેમના બેટમાંથી 4 સદી અને 3 અડધી સદી નીકળી હતી. ટેસ્ટ ક્રિકેટમાં તેમનો સર્વોચ્ચ સ્કોર 227 રનનો હતો, જે તેમણે દિલ્હીમાં ઝિમ્બાબ્વે સામે બનાવ્યો હતો.
વનડે ક્રિકેટ: આ ઉપરાંત, તેમણે 104 વનડે મેચોમાં 32.59 ની એવરેજથી 2,477 રન બનાવ્યા હતા. વનડે ફોર્મેટમાં તેમના નામે 2 સદી અને 14 અડધી સદી નોંધાયેલી છે.
ઘરેલુ ક્રિકેટમાં બનાવ્યા હતા મોટા રેકોર્ડ્સ
આંતરરાષ્ટ્રીય સ્તર ઉપરાંત ઘરેલુ ક્રિકેટમાં પણ વિનોદ કાંબલીનું પ્રદર્શન અત્યંત શાનદાર રહ્યું હતું. તેમણે 129 પ્રથમ શ્રેણીની (ફર્સ્ટ ક્લાસ) મેચોની 181 ઇનિંગ્સમાં કુલ 9,965 રન બનાવ્યા હતા. આ ઉપરાંત, લિસ્ટ-એ ક્રિકેટમાં તેમણે 221 મેચો રમીને 6,476 રન બનાવ્યા હતા, જેમાં 11 સદી અને 35 અડધી સદી સામેલ છે. પોતાની પ્રતિભા અને આક્રમક બેટિંગ શૈલીના કારણે તેઓ એક સમયે ભારતીય ક્રિકેટના ઉગતા સિતારા સમાન હતા, અને આજે પણ લોકો તેમને એક ઉત્તમ બેટ્સમેન તરીકે યાદ કરે છે.
