સાડી પહેરીને ‘હિપ-હોપ’નો આવો ફ્યુઝન ક્યારેય નહીં જોયો હોય! દેશી ગર્લના ઠુમકાએ વિદેશમાં મચાવી ધૂમ
કલાની કોઈ સીમા હોતી નથી અને આ વાતને ભારતની પ્રતિભાશાળી ડાન્સર હરિણીએ સાબિત કરી બતાવી છે. તાજેતરમાં અમેરિકાના લાસ વેગાસમાં આયોજિત ‘રેડ બુલ ડાન્સ યોર સ્ટાઈલ’ સ્પર્ધામાં હરિણીએ એવો પરફોર્મન્સ આપ્યો કે લોકો જોતા જ રહી ગયા. સાડી સજ્જ આ યુવતીએ ભારતીય સંસ્કૃતિ અને વેસ્ટર્ન ડાન્સનું જે મિશ્રણ રજૂ કર્યું છે, તેના વીડિયોએ અત્યારે સોશિયલ મીડિયા પર તહલકો મચાવ્યો છે.
ભરતનાટ્યમ અને હિપ-હોપનું અદભૂત સંગમ
વાયરલ થઈ રહેલા આ વીડિયોમાં જોઈ શકાય છે કે, પરંપરાગત સાડી પહેરીને હરિણીએ જ્યારે ભારતીય શાસ્ત્રીય નૃત્ય ‘ભરતનાટ્યમ’ની મુદ્રાઓને હિપ-હોપના બીટ્સ સાથે મિક્સ કરી, ત્યારે આખું ઓડિટોરિયમ તાળીઓના ગડગડાટથી ગુંજી ઉઠ્યું હતું. શાસ્ત્રીય નૃત્યની ગરિમા અને હિપ-હોપની એનર્જીનું આવું અનોખું જોડાણ ભાગ્યે જ જોવા મળે છે. સોશિયલ મીડિયા યુઝર્સ તેના આ અંદાજને ‘Ate and left no crumbs’ (એટલે કે સંપૂર્ણપણે છવાઈ જવું) કહીને નવાજી રહ્યા છે.
સાડીમાં મુશ્કેલ સ્ટેપ્સ જોઈ વિદેશીઓ દંગ
વીડિયોની સૌથી ખાસ વાત એ છે કે, હરિણીએ સાડી પહેરી હોવા છતાં અત્યંત મુશ્કેલ ગણાતા હિપ-હોપ સ્ટેપ્સ અને ટ્વર્કિંગ એટલી સહજતાથી કર્યા કે વિદેશી પ્રેક્ષકો પણ આશ્ચર્યચકિત થઈ ગયા હતા. વિદેશી ધરતી પર ભારતીય કલ્ચરના આ આધુનિક અવતારનું લોકોએ ઉષ્માભર્યું સ્વાગત કર્યું હતું. સાડીમાં આટલી સ્ફૂર્તિથી ડાન્સ કરવો એ કોઈ સામાન્ય વાત નથી, જે હરિણીએ કરી બતાવી છે.
View this post on Instagram
સોશિયલ મીડિયા પર બે ભાગમાં વહેંચાયા યુઝર્સ
વીડિયો વાયરલ થતાની સાથે જ કોમેન્ટ સેક્શનમાં નેટિઝન્સના બે જૂથો જોવા મળી રહ્યા છે.
- પ્રશંસકો: એક પક્ષે લખ્યું કે, “તમારા મુવ્સ લાજવાબ છે, તમે ભારતનું નામ રોશન કરી રહ્યા છો.” બીજા એક યુઝરે કહ્યું, “હિપ-હોપ અને ક્લાસિકલ ડાન્સનું આવું ફ્યુઝન પહેલા ક્યારેય નથી જોયું.”
- વિરોધ કરનારા: બીજી તરફ, કેટલાક લોકોએ આ મિશ્રણ સામે વાંધો ઉઠાવ્યો છે. તેમનું માનવું છે કે શાસ્ત્રીય નૃત્ય પવિત્ર છે અને તેને વેસ્ટર્ન સ્ટાઈલ સાથે મિક્સ કરવું એ પરંપરાનું અપમાન છે. તેમણે ભારતીય સંસ્કૃતિની મર્યાદા જાળવી રાખવાની અપીલ કરી છે.
વિવાદો પોતાની જગ્યાએ છે, પરંતુ એ વાતમાં કોઈ શંકા નથી કે હરિણીએ પોતાના અનોખા ટેલેન્ટથી વૈશ્વિક મંચ પર દરેકનું ધ્યાન ખેંચ્યું છે. કુશળતા અને આત્મવિશ્વાસ હોય તો પરંપરાગત પહેરવેશમાં પણ દુનિયા જીતી શકાય છે, આ વીડિયો તેનું ઉત્તમ ઉદાહરણ છે.
