શું વિરાટ-રોહિતના ODI કરિયરનો અંત? ICC રેન્કિંગમાંથી બંનેના નામ ગાયબ
આંતરરાષ્ટ્રીય ક્રિકેટ કાઉન્સિલ (ICC) દ્વારા જાહેર કરાયેલ તાજેતરની ODI રેન્કિંગમાં એક ચોંકાવનારો ફેરફાર જોવા મળ્યો છે. ભારતના બે દિગ્ગજ બેટ્સમેન રોહિત શર્મા અને વિરાટ કોહલીના નામ ICC ODI રેન્કિંગમાંથી ગાયબ થઈ ગયા છે. આ બંનેના નામ માત્ર ટોપ-10માંથી જ નહીં, પરંતુ ટોપ-100માંથી પણ દૂર કરવામાં આવ્યા છે, જે ક્રિકેટ જગતમાં ચર્ચાનો વિષય બન્યો છે. જોકે બંનેએ ટેસ્ટ અને T20માંથી નિવૃત્તિ લીધી છે, તેઓ ODI રમવાનું ચાલુ રાખવાના છે. આને એક ટેકનિકલ ખામી માનવામાં આવી રહી છે, પરંતુ ઘણા ચાહકોનો દાવો છે કે લાંબા સમયથી કોઈ ODI મેચ ન રમવાને કારણે આ થયું છે
ટોપ-10 બેટ્સમેનની યાદીમાં ભારતની સ્થિતિ
આ મોટા ફેરફારો છતાં, ભારતના યુવા બેટ્સમેન શુભમન ગિલએ ટોપ-10ની યાદીમાં પોતાનું સ્થાન જાળવી રાખ્યું છે અને તે 784 રેટિંગ પોઈન્ટ સાથે નંબર વન પર યથાવત છે. ગિલ સિવાય, ભારતીય બેટ્સમેન શ્રેયસ ઐયર પણ 704 રેટિંગ પોઈન્ટ સાથે છઠ્ઠા સ્થાને છે.
વર્તમાન ICC ODI બેટ્સમેન રેન્કિંગ (ટોપ-5):
- શુભમન ગિલ (ભારત)
- બાબર આઝમ (પાકિસ્તાન)
- ડેરિલ મિશેલ (ન્યુઝીલેન્ડ)
- ચારિત્ર અસલંકા (શ્રીલંકા)
- હેરી ટ્રેક્ટર (આયર્લેન્ડ)
બોલરો અને ઓલરાઉન્ડર્સની રેન્કિંગ
બોલરોની રેન્કિંગમાં પણ મોટો ફેરફાર જોવા મળ્યો છે. દક્ષિણ આફ્રિકાના સ્પિનર કેશવ મહારાજ ઓસ્ટ્રેલિયા સામેની પ્રથમ વનડેમાં 5 વિકેટ લીધા બાદ બે સ્થાન આગળ વધીને 687 પોઈન્ટ સાથે નંબર વન પર પહોંચી ગયા છે. ભારતના સ્પિનર કુલદીપ યાદવ એક સ્થાન નીચે સરકીને ત્રીજા સ્થાને પહોંચી ગયા છે, જ્યારે શ્રીલંકાના મહેશ તીક્ષ્ણા બીજા સ્થાને સરકી ગયા છે. ઓલરાઉન્ડર્સની વાત કરીએ તો બાંગ્લાદેશના શાકિબ અલ હસન ટોચ પર છે, જ્યારે ભારતના હાર્દિક પંડ્યા અને રવિન્દ્ર જાડેજા ટોપ-10માં સામેલ છે.
આ નવા રેન્કિંગ્સ ક્રિકેટની દુનિયામાં ચાલી રહેલા બદલાવોને દર્શાવે છે, જ્યાં યુવા ખેલાડીઓ ટોપ પર આવી રહ્યા છે જ્યારે અનુભવી ખેલાડીઓનું સ્થાન નીચે જઈ રહ્યું છે.
