દિલ્હી પોલીસે મંજૂરી ન આપી છતાં CJP ના નેતાઓ દિલ્હી જવા રવાના: ‘જંતર-મંતર ૨.૦’ ના એલાનથી રાજધાનીમાં ચિંતા વધતાં હાઈ એલર્ટ
દેશની રાજધાની દિલ્હીમાં મુખ્ય ચૂંટણી કમિશનર (CEC) જ્ઞાનેશ કુમારના રાજીનામાની માંગ સાથે જંતર-મંતર ખાતે યોજાનારા પ્રસ્તાવિત વિરોધ પ્રદર્શનને લઈને રાજકીય અને કાનૂની વિવાદ વધુ ઘેરો બન્યો છે. દિલ્હી પોલીસ દ્વારા કાયદો અને વ્યવસ્થાની સ્થિતિ દર્શાવીને આ આંદોલનની પરવાનગી આપવાનો સ્પષ્ટ ઈનકાર કરી દેવામાં આવ્યો છે. આમ છતાં, ‘કોકરોચ જનતા પાર્ટી’ (CJP) ના મુખ્ય નેતા સૌરવ દાસે એક મોટી અને આક્રમક જાહેરાત કરીને વહીવટી તંત્રના શ્વાસ અધ્ધર કરી દીધા છે.
સૌરવ દાસે સોશિયલ મીડિયા પ્લેટફોર્મ પર જાહેરાત કરતા જણાવ્યું હતું કે, “હું તમને બધાને થોડા જ કલાકોમાં જંતર-મંતર અને તેની આસપાસના વિસ્તારમાં મળીશ. આ માત્ર એક દિવસનું પ્રદર્શન નથી પરંતુ એક અત્યંત લાંબી લડાઈ છે.”
“જનરલ-ઝેડ અને લોકશાહી બચાવવાનો આ જંગ છે”
પોલીસ કાર્યવાહી અને બેરિકેડિંગ વચ્ચે CJP નેતા સૌરવ દાસે અત્યંત ભાવુક અને આક્રમક પોસ્ટ શેર કરી હતી. તેમણે લખ્યું કે, “આ આપણા દેશને ફરીથી સાચા અર્થમાં પાછો મેળવવાની લડાઈ છે! આ આપણી લોકશાહીને બચાવવાનો જંગ છે. આપણી વર્તમાન પેઢી અને ખાસ કરીને જનરલ-ઝેડ (Gen-Z) યુવાનોના ભવિષ્યને સુરક્ષિત કરવા માટે આ લડાઈ લડવી જરૂરી બની ગઈ છે. મને મારી પેઢીના યુવાનો પર ખૂબ જ ગર્વ છે અને જ્યાં સુધી દેશમાં સંપૂર્ણપણે ભ્રષ્ટાચાર મુક્ત વ્યવસ્થા ઊભી નહીં થાય ત્યાં સુધી આ આંદોલન અટકશે નહીં.”
દરમિયાન, CJP ના સ્થાપક સભ્યો અભિજીત દીપક, આશુતોષ રંકા અને સૌરવ દાસ પ્રદર્શનનું નેતૃત્વ કરવા માટે મુંબઈથી દિલ્હી જવા રવાના થઈ ગયા છે. CJP એ પોતાના સત્તાવાર હેન્ડલ પરથી આકરા શબ્દોમાં દાવો કર્યો છે કે ‘જંતર-મંતર ૨.૦’ નો પ્રારંભ થઈ ચૂક્યો છે અને ચૂંટણી પ્રક્રિયામાં અનિયમિતતાઓને પ્રોત્સાહન આપવાનો કથિત સમય હવે પૂરો થઈ ગયો છે.
It’s a fight to reclaim our country!
It’s a fight to save our democracy!
It’s a fight for the future of us Gen-Zs!
Incredibly proud of my generation. We will fight till we ensure a corruption-free system. See you all in and around Jantar Mantar in a few hours! It’s a long fight. 🇮🇳❤️✊🏻🪳
#CockroachesAssemble
— Saurav Das (@SauravDassss) October 10, 2026
જંતર-મંતર પર ચાર સ્તરનું બેરિકેડિંગ અને કડક પાબંદીઓ
સીજેપીના આ લડાયક વલણને ધ્યાનમાં રાખીને દિલ્હી પોલીસે જંતર-મંતર અને તેની આસપાસના વિસ્તારોને કિલ્લામાં ફેરવી દીધા છે. સમગ્ર વિસ્તારમાં ચાર સ્તરનું મજબૂત બેરિકેડિંગ ખડકી દેવામાં આવ્યું છે. દિલ્હીની તમામ સરહદો પર આવતા-જતા વાહનોનું સઘન ચેકિંગ થઈ રહ્યું છે.
પોલીસ દ્વારા સતત લાઉડસ્પીકર પર ભારતીય નાગરિક સુરક્ષા સંહિતા (BNSS) ની કલમ ૧૬૩ લાગુ કરવાની સત્તાવાર વિનંતીઓ અને જાહેરાતો કરવામાં આવી રહી છે. કાયદાનું ઉલ્લંઘન કરીને એકત્ર થનારા લોકો સામે સખત કાયદેસરના પગલાં લેવાની કડક ચેતવણી આપવામાં આવી રહી છે.
Milte hai fraaands! https://t.co/aEDEgDMU1m
— Ashutosh Ranka (@AshutoshRanka) October 10, 2026
ઈન્ટરનેટ સેવાઓ સ્થગિત અને વાહનવ્યવહાર પર અસર
રાજધાનીમાં સુરક્ષા સ્થિતિને જાળવી રાખવા માટે અંદાજે ૨૩,૦૦૦ જેટલા સુરક્ષા કર્મચારીઓ તૈનાત કરાયા છે. પ્રવાસીઓની સુરક્ષાને ધ્યાને રાખીને દિલ્હી મેટ્રોના ૪૫ જેટલા મહત્વપૂર્ણ સ્ટેશનો પર પ્રવેશ અને બહાર નીકળવાની સુવિધા અસ્થાયી રૂપે બંધ કરી દેવામાં આવી છે. આ ઉપરાંત નવી દિલ્હી અને હઝરત નિઝામુદ્દીન રેલવે સ્ટેશન તરફ આવતી-જતી કેટલીક મહત્વની મેલ અને એક્સપ્રેસ ટ્રેનો પણ રદ કરવામાં આવી છે.
જંતર-મંતરના આસપાસના ચાર કિલોમીટરના વિસ્તારમાં સોશિયલ મીડિયા પર અફવાઓ ફેલાતી અટકાવવા માટે તમામ મોબાઇલ ઇન્ટરનેટ સેવાઓ બંધ કરી દેવાઈ છે. CJP નેતાઓના દિલ્હી પહોંચવા પહેલા જંતર-મંતર વિસ્તાર છાવણીમાં ફેરવાઈ ગયો છે, ત્યારે વહીવટી તંત્ર અને પ્રદર્શનકારીઓ વચ્ચે સીધી ટક્કર થવાની આશંકા સેવાઈ રહી છે.
