શું છે NOPO શીલ્ડ? જે બનશે મોજતબા ખામેનેઈની સુરક્ષા કવચ; જાણો ‘બ્લેક ક્લેડ કિલ સ્ક્વોડ’ વિશે બધું જ
ઈરાનના નવા સુપ્રીમ લીડર આયતુલ્લા મોજતબા ખામેનેઈની સુરક્ષા માટે ઈરાને તેની સૌથી ખતરનાક અને એલિટ કાઉન્ટર-ટેરરિઝમ યુનિટ NOPO ને તૈનાત કરી દીધી છે. આ ફોર્સને ‘બ્લેક-ક્લેડ’ અથવા કાળા પોશાક વાળી ‘કિલ સ્ક્વોડ’ તરીકે ઓળખવામાં આવે છે. આ યુનિટને ઈરાની રિવોલ્યુશનરી ગાર્ડ (IRGC) કરતા પણ વધુ ઘાતક, ક્રૂર અને તાલીમબદ્ધ માનવામાં આવે છે.
નવા સુપ્રીમ લીડર માટે સુરક્ષા કવચ
અહેવાલ મુજબ, NCRI ના અધિકારી અલી સફાવીએ જણાવ્યું છે કે અલી ખામેનેઈના નિધન બાદ હવે NOPO મોજતબા ખામેનેઈની સુરક્ષા સંભાળશે. આ ફોર્સ અત્યારે નવા નેતાની અંગત સુરક્ષાની સાથે સાથે રાજકીય કેદીઓ ધરાવતી જેલોની આસપાસ પણ તૈનાત કરવામાં આવી છે, જેથી કોઈ પણ પ્રકારનો વિરોધ કે કેદીઓનો બળવો રોકી શકાય. તાજેતરમાં 28 ફેબ્રુઆરીએ મોજતબા પર હુમલો થયો હોવાની અફવાઓ ઉડી હતી, પરંતુ ઈરાની અધિકારીઓએ તેને નકારી કાઢી છે અને જણાવ્યું છે કે તેઓ અત્યંત સુરક્ષિત અને ગુપ્ત સ્થળે છે.
શું છે NOPO ફોર્સ?
NOPO નું પૂરું નામ ‘નિરી-એ વિઝે-યે પાસબાન-એ વિલાયત’ છે. આ દળની શરૂઆત 1991માં કરવામાં આવી હતી. આ ઈરાનની એક અત્યંત વિશિષ્ટ અને ઘાતક સ્પેશિયલ ફોર્સ છે.
- ઓળખ: આ દસ્તાના કમાન્ડો માથાથી પગ સુધી કાળા લિબાસ અને ગિયરમાં સજ્જ હોય છે, તેથી તેમને ‘બ્લેક ક્લેડ’ કહેવામાં આવે છે.
- મુખ્ય કાર્ય: મૂળભૂત રીતે આ એક આતંકવાદ વિરોધી અને બંધક બચાવ યુનિટ છે. આ ફોર્સ સીધી રીતે ઈરાનના સર્વોચ્ચ સુરક્ષા માળખા હેઠળ કામ કરે છે અને તેને દુનિયાની સૌથી કઠોર તાલીમ મેળવનારી તાકાતોમાં ગણવામાં આવે છે.
‘કિલ સ્ક્વોડ’ ની ખાસિયતો
આ યુનિટને ‘કિલ સ્ક્વોડ’ એટલા માટે કહેવામાં આવે છે કારણ કે તેમનો નિયમ ‘પહેલા શૂટ કરવું, પછી પ્રશ્ન પૂછવો’ હોવાનું મનાય છે. આ ફોર્સની વિશેષતાઓ નીચે મુજબ છે:
- કઠોર પસંદગી: આ યુનિટમાં જોડાવા માટે શારીરિક અને માનસિક કસોટીની સાથે ‘વૈચારિક વફાદારી’ (Ideological Loyalty) ની કસોટી સૌથી અઘરી હોય છે.
- આધુનિક હથિયારો: તેમની પાસે પશ્ચિમી અને રશિયન ટેકનોલોજીથી સજ્જ સ્નાઈપર રાઈફલ્સ, ટેક્ટિકલ ગિયર અને અત્યાધુનિક સર્વેલન્સ સાધનો હોય છે.
- છૂપી સુરક્ષા: મોજતબાની આસપાસ આ જવાનો માત્ર ગણવેશમાં જ નહીં, પરંતુ સાદા કપડામાં પણ તૈનાત રહે છે જેથી ભીડમાં છુપાયેલા જોખમને ઓળખી શકાય.
શા માટે NOPO ને જવાબદારી સોંપાઈ?
અયાતુલ્લા અલી ખામેનેઈની હત્યા બાદ ઈરાનમાં સુરક્ષાને લઈને ગંભીર ચિંતાઓ પેદા થઈ છે. રિપોર્ટ્સ મુજબ, કોઈ પણ સંભવિત બળવો, ઘૂસણખોરી કે વિદેશી હુમલાને નિષ્ફળ બનાવવા માટે મોજતબા ખામેનેઈ માટે આ ‘પર્સનલ પ્રોટેક્શન યુનિટ’ એટલે કે ‘શીલ્ડ’ તૈયાર કરવામાં આવી છે. આ દળ પોતાની આક્રમક રણનીતિ અને દુશ્મનોને જડમૂળથી ખતમ કરવાની ક્ષમતા માટે પ્રખ્યાત છે.
