સીરિયામાં ઇઝરાયલના હુમલામાં એક સૈનિકનું મોત થયું હતું. આ હુમલામાં ત્રણ સૈનિકો ઘાયલ થયા હતા. સીરિયાની સરકારી સમાચાર એજન્સી સનાએ બુધવારે જણાવ્યું હતું કે ઇઝરાયલની સેનાએ ઇરાન અને સીરિયાના દળોને નિશાન બનાવ્યા હતા. ઇઝરાયલની સેનાએ સનાના અહેવાલ પર ટિપ્પણી કરવાનો ઇનકાર કર્યો છે. એજન્સીએ કહ્યું છે કે ઉત્તરી ગેલીલમાંથી હુમલો કરવામાં આવ્યો છે. આ હુમલાએ નબી હબીલ વિસ્તારમાં એર ડિફેન્સ યુનિટને નિશાન બનાવ્યું છે.
એક અઠવાડિયા પહેલાં સીરિયામાં ઇઝરાયલના હવાઈ હુમલામાં સરકાર તરફી છ લડવૈયાઓ માર્યા ગયા હતા. સમાચાર એજન્સી શિન્હુઆઅનુસાર, યુકે સ્થિત સીરિયન ઓબ્ઝર્વેટરી ફોર હ્યુમન રાઇટ્સે એક નિવેદનમાં જણાવ્યું હતું કે ઇઝરાયલના મિસાઇલ હુમલાએ સંરક્ષણ ફેક્ટરીઓને નિશાન બનાવી હતી, જ્યાં હમા પ્રાંતના મસીફ શહેરમાં એક વૈજ્ઞાનિક સંશોધન કેન્દ્ર આવેલું છે. વોચડોગ જૂથે જણાવ્યું હતું કે આ હુમલાએ ઇરાની મિલિશિયાઓ દ્વારા ચલાવવામાં આવતા શસ્ત્ર ડેપોનો નાશ કર્યો હતો. સીરિયન સેનાએ જણાવ્યું હતું કે તેના હવાઈ સંરક્ષણે ઇઝરાયલની મોટાભાગની મિસાઇલોને અટકાવી હતી, જે મસીફ પર છોડવામાં આવી હતી. સીરિયાસંકટ દરમિયાન ઇઝરાયલે સીરિયાના સૈન્ય સ્થળ પર સેંકડો હવાઈ હુમલા કર્યા છે, જેમાં ઇરાનના અડ્ડાઓનો પણ સમાવેશ થાય છે.
