અલાસ્કા બર્ફિલો પ્રાંત છે અહીં ફૂકાંતા પવનમાં પણ બરફના કણો ઉડે છે

આપણે દસ-બાર ડીગ્રીમાં ઠુંઠવાઈ રહ્યા છીએ, ત્યારે અમેરિકાના ઉત્તરી રાજ્ય અલાસ્કાનું તાપમાન માઈનસ 54 ડીગ્રી (માઈનસ 65 ફેરનહિટ) નોંધાયુ છે. અલાસ્કા ઉત્તર ધુ્રવ નજીક આવેલું હોવાથી ત્યાં ઘણી વખત તાપમાન માઈનસમાં જતું હોય છે.પરંતુ માઈનસ 54 ડીગ્રી એ નોંધપાત્ર આંકડો છે. છેલ્લા દસ દિવસથી અહીં તાપમાન શૂન્ય નીચે છે. છેલ્લા દસ દિવસમાં સૌથી વધુ તાપમાન માઈનસ 43 ડીગ્રી હતું. એટલે કે તાજેતરના ઠંડા દિવસોમાં એ ગરમ અથવા ઓછામાં ઓછો ઠંડો દિવસ હતો. ઉત્તર છેડે આવેલો વિસ્તાર હોવાથી અહીં માઈનસ 30-35 ડીગ્રી તાપમાન સામાન્ય છે. અહીંના સૌથી ઓછા તાપમાનનો વિક્રમ તો વળી માઈનસ 62 ડીગ્રી સુધીનો છે. એ તાપમાન અહીં 23 જાન્યુઆરી 1971ના દિવસે નોંધાયુ હતું. અલાસ્કા આખો બર્ફીલો પ્રાંત છે. અહીં નાના-નાના નગરો અને છૂટાછવાયા ગામડાં આવેલા છે. દરેક સ્થળે અલગ અલગ તાપમાન નોંધાતુ રહે છે. પરંતુ ક્યાયં શૂન્ય કરતા વધારે હોતું નથી. આ પહેલા શૂન્ય કરતાં 54-55 ડીગ્રી નીચું તાપમાન અહીં 2012માં નોંધાયુ હતું.  દર વર્ષે શિયાળામાં દસ-અગિયાર રાતો એવી પસાર થાય જ્યારે તાપમાન માઈનસ 40 ડીગ્રીથી વધતું નથી. 1950માં જોકે એવો વખત આવ્યો હતો કે સતત 20 રાત સુધી તાપમાન માઈનસ 40 ડીગ્રી કરતાં પણ ઓછું રહ્યું હતું. અહીં ફૂંકાતો પવન પણ ઘાતક હોય છે. તેની સાથે સતત બરફના કણો ઉડતા રહે છે.