મહેમાનો કોરોના વાઈરસના ડરને લીધે કપલનાં લગ્નમાં આવવાનું ટાળી રહ્યા હતા

ચીનમાં ફેલાયેલો કોરોના વાઈરસ અટકવાનું નામ જ લઈ રહ્યો નથી. દિવસેને દિવસે મૃત્યુઆંકનો આંકડો વધી રહ્યો છે. કોરોના વાઈરસના ડરને કારણે સિંગાપોરમાં એક કપલે લાઈવ સ્ટ્રીમિંગની મદદથી મહેમાનોની સામે લગ્ન કર્યા હતા. આ કપલ થોડા સમય પહેલાં વુહાન ગયું હતું, આ તે જ જગ્યા છે જ્યાં કોરોના વાઈરસ ફેલાવાનું શરુ થયું હતું. આ કપલના લગ્નમાં આવવા માટે મહેમાનો ડરતા હતા કે કદાચ તેમને પણ ચેપ ન લાગી જાય. આથી કપલે હોટલના રૂમમાં બેસીને લાઈવ સ્ટ્રીમિંગમાં મહેમાનો સામે લગ્ન કર્યા. આ મિસ્ટર એન્ડ મિસિસ યૂ કપલને મહેમાનોએ આશીર્વાદ પણ આપ્યા. લાઈવ વીડિયો સ્ટ્રીમિંગ દરમિયાન કપલે અતિથિઓને કહ્યું કે, આ યાદગાર પળમાં સાથે ન રહેવા બદલ અમે માફી માગીએ છીએ, પણ અમે ખુશ છીએ કે તમે અહીં આવ્યા. લગ્નમાં હાજર મહેમાને કહ્યું કે, વરરાજાની માતાને મળવા આ કપલ વુહાન ગયું હતું. તેઓ પરત આવ્યા બાદ લોકોને શંકા હતી કે તેઓ કોરોના વાઈરસનો ભોગ તો નથી બન્યા ને. મિસિસ એન્ડ મિસ્ટર યૂએ જણાવ્યું કે, ડોક્ટરે અમને વિહાનથી સિંગાપોર પરત આવ્યા પછી 14 દિવસ સુધી કોઈના સંપર્કમાં ન આવવા કહ્યું હતું, પરંતુ અમારા લગ્ન આ જ દિવસોમાં હતા. અમારી પાસે બીજો કોઈ વિકલ્પ નહોતો આથી અને લાઈવ સ્ટ્રીમિંગનું વિચાર્યું. વેડિંગ વેન્યૂ પર આવેલા દરેક મહેમાનોનું સ્વાગત દુલ્હનની બહેને કર્યું હતું.