અમેરિકન રાજકારણના બે દિગ્ગજો – ડોનાલ્ડ ટ્રમ્પ અને એલન મસ્ક – વચ્ચેનો સંઘર્ષ હવે ખુલ્લેઆમ સામે આવી ગયો છે. યુએસ રાષ્ટ્રપતિ ડોનાલ્ડ ટ્રમ્પે સ્પષ્ટપણે કહ્યું છે કે તેમને એલન મસ્ક સાથેના સંબંધો સુધારવામાં રસ નથી. તેમણે મસ્કને ચેતવણી પણ આપી હતી કે જો તેઓ ડેમોક્રેટિક ઉમેદવારોને ટેકો આપશે, તો તેના ખૂબ જ ગંભીર પરિણામો આવી શકે છે.
એનબીસીને આપેલા ઇન્ટરવ્યુમાં ટ્રમ્પે કહ્યું હતું કે, “હું મસ્ક સાથે વાત કરવા માંગતો નથી. તેમણે પોતાનો રસ્તો પસંદ કર્યો છે. જો તેઓ ડેમોક્રેટ્સને ટેકો આપે છે, તો તે તેમના માટે મોંઘું સાબિત થઈ શકે છે.” ટ્રમ્પ મસ્કની કંપનીઓ – સ્પેસએક્સ, ટેસ્લા અને સ્ટારલિંક દ્વારા મેળવેલા સરકારી કરારો અને સબસિડીનો ઉલ્લેખ કરી રહ્યા હતા. ટ્રમ્પે સંકેત આપ્યો હતો કે જો મસ્કનો રાજકીય ઝુકાવ ડેમોક્રેટ્સ તરફ રહેશે, તો તેમની કંપનીઓને મળતો સરકારી ટેકો બંધ થઈ શકે છે.
આ ઘર્ષણ ટ્રમ્પના કર કાપ અને ખર્ચ બિલથી શરૂ થયો હતો, જેની મસ્કે સખત ટીકા કરી હતી. મસ્કે તે બિલને “ઘૃણાસ્પદ” અને “આર્થિક રીતે ખતરનાક” ગણાવ્યું હતું. આ પછી, મસ્કે સોશિયલ મીડિયા પર એક પોસ્ટ શેર કરી, જેમાં ટ્રમ્પનું નામ જેફરી એપ્સ્ટાઇન સાથે જોડવામાં આવ્યું. જોકે તેમણે પાછળથી તે પોસ્ટ ડિલીટ કરી દીધી હતી, પરંતુ ત્યાં સુધીમાં પરિસ્થિતિ વધુ ખરાબ થઈ ગઈ હતી.
ટ્રમ્પ અને મસ્ક બંનેની અમેરિકન રાજકારણ અને ટેકનોલોજી પર મજબૂત પકડ છે. આ બંને વચ્ચેનો સંઘર્ષ ફક્ત રાજકીય વર્તુળોમાં ચર્ચાનો વિષય નથી, પરંતુ તે મસ્કની કંપનીઓ અને તેમના વ્યવસાયિક હિતોને પણ અસર કરી શકે છે.
આ નિવેદન પછી, હવે બધાની નજર તેના પર છે કે શું મસ્ક વળતો નિવેદન આપશે કે પછી તે મૌન રહીને વિવાદને ઠંડો પાડવાનો પ્રયાસ કરશે.
