નીડલફિશે હુમલો કરીને જડબું આરપાર કાઢી દીધું

ઇન્ડોનેશિયામાં 16 વર્ષના ટીનેજર પર નીડલફિશે અચાનક ડોક પર હુમલો કરતા માંડમાંડ બચ્યો છે. મુહમ્મદ ઈદુલની ડોકની આરપાર આ ફિશનું જડબું થઈ ગયું હતું. મુહમ્મદે હિંમત ન હારી અને માછલીને 90 મિનિટ સુધી પકડીને હોસ્પિટલ પહોંચ્યો હતો. તેનું ઓપરેશન થઈ ગયું છે અને હાલ તે સ્વસ્થ છે. 16 વર્ષનો મુહમ્મદ તેના મિત્ર સાથે બોટમાં બેસીને ફિશિંગ કરવા ગયો હતો. બંને મિત્રો દરિયામાં અડધો કિલોમીટર અંદર પહોંચ્યા ત્યાં 75 સેમી લાંબી માછલીએ મુહમ્મદની ડોક પર અચાનક જ હુમલો કરી દીધો. મુહમ્મદે તરત જ માછલીને પોતાના હાથથી પકડી લીધી. માછલીએ બહાર નીકળવા ઘણા પ્રયત્નો કર્યા પણ બંને મિત્રો ફટાફટ હોસ્પિટલ પહોંચી ગયા. મુહમ્મદના ગામની હોસ્પિટલમાં તેની સર્જરી માટે પર્યાપ્ત સાધનો નહોતા, આથી તેને બીજી હોસ્પિટલમાં લઈ જવાનું ડોક્ટરે કીધું, આમ હોસ્પિટલ બદલવામાં જ 90 મિનિટનો સમય પસાર થઈ ગયો. ડોક્ટરે માછલીના જડબાને શરીરથી અલગ કર્યા બાદ સર્જરી કરી હતી. આ માટે તેમને 2 દિવસનો સમય લાગ્યો. મુહમ્મદની ડોકમાં નીડલફિશવાળો ફોટો સોશિયલ મીડિયામાં વાઇરલ થઈ રહ્યો છે. મુહમ્મદનું ઓપરેશન કરનારા ડોક્ટરની ટીમે પણ આવો કેસ પ્રથમ વખત જોયો હતો. ઓપરેશનના 5 દિવસ પછી પણ મુહમ્મદને હજુ હોસ્પિટલમાંથી રજા આપવામાં આવી નથી. તેના સ્વાસ્થ્યને આગળ જતા કોઈ જોખમ ન થાય એટલે ડોક્ટરની દેખરેખ હેઠળ રાખ્યો છે. મુહમ્મદ ઓપરેશન પછી પણ પોતાની ડોકને જમણી તરફ ફેરવી શકતો નથી, તેમ છતાં તેના ચહેરા પર સ્માઈલ છે. તેણે કહ્યું કે, ફિશિંગ કરવું મને બહુ ગમે છે. નીડલફિશને ક્યારેય પણ અવગણવા જેવી નથી, તેથી જ તે અચાનક પાણીમાંથી કૂદકો મારીને મારી ડોકમાં ઘૂસી ગઈ. આ ઘટના પછી હું ફિશિંગ કરવાનું છોડી નહીં દઉં પણ મારું વધારે ધ્યાન રાખીશ.