પાકિસ્તાનના ખૈબર પખ્તુનખ્વા પ્રાંતના નૌશેરા જિલ્લામાં સ્થિત દારુલ ઉલૂમ હક્કાનિયા અકૌરા ખટ્ટક મદ્રેસામાં શુક્રવારે જોરદાર બોમ્બ બ્લાસ્ટ થયો હતો. આ વિસ્ફોટમાં અત્યાર સુધીમાં ઓછામાં ઓછા પાંચ લોકોના મોત થયા છે, જ્યારે ડઝનેક લોકો ઘાયલ થયા છે. આ બ્લાસ્ટ પવિત્ર રમઝાન મહિના પહેલા થયો હતો, જેના કારણે સમગ્ર વિસ્તારમાં ખળભળાટ મચી ગયો હતો.
બ્લાસ્ટ બાદ ભયાનક તસવીરો સામે આવી
આ ઘટનાના ઘણા વીડિયો સોશિયલ મીડિયા પર સામે આવ્યા છે, જેમાં વિસ્ફોટ પછીનું દર્દનાક દ્રશ્ય જોઈ શકાય છે. પ્રત્યક્ષદર્શીઓના જણાવ્યા અનુસાર વિસ્ફોટ એટલો જોરદાર હતો કે આસપાસની ઇમારતો પણ ધ્રૂજી ઉઠી હતી.
તાલિબાન સાથે જોડાયેલા મદરેસાને નિશાન બનાવાયો
આ મદ્રેસા જામિયા હક્કાનિયા જે હુમલાનું નિશાન હતું, તે પાકિસ્તાનના સૌથી પ્રભાવશાળી મદ્રેસાઓમાંથી એક છે. છેલ્લા બે દાયકામાં અફઘાન તાલિબાનના અનેક નેતાઓએ અહીં અભ્યાસ કર્યો છે.
પાકિસ્તાનમાં આતંકવાદી હુમલામાં વધારો
પાકિસ્તાનમાં તાજેતરના વર્ષોમાં આતંકવાદી હુમલામાં વધારો થયો છે. 2023 માં, પેશાવરમાં આત્મઘાતી હુમલામાં 101 લોકો માર્યા ગયા હતા, જેમાંથી મોટાભાગના પોલીસકર્મીઓ હતા. પાકિસ્તાન સરકારે આ માટે તહરીક-એ-તાલિબાન પાકિસ્તાન (TTP)ને જવાબદાર ઠેરવ્યું હતું.
TTP એ અફઘાન તાલિબાન સાથે જોડાયેલું એક વિભાજિત જૂથ છે, જે 2021 માં અફઘાનિસ્તાનમાં તાલિબાન શાસનની સ્થાપના થયા પછી વધુ સક્રિય બન્યું છે. પાકિસ્તાન સરકારનો આરોપ છે કે TTPના ઘણા નેતાઓ અને આતંકવાદીઓ અફઘાનિસ્તાનમાં આશ્રય લઈ રહ્યા છે અને ત્યાંથી પાકિસ્તાનમાં હુમલાની યોજના બનાવી રહ્યા છે.
રમઝાન પહેલા સુરક્ષા વધારી દેવામાં આવી
આ વિસ્ફોટ એવા સમયે થયો છે જ્યારે પવિત્ર રમઝાન મહિનો શનિવાર અથવા રવિવારથી શરૂ થઈ શકે છે. સુરક્ષા એજન્સીઓ હવે સમગ્ર વિસ્તારમાં એલર્ટ મોડ પર છે અને મદરેસાઓ અને મસ્જિદોમાં સુરક્ષા કડક કરવામાં આવી છે.
આ હુમલા બાદ પાકિસ્તાન સરકાર અને સુરક્ષા એજન્સીઓ હાઈ એલર્ટ પર છે. હાલ ઇજાગ્રસ્તોની સારવાર ચાલી રહી છે અને ઘટનાની ઝીણવટભરી તપાસ કરવામાં આવી રહી છે.
