એમ્બેસીને કંઈ થયું તો મોટી કિંમત ચૂકવવી પડશે: અમેરિકાના રાષ્ટ્રપતિ ડોનાલ્ડ ટ્રમ્પ

અમેરિકાના રાષ્ટ્રપતિ ડોનાલ્ડ ટ્રમ્પે નવા વર્ષના પહેલે જ દિવસે ઈરાનને ધમકી આપી છે. ઈરાકની રાજધાની બગદાદ સ્થિત અમેરિકાની એમ્બેસીની બહાર ઈરાનના હજારો સમર્થકોએ પ્રદર્શન કર્યા હતા, તે દરમિયાન એમ્બેસી પર પથ્થરો પણ ફેંક્યા હતા તેમજ કેટલાંક લોકોએ દીવાલ પર ચડવાના પ્રયાસ કર્યા હતા. જેના જવાબમાં ડોનાલ્ડ ટ્રમ્પે ઈરાનને ધમકી આપી છે અને કહ્યું કે જો અમેરિકાની એમ્બેસીના એક પણ સભ્યને કંઈ થશે તો ઈરાનને તેની મોટી કિંમત ચુકવવી પડશે.ટ્રમ્પે ટ્વીટ કર્યું કે,ચેતાવણી નહીં ધમકી. ટ્રમ્પે ટ્વીટ કર્યુ છે કે ઈરાક સ્થિત અમેરિકાની એમ્બેસી હજુ સુરક્ષિત છે. અમારા જવાન ઉચ્ચ ટેકનોલોજી સાથે ત્યાં હાજર છે. તેઓ ઈરાકના રાષ્ટ્રપતિ, વડાપ્રધાનનો પણ આભાર વ્યક્ત કરે છે તેઓએ તાત્કાલિક પ્રદર્શનકારીઓ સામે એકશન લીધા. ટ્રમ્પે ધમકી આપતાં લખ્યું કે આ દરમિયાન કોઈ અમેરિકા એમ્બેસીના સભ્યને ઈજા થઈ તો તેની ઘણી જ મોટી કિંમત ચુકવવી પડશે. આ વાતને ચેતવણી નહીં ધમકી સમજજો, હેપ્પી ન્યૂ યર.ઉલ્લેખનીય છે કે થોડા દિવસ પહેલા અમેરિકાએ એક હવાઈ હુમલામાં ઈરાન સમર્થિત એક ગ્રુપ પર એટેક કર્યો હતો, જેમાં 25 લોકોના મોત નિપજ્યા હતા. અમેરિકાનો આરોપ હતો કે આ જુથ અમેરિકાના ઠેકેદારના મોત માટે જવાબદાર હતા. આ હુમલાના વિરોધમાં બગદાદમાં ઈરાનના સમર્થકોએ અમેરિકા વિરૂદ્ધ દેખાવો કર્યા હતા.