પાકિસ્તાનના પૂર્વ વડાપ્રધાન ઈમરાન ખાન ચારે બાજુથી મુશ્કેલીઓમાંથી પસાર થઈ રહ્યા છે. આગામી દિવસોમાં ગમે ત્યારે તેની ધરપકડ થઈ શકે છે. પાકિસ્તાનની ટોચની તપાસ એજન્સી તેમની પાછળ પડી છે. ઇમરાને એજન્સી સમક્ષ હાજર ન થવા અને ગેરકાયદેસર ભંડોળના મામલે નોટિસનો જવાબ આપ્યો ન હતો. હવે એજન્સી આ મામલે વધુ કાર્યવાહી કરી શકે છે અને ઈમરાનની ધરપકડ કરી શકે છે.
મીડિયા રિપોર્ટ્સ અનુસાર, આ જાણકારી શનિવારે સામે આવી છે.પાકિસ્તાનના દૈનિક અખબાર ધ ન્યૂઝના રિપોર્ટ અનુસાર, ફેડરલ ઇન્વેસ્ટિગેશન એજન્સી (FIA)એ શુક્રવારે આ સંબંધમાં ઇમરાન ખાનને બીજી નોટિસ જારી કરી છે. ધ ન્યૂઝના અહેવાલ મુજબ, ગત બુધવારે ઈમરાન ખાનને પહેલી નોટિસ મોકલવામાં આવી હતી, પરંતુ તેણે FIA ટીમ સમક્ષ હાજર થવાનો ઈન્કાર કરી દીધો હતો.
સમાચારમાં FIAના ઉચ્ચ સ્તરીય અધિકારીઓના હવાલાથી કહેવામાં આવ્યું છે કે ઈમરાન ખાનની ધરપકડ કરવાનો અંતિમ નિર્ણય ત્રણ નોટિસ જારી કર્યા બાદ લેવામાં આવી શકે છે. સૂત્રોને ટાંકીને, સમાચારમાં કહેવામાં આવ્યું છે કે FIAએ યુએસ, ઓસ્ટ્રેલિયા, કેનેડા, યુકે અને બેલ્જિયમમાં કાર્યરત ભૂતપૂર્વ વડા પ્રધાનના પક્ષ સાથે સંકળાયેલી પાંચ કંપનીઓને ટ્રેસ કરી છે.
પાકિસ્તાનના ચૂંટણી પંચને સોંપવામાં આવેલા રિપોર્ટમાં આ કંપનીઓનો ઉલ્લેખ કરવામાં આવ્યો નથી. આ મહિનાની શરૂઆતમાં, પાકિસ્તાનના ચૂંટણી પંચે કહ્યું હતું કે ઈમરાન ખાનની પાર્ટી પાકિસ્તાન તહરીક-એ-ઈન્સાફ (પીટીઆઈ) એ ભારતીય મૂળના ઉદ્યોગપતિ સહિત 34 વિદેશી નાગરિકો પાસેથી નિયમો વિરુદ્ધ ભંડોળ મેળવ્યું હતું.
