વડાપ્રધાન નરેન્દ્ર મોદીએ નાસાની અંતરીક્ષયાત્રી અને ભારતની દીકરી સુનિતા વિલિયમ્સની ઘરવાપસી પર શુભેચ્છાઓ પાઠવી છે. ક્રૂ-૯ અંતરીક્ષયાત્રીઓની સિદ્ધિઓને બિરદાવતાં તેમણે અભિવાદન કર્યું હતું.
પીએમ મોદીએ સોશિયલ મીડિયા એકસ પર પોસ્ટ કરી હતી કે, ‘નાસાનું ક્રૂ-૯ મિશન એ દૃઢ સંકલ્પ, હિંમત અને અનન્ય જુસ્સાનું પરિણામ છે. સુનિતા વિલિયમ્સ અને ક્રૂ-૯ના અંતરીક્ષયાત્રીઓએ ફરી એકવાર આ જ દૃઢતાનું ઉદાહરણ પૂરું પાડ્યું છે. તેમનું અથાગ યોગદાન અને સાહસ લાખો લોકોને હંમેશાં માટે પ્રેરિત કરશે. તે એક આઇકોન બન્યા છે. પૃથ્વીએ તમને ખૂબ યાદ કર્યાં.’
પીએમ મોદીએ આગળ કહૃાું કે, ‘સ્પેસ એક્સપ્લોરેશન માનવીના જુસ્સાને વેગ આપતાં તેમને સપનું સાકાર કરવાની હિંમત આપે છે. સુનિતા વિલિયમ્સ એક પથદર્શક અને પ્રેરણાનો સ્રોત છે. જેમણે પોતાની કારકિર્દીમાં આ જુસ્સાને જાળવી રાખતાં શ્રેષ્ઠ ઉદાહરણ પૂરું પાડ્યું છે. તેમને પરત પૃથ્વી પર સુરક્ષિત લાવવાના પ્રયાસમાં જોડાયેલા તમામ લોકો પર ગર્વ છે. તેઓએ કરી બતાવ્યું કે, જ્યારે જુસ્સો અને ટેક્નોલોજી એક સાથે કામ કરે છે, ત્યારે અદ્ભુત પરિણામો મળે છે.’
ક્રૂ-૯ મિશનમાં સામેલ સુનિતા વિલિયમ્સ, બુચ વિલ્મોર સહિત ચાર અંતરીક્ષયાત્રીઓ નવ મહિના બાદ પૃથ્વી પર પરત ફર્યા હતા. અગાઉ અનેક વખત તેમને અંતરીક્ષમાંથી પાછા લાવવાની કવાયત હાથ ધરાઈ હતી. પરંતુ નિષ્ફળતા મળી હતી. અંતે આજે વહેલી સવારે સ્પેસએક્સના ડ્રેગન ફ્રિડમ કેપ્સૂલની મદદથી ૩.૨૭ વાગ્યે આ ચારેય અંતરીક્ષયાત્રી પૃથ્વી પર સુરક્ષિત પરત ફર્યા છે.
સુનિતા વિલિયમ્સને પત્ર લખીને ભારત આવવાનું આમંત્રણ આપ્યું
વડા પ્રધાન નરેન્દ્ર મોદીએ પણ સુનિતા વિલિયમ્સને પત્ર લખીને કહ્યું છે કે તેઓ ભારતમાં તેમને મળવા માટે આતુર છે. કેન્દ્રીય મંત્રી જિતેન્દ્ર સિંહ દ્વારા ટ્વિટર પર શેર કરાયેલા 1 માર્ચના પત્રમાં, પ્રધાનમંત્રીએ જણાવ્યું હતું કે તેમણે રાષ્ટ્રપતિ ડોનાલ્ડ ટ્રમ્પ અને તેમના પુરોગામી જો બિડેન સાથેની તેમની અમેરિકાની મુલાકાતો દરમિયાન સુનિતા વિલિયમ્સના સ્વાસ્થ્ય વિશે પૂછપરછ કરી હતી. સુનિતા વિલિયમ્સ અને તેમના સાથીદાર બૂચ વિલ્મોર ISS પરથી ઉતર્યા અને 17 કલાક પછી પૃથ્વી પર પાછા ફર્યા તેના કલાકો પછી આ પત્ર જાહેર કરવામાં આવ્યો હતો.
હું આ પત્ર લખતા મારી જાતને રોકી શક્યો નહીં.
મોદીએ યાદ કર્યું કે આ મહિને દિલ્હીમાં નાસાના ભૂતપૂર્વ અવકાશયાત્રી માઇક માસ્સિનો સાથેની મુલાકાત દરમિયાન તેમની વાતચીતમાં તેમનું નામ આવ્યું હતું. પ્રધાનમંત્રી મોદીએ કહ્યું, “અમે ચર્ચા કરી કે અમને તમારા અને તમારા કાર્ય પર કેટલો ગર્વ છે. આ વાતચીત પછી, હું મારી જાતને પત્ર લખવાથી રોકી શક્યો નહીં.” તેમણે લખ્યું, “૧.૪ અબજ ભારતીયો હંમેશા તમારી સિદ્ધિઓ પર ગર્વ અનુભવે છે. તાજેતરની ઘટનાઓએ ફરી એકવાર તમારી પ્રેરણાદાયી હિંમત અને દૃઢ નિશ્ચય દર્શાવ્યો છે.”
મને 2016 માં મારી અમેરિકા મુલાકાત દરમિયાન થયેલી મુલાકાત ખૂબ સારી રીતે યાદ છે.
તેમણે કહ્યું કે તેમની માતા બોની પંડ્યા તેમના પાછા ફરવાની આતુરતાથી રાહ જોશે. પ્રધાનમંત્રીએ તેમના પિતા દીપક પંડ્યાનો ઉલ્લેખ કરતા કહ્યું, “મને ખાતરી છે કે સ્વર્ગસ્થ દીપક ભાઈના આશીર્વાદ પણ તમારી સાથે છે.” તેમનું ૨૦૨૦ માં અવસાન થયું. પ્રધાનમંત્રી મોદીએ પત્રમાં એમ પણ કહ્યું હતું કે 2016 માં તેમની અમેરિકા મુલાકાત દરમિયાન તેમની સાથેની મુલાકાત તેમને ખૂબ સારી રીતે યાદ છે.
