ગલ્ફ ક્ષેત્રમાં દરિયાઈ સુરક્ષા પર ચિંતા: શારજાહ પાસે તેલ ટેન્કર પર ડ્રોન અટેક, ભારતીય મંત્રાલય એલર્ટ!
સંયુક્ત આરબ અમીરાત (UAE) ના શારજાહ એન્કરેજ નજીક સમુદ્રમાં કાચા તેલના એક ટેન્કર પર ડ્રોન હુમલો થયો હોવાના સમાચાર સામે આવ્યા છે. આ ઘટના 9 ઓક્ટોબર 2026 ના રોજ બની હતી, જ્યારે પનામાના ઝંડાવાળા કાચા તેલના ટેન્કર MT GEM NO. 2 ને નિશાન બનાવવામાં આવ્યું હતું. આ જહાજ પર ક્રૂ મેમ્બર તરીકે 22 ભારતીય નાવિકો સવાર હતા.
હુમલા બાદ જહાજ પર સવાર તમામ ૨૨ ભારતીય ક્રૂ સભ્યો સંપૂર્ણપણે સુરક્ષિત છે, તે રાહતની વાત છે. કેન્દ્રીય બંદર, જહાજ અને જળમાર્ગ મંત્રી સર્વાનંદ સોનોવાલે આ વાતની પુષ્ટિ કરી છે અને સોશિયલ મીડિયા પર આ માહિતી શેર કરી છે.
સરકાર અને મંત્રાલયની સ્થિતિ પર ખાસ નજર
કેન્દ્રીય મંત્રી સર્બાનંદ સોનોવાલે જણાવ્યું કે ભારત સરકાર આ સ્થિતિ પર સતત નજર રાખી રહી છે. ભારતીય નાવિકોની સુરક્ષા અને તેમની સુખાકારી સુનિશ્ચિત કરવા માટે જહાજનું સંચાલન કરતી કંપની સાથે સતત સંપર્ક જાળવી રાખવામાં આવ્યો છે.
તમામ ૨૨ ભારતીય નાવિકો સુરક્ષિત હોવા બદલ રાહત વ્યક્ત કરતા સોનોવાલે જણાવ્યું હતું કે સરકાર નાવિકોના હિતો અને સુરક્ષાનું જતન કરવા માટે સંપૂર્ણપણે પ્રતિબદ્ધ છે. જોકે, આ હુમલા પાછળ કોનો હાથ હતો અને જહાજને કેટલું ભૌતિક નુકસાન થયું છે તે અંગેની સત્તાવાર વિગતો હજુ સુધી જાહેર કરવામાં આવી નથી.
દરિયાઈ જહાજોની સુરક્ષા પર વધી ચિંતા
ગલ્ફ ક્ષેત્ર અને આંતરરાષ્ટ્રીય દરિયાઈ માર્ગો પર વ્યાપારી જહાજો (Commercial Vessels) પર સતત થઈ રહેલા હુમલાઓએ વૈશ્વિક સુરક્ષા અને વેપાર પર સવાલો ખડા કર્યા છે. વિદેશ મંત્રાલય અને ભારતીય શિપિંગ મંત્રાલય દરિયાઈ માર્ગો પર ભારતીય નાગરિકો અને નાવિકોની સુરક્ષાને લઈને ખૂબ જ સતર્ક છે.
ભારતીય અધિકારીઓનું કહેવું છે કે આંતરરાષ્ટ્રીય જળસીમામાં આવા વ્યાપારી જહાજો પર થતા હુમલા અટકાવવા જોઈએ, જેથી આંતરરાષ્ટ્રીય વેપાર તેમજ નાવિકોના જીવન અને સંપત્તિની સુરક્ષા સુનિશ્ચિત કરી શકાય.
