છેલ્લા 24 કલાકમાં વધુ લોકોનો ટેસ્ટ પોઝિટિવ આવતાં ગુજરાતમાં કોરોના વાયરસથી સંક્રમિતોનો આંકડો 87 પર પહોંચ્યો છે. જેમાંથી 1/3 ભાગના કોવિડ-19ના દર્દીઓ અમદાવાદના છે. આ સાથે જ અમદાવાદ કોવિડ 19ના દેશના ટોપ 10 ‘હોટસ્પોટ’માંથી એક બની ગયું છે. જેમાં નોઈડા, ઉત્તરપ્રદેશનું મેરઠ, રાજસ્થાનનું ભિલવાડા, મહારાષ્ટ્રનું મુંબઈ તેમજ પુણેનો પણ સમાવેશ થાય છે.
મંગળવારે રાજ્યમાં વધુ ચાર કેસ નોંધાયા હતા, જેમાંથી એક-એક અમદાવાદ, સુરત, રાજકોટ અને ગાંધીનગરના હતા. મંગળવારે કોઈનું મૃત્યું ન નોંધાતા મોતનો આંકડો 6 પર યથાવત્ છે. આરોગ્ય અને પરિવાર કલ્યાણ વિભાગના મુખ્ય સચિવ જયંતિ રવિએ કહ્યું કે, સૌથી વધારે પોઝિટિવ કેસ તેમજ તેમના સંપર્કમાં આવતા લોકોના કારણે કેન્દ્ર સરકારે અમદાવાદને એક હોટસ્પોટ તરીકે ઓળખાવ્યું છે.
‘પરંતુ સક્રિય રીતે, કોન્ટેક્ટમાં આવેલા વ્યક્તિઓને ઓળખવા અને જરૂરી પગલા લેવા માટે અમે સુરત, વડોદરા, રાજકોટ અને ભાવનગર જેવા શહેરોમાં પણ કામ કરી રહ્યા છીએ’, તેમ તેણે કહ્યું.આઈસોલેશનના અમલ માટે, અમદાવાદ મહાનગરપાલિકા તેમજ એજન્સીઓએ મંગળવારે દાણીલીમડા અને બહેરામપુરા જેવા વિસ્તારોમાં કામગીરી હાથ ધરી હતી. અમારા સહયોગી ટાઈમ્સ ઓફ ઈન્ડિયા સાથે વાતચીત કરતાં એર વરિષ્ઠ અધિકારીએ જણાવ્યું હતું કે, આઈસોલેશનની પ્રક્રિયાનાં ભાગરુપે લગભગ 35 હજાર ઘરોને સેનિટાઈઝેશન ડ્રાઈવ હેઠળ આવરી લેવાશે.