17 ફેબ્રુઆરીએ વલયાકાર સૂર્યગ્રહણ: ભારતમાં સૂતક લાગશે કે નહીં? જાણો કોના માટે આ ગ્રહણ અશુભ સાબિત થશે.
વર્ષ 2026નું પ્રથમ સૂર્યગ્રહણ 17 ફેબ્રુઆરી, 2026 ના રોજ થવા જઈ રહ્યું છે. આ ગ્રહણની વિશેષતા એ છે કે તે મહાશિવરાત્રીના માત્ર બે દિવસ પછી જ સર્જાશે. ખગોળશાસ્ત્રીઓના મતે આ એક ‘વલયાકાર સૂર્યગ્રહણ’ (Annular Solar Eclipse) હશે, જેને વિજ્ઞાનની ભાષામાં ‘રિંગ ઓફ ફાયર’ અથવા ‘અગ્નિની વલય’ પણ કહેવામાં આવે છે. જ્યોતિષ શાસ્ત્રમાં સૂર્યગ્રહણને એક મહત્વપૂર્ણ ઘટના માનવામાં આવે છે, જેની સીધી અસર માનવ જીવન અને રાશિઓ પર પડતી હોય છે.
ગ્રહણનો સમય અને સૂતક કાળ
ભારતીય સમય અનુસાર, આ સૂર્યગ્રહણ બપોરે 3:26 વાગ્યે શરૂ થશે અને સાંજે 7:57 વાગ્યે પૂર્ણ થશે. આશરે સાડા ચાર કલાક સુધી ચાલનારા આ ગ્રહણ દરમિયાન ચંદ્ર સૂર્યના મધ્ય ભાગને ઢાંકી દેશે, જેના કારણે સૂર્ય એક તેજસ્વી સોનાની બંગડી જેવો દેખાશે.
મહત્વની વાત એ છે કે, આ ગ્રહણ ભારતમાં દેખાશે નહીં. જ્યોતિષીય શાસ્ત્રના નિયમ મુજબ જે ગ્રહણ નરી આંખે દેખાતું નથી, તેનો સૂતક કાળ પાળવામાં આવતો નથી. આથી મંદિરોના દ્વાર બંધ રહેશે નહીં કે પૂજા-પાઠમાં કોઈ અવરોધ આવશે નહીં. જોકે, ગ્રહણ જે-તે રાશિના સ્વામી ગ્રહોને પ્રભાવિત કરતું હોવાથી તેની નકારાત્મક અસરથી બચવા કેટલીક સાવધાની રાખવી જરૂરી છે.
આ 3 રાશિઓ માટે ‘રેડ એલર્ટ’
જ્યોતિષીઓના વિશ્લેષણ મુજબ, આ વલયાકાર સૂર્યગ્રહણ ત્રણ રાશિઓ માટે મુશ્કેલીઓ વધારી શકે છે:
1. વૃષભ રાશિ (Taurus)
વૃષભ રાશિના જાતકો માટે આ ગ્રહણ કરિયર અને નાણાકીય બાબતોમાં પડકારજનક સાબિત થઈ શકે છે.
આર્થિક અસર: નાણાકીય સ્થિતિ નબળી પડી શકે છે, બિનજરૂરી ખર્ચમાં વધારો થશે.
કરિયર: નોકરી કે વ્યવસાયમાં ઉતાર-ચઢાવ આવી શકે છે. સહકર્મીઓ સાથે વિવાદ ટાળવો.
સલાહ: 17 ફેબ્રુઆરીથી 4 માર્ચ સુધી કોઈપણ નવું રોકાણ કરવાનું ટાળો અને કોઈ પર આંધળો વિશ્વાસ ન કરો.
2. મકર રાશિ (Capricorn)
મકર રાશિના જાતકોએ આ સમયગાળા દરમિયાન માનસિક અને શારીરિક સ્વાસ્થ્યનું ધ્યાન રાખવું પડશે.
કાર્યમાં અવરોધ: જે કામ પૂરા થવાની તૈયારીમાં હશે તેમાં અચાનક વિઘ્ન આવી શકે છે.
સ્વાસ્થ્ય: જૂના રોગો ફરી ઉથલો મારી શકે છે, ખાસ કરીને હાડકા કે સાંધાના દુખાવાની સમસ્યા વધી શકે છે.
સલાહ: ભાગીદારીના ધંધામાં સાવધાન રહેવું. છેતરપિંડી થવાની સંભાવના હોવાથી કાયદાકીય દસ્તાવેજો વાંચીને જ સહી કરવી.
3. મીન રાશિ (Pisces)
મીન રાશિના લોકો માટે આ ગ્રહણ પારિવારિક અને સામાજિક જીવનમાં તણાવ લાવી શકે છે.
વિવાદની શક્યતા: મિત્રો કે સંબંધીઓ સાથે ઝઘડો થવાની પૂરેપૂરી સંભાવના છે.
દગો: કોઈ નજીકની વ્યક્તિ દ્વારા વિશ્વાસઘાત થઈ શકે છે. કોર્ટ-કચેરીના મામલામાં પડવું પડી શકે છે.
સલાહ: હોળી સુધીનો સમય મીન રાશિ માટે સંવેદનશીલ છે. નવી નોકરી શોધવા કે મોટું પરિવર્તન કરવા માટે આ સમય અનુકૂળ નથી.
ગ્રહણ દરમિયાન શું કરવું જોઈએ?
જોકે સૂતક નથી, પરંતુ ગ્રહણની નકારાત્મક ઉર્જાથી બચવા માટે જ્યોતિષીઓ નીચે મુજબના ઉપાયો સૂચવે છે:
ગ્રહણ દરમિયાન ભગવાન શિવના મંત્રો અથવા ‘ઓમ નમઃ શિવાય’ નો જાપ કરવો.
ગ્રહણ પૂર્ણ થયા બાદ જરૂરિયાતમંદ લોકોને અનાજ કે વસ્ત્રનું દાન કરવું.
જે જાતકોની રાશિ પર નકારાત્મક અસર છે, તેમણે સૂર્ય ચાલીસા કે આદિત્ય હૃદય સ્તોત્રનો પાઠ કરવો જોઈએ.
ખગોળીય દ્રષ્ટિએ આ સૂર્યગ્રહણ એક અદભૂત નજારો હશે, પરંતુ જ્યોતિષીય દ્રષ્ટિએ તે સાવધ રહેવાનો સંકેત છે. ખાસ કરીને વૃષભ, મકર અને મીન રાશિના લોકોએ ધીરજ અને સંયમથી કામ લેવું જોઈએ. હોળી પછીનો સમય તમામ રાશિઓ માટે ફરી અનુકૂળ બનશે.
