બાંગ્લાદેશ ચૂંટણી: જમાત-એ-ઇસ્લામીની હાર, પરંતુ ભારતની સરહદ પર વધતી સક્રિયતાને લઈ સુરક્ષા એજન્સીઓ સતર્ક
બાંગ્લાદેશની તાજેતરની સામાન્ય ચૂંટણીમાં તારિક રહેમાનના નેતૃત્વવાળી BNP એ સ્પષ્ટ બહુમતી સાથે સરકાર બનાવવાનો દાવો કર્યો છે, પરંતુ પશ્ચિમ બંગાળ અને આસામની સરહદને અડીને આવેલા વિસ્તારોમાં જમાત-એ-ઇસ્લામીની મજબૂત પકડને કારણે સુરક્ષા એજન્સીઓની ચિંતામાં વધારો થયો છે.
સરહદી વિસ્તારોમાં જમાતની પકડ
ચૂંટણી વિશ્લેષણ મુજબ, સત્ખીરા, કુશ્તિયા, ખુુલના અને રંગપુર જેવા જિલ્લાઓ, જે ભારત-બાંગ્લાદેશ આંતરરાષ્ટ્રીય સરહદની નજીક છે, તે જમાત-એ-ઇસ્લામીના મુખ્ય ગઢ તરીકે ઉભરી આવ્યા છે. આ વિસ્તારો શહેરી કેન્દ્રોની સરખામણીમાં ગ્રામીણ અને ધાર્મિક નેટવર્કથી વધુ પ્રભાવિત માનવામાં આવે છે. સ્થાનિક મસ્જિદો અને મદ્રેસાઓ દ્વારા આ પાર્ટીએ લાંબા સમયથી પોતાનો સામાજિક આધાર મજબૂત કર્યો છે.
સુરક્ષા એજન્સીઓનું કહેવું છે કે, સરહદ સાથે જોડાયેલા જિલ્લાઓમાં કોઈપણ કટ્ટરપંથી કે વિચારધારાત્મક રીતે કડક પક્ષની સક્રિયતાને નજરઅંદાજ કરી શકાય નહીં. તેમનું અનુમાન છે કે આવી ગતિવિધિઓ ધીમે-ધીમે સંગઠન અને ભરતી નેટવર્ક વિકસાવી શકે છે. હાલમાં કોઈ પ્રત્યક્ષ જોખમની સત્તાવાર પુષ્ટિ થઈ નથી, પરંતુ સાવચેતી જાળવી રાખવી જરૂરી માનવામાં આવે છે.
જમાત-એ-ઇસ્લામીએ ચૂંટણી પ્રક્રિયા પર ઉઠાવ્યા સવાલ
ચૂંટણી પરિણામોની જાહેરાત બાદ જમાત-એ-ઇસ્લામીએ ચૂંટણી પ્રક્રિયા સામે અસંતોષ વ્યક્ત કર્યો છે. પાર્ટીનો દાવો છે કે પરિણામોમાં પારદર્શિતાનો અભાવ, નજીવા અંતરથી મળેલી હાર અને મતના ટકાવારીની અસંગતતા તેમના વિરોધનું કારણ છે. તેમણે ચૂંટણી પંચની ભૂમિકા પર પણ સવાલો ઉઠાવ્યા છે.
ભારત પર સંભવિત અસર
વિશ્લેષકોનું કહેવું છે કે ભારતની સરહદને અડીને આવેલા જિલ્લાઓમાં રાજકીય પરિવર્તનની અસર સ્થાનિક લઘુમતી વસ્તી અને જમીન વિવાદ, સામાજિક તણાવ અથવા સ્થાનિક દબાણ જેવા મામલાઓ પર પડી શકે છે. જો કે આ માત્ર પ્રારંભિક આકલન છે, તેમ છતાં સરહદી વિસ્તારની સંવેદનશીલતાને જોતા દિલ્હીની સુરક્ષા અને વિદેશ નીતિ ટીમ સતત સ્થિતિ પર નજર રાખી રહી છે.
આ ચૂંટણી પરિવર્તનની વચ્ચે, બાંગ્લાદેશના સરહદી વિસ્તારો અને ભારત-બાંગ્લાદેશ સંબંધો પર પડનારી અસર પર સૌની નજર ટકેલી છે.
