પીએમ મોદીનો આસામ પ્રવાસ: 5,450 કરોડથી વધુના વિકાસ કામોનું ઉદ્ઘાટન
વડાપ્રધાન નરેન્દ્ર મોદી આવતીકાલે, 14 ફેબ્રુઆરી 2026ના રોજ આસામની મુલાકાતે રહેશે. આ મુલાકાત દરમિયાન તેઓ ઉત્તર-પૂર્વ ભારતમાં અનેક માળખાગત સુવિધાઓ અને ડિજિટલ પ્રોજેક્ટ્સનું ઉદ્ઘાટન કરશે, જેનાથી આ ક્ષેત્રની કનેક્ટિવિટી અને ઉચ્ચ શિક્ષણને નવો વેગ મળશે.
મોરાનમાં ઇમરજન્સી લેન્ડિંગ ફેસિલિટીનું નિરીક્ષણ
વડાપ્રધાન સવારે 10:30 કલાકે ડિબ્રુગઢના મોરાન બાયપાસ સ્થિત નવી ઇમરજન્સી લેન્ડિંગ ફેસિલિટી (ELF) નું નિરીક્ષણ કરશે. ઉત્તર-પૂર્વ ભારતની આ પ્રકારની આ પ્રથમ સુવિધા છે, જે ભારતીય વાયુસેનાના સહયોગથી વિકસાવવામાં આવી છે. ELF કુદરતી આફતો અને વ્યૂહાત્મક જરૂરિયાતો સમયે રાહત અને બચાવ કામગીરીમાં મહત્વની ભૂમિકા ભજવશે.
બ્રહ્મપુત્રા નદી પર 6-લેન પુલનું ઉદ્ઘાટન
બપોરે લગભગ 1 વાગ્યે પીએમ મોદી કુમાર ભાસ્કર વર્મા સેતુનું નિરીક્ષણ કરશે. બ્રહ્મપુત્રા નદી પર બનેલા આ છ લેન પુલનું નિર્માણ અંદાજે 3,030 કરોડ રૂપિયાના ખર્ચે થયું છે. આ પુલના નિર્માણથી ગુવાહાટી અને નોર્થ ગુવાહાટી વચ્ચેનો મુસાફરીનો સમય ઘટીને માત્ર સાત મિનિટ રહી જશે, જેનાથી પ્રાદેશિક કનેક્ટિવિટીમાં મોટો સુધારો થશે.
5,450 કરોડ રૂપિયાના પ્રોજેક્ટ્સનું લોકાર્પણ
બપોરે 1:30 કલાકે પીએમ મોદી ગુવાહાટીના લચિત ઘાટ ખાતે 5,450 કરોડ રૂપિયાથી વધુની વિવિધ વિકાસ યોજનાઓનું ઉદ્ઘાટન અને શિલાન્યાસ કરશે. આ પ્રોજેક્ટ્સનો ઉદ્દેશ્ય ઉત્તર-પૂર્વ ક્ષેત્રમાં ઇન્ફ્રાસ્ટ્રક્ચર, ડિજિટલ કનેક્ટિવિટી અને સ્થાનિક વિકાસને મજબૂત કરવાનો છે.
ઉચ્ચ શિક્ષણ અને ડિજિટલ ઇન્ફ્રાસ્ટ્રક્ચરમાં રોકાણ
વડાપ્રધાન કામરૂપ જિલ્લાના અમીનગાંવમાં નેશનલ ડેટા સેન્ટરનું પણ ઉદ્ઘાટન કરશે. આ આધુનિક સેન્ટર સરકારી સેવાઓની ડિજિટલ ડિલિવરીને પ્રોત્સાહન આપશે અને આપત્તિના સમયે બેકઅપ સુવિધા પણ પૂરી પાડશે. આ ઉપરાંત, પીએમ મોદી IIM ગુવાહાટીનું ઉદ્ઘાટન કરશે, જેનાથી ઉત્તર-પૂર્વમાં ઉચ્ચ શિક્ષણ અને મેનેજમેન્ટ અભ્યાસમાં નવી ગતિ આવવાની અપેક્ષા છે.
પીએમ મોદીનો આસામ પ્રવાસ માત્ર આ ક્ષેત્રની માળખાગત ક્ષમતામાં જ વધારો નહીં કરે, પરંતુ ઉત્તર-પૂર્વ ભારતમાં ડિજિટલ અને શૈક્ષણિક વિકાસને પણ મજબૂત બનાવશે. 5,450 કરોડ રૂપિયાથી વધુના રોકાણ પ્રોજેક્ટ્સ સાથે આ વિસ્તાર આગામી થોડા વર્ષોમાં ઝડપથી વિકસિત થવા તરફ અગ્રેસર થશે.
