ચાઈનીઝ રોબોટ ડોગ બાદ હવે ગલગોટિયાના ‘ડ્રોન સોકર’ પર વિવાદ: યુથ કોંગ્રેસે કહ્યું- ‘આ તો કોરિયન છે!’
દિલ્હીમાં આયોજિત ‘ઈન્ડિયા AI ઈમ્પેક્ટ સમિટ’માં ગલગોટિયા યુનિવર્સિટી અત્યારે ટેકનોલોજી કરતાં વધુ વિવાદોને કારણે ચર્ચામાં છે. પહેલા ‘રોબોટ ડોગ’ને ચીની ટેકનોલોજી ગણાવીને હોબાળો થયો હતો, અને હવે યુનિવર્સિટીના ‘ડ્રોન સોકર’ (Drone Soccer) પર સવાલો ઉભા થયા છે. યુથ કોંગ્રેસે દાવો કર્યો છે કે જે ડ્રોનને યુનિવર્સિટી પોતાની સ્વદેશી શોધ ગણાવી રહી છે, તે વાસ્તવમાં કોરિયાની બનાવટનું છે.
પહેલા ચીન, હવે કોરિયા: યુથ કોંગ્રેસનો આક્ષેપ
યુથ કોંગ્રેસે સોશિયલ મીડિયા પ્લેટફોર્મ ‘X’ પર ગલગોટિયા યુનિવર્સિટીના ડ્રોન સિસ્ટમનો એક વીડિયો શેર કર્યો છે. આ પોસ્ટમાં તેમણે કટાક્ષ કરતા લખ્યું કે, “પહેલા ચીન અને હવે કોરિયા… ગલગોટિયા યુનિવર્સિટી ‘ઉધાર લીધેલી’ ઇનોવેશનના વર્લ્ડ ટૂર પર છે.” યુથ કોંગ્રેસે કેન્દ્ર સરકારના ‘આત્મનિર્ભર ભારત’ મિશન પર પણ નિશાન સાધ્યું છે.
શું છે આખો વિવાદ?
ગલગોટિયા યુનિવર્સિટીનો દાવો છે કે તેમણે ભારતમાં જ સંપૂર્ણ રીતે નિર્મિત પ્રથમ ‘ડ્રોન સોકર’ તૈયાર કર્યું છે. ડ્રોન સોકર એ ફૂટબોલના આકારના પાંજરામાં રાખવામાં આવેલું એક ડ્રોન છે, જેનો ઉપયોગ સ્પોર્ટ્સ તરીકે થાય છે. જોકે, યુથ કોંગ્રેસનું કહેવું છે કે આ કોઈ સ્વદેશી શોધ નથી, પરંતુ કોરિયાનું ‘સ્ટ્રાઈકર વી3 એઆરએફ’ (Striker V3 ARF) ડ્રોન છે.
પ્રોફેસરનો દાવો અને સત્ય પર સવાલ
વાયરલ વીડિયોમાં યુનિવર્સિટીના એક પ્રોફેસર એવો દાવો કરતા જોવા મળે છે કે, “આ સોકર બોલ આકારની ડ્રોન સિસ્ટમનું એન્જિનિયરિંગથી લઈને તેની એપ્લિકેશન સુધીનું તમામ કામ યુનિવર્સિટીમાં જ કરવામાં આવ્યું છે.” તેમણે તેને ભારતનું પ્રથમ ‘ડ્રોન સોકર એરિના’ ગણાવ્યું હતું. આ વીડિયો સામે આવ્યા બાદ સોશિયલ મીડિયા પર લોકો પૂછી રહ્યા છે કે શું આ ખરેખર ભારતીય ઇનોવેશન છે કે પછી માત્ર રિ-બ્રાન્ડિંગ?
First China, now Korea. Galgotias is on a world tour of ‘borrowed’ innovation. 🌍.
They claimed to have built India’s first Drone Soccer from scratch on campus, but it’s actually just a Striker V3 ARF from Korea. 🇰🇷
Atmanirbhar’ or just ‘Atmanir-buy’ Modi ji? pic.twitter.com/8iRUeU0aAJ
— Indian Youth Congress (@IYC) February 18, 2026
અગાઉ ‘રોબોટ ડોગ’ પર થયો હતો હોબાળો
આ સમિટમાં ગલગોટિયા યુનિવર્સિટીએ એક ‘રોબોટ ડોગ’ પ્રદર્શિત કર્યો હતો. તપાસમાં જાણવા મળ્યું હતું કે આ ડિવાઈસ ચીની ટેકનોલોજી (Unitree Robotics) પર આધારિત હોઈ શકે છે. આ બાબતે સોશિયલ મીડિયા પર ભારે ટીકા થયા બાદ હવે ડ્રોન સોકરના વિવાદે યુનિવર્સિટીની વિશ્વસનીયતા પર વધુ એક પ્રશ્નાર્થ ચિન્હ લગાવી દીધું છે.
