પાકિસ્તાની ક્રિકેટમાં ‘અહંકાર’નું ગ્રહણ: મોહમ્મદ યૂસફે ટીમની પડતીના કારણો જાહેર કર્યા; 2021ની જીત બાદ ખેલાડીઓમાં શિસ્તનો અભાવ
પાકિસ્તાન ક્રિકેટ ટીમ માટે વર્તમાન સમય અત્યંત કપરો સાબિત થઈ રહ્યો છે. ખાસ કરીને ભારત સામેના તાજેતરના પરાજય બાદ ટીમની રણનીતિ અને ખેલાડીઓના વલણ પર ગંભીર સવાલો ઉઠી રહ્યા છે. પાકિસ્તાનના પૂર્વ કેપ્ટન અને દિગ્ગજ બેટ્સમેન મોહમ્મદ યૂસફે એક ચોંકાવનારો ખુલાસો કરતા જણાવ્યું છે કે, પાકિસ્તાની ટીમમાં પ્રસરેલું ‘અભિમાન’ અને કોચ પ્રત્યેનો ‘અનાદર’ ટીમની નિષ્ફળતાનું મુખ્ય કારણ છે. યૂસફના મતે, 2021ના ટી20 વર્લ્ડ કપમાં ભારત સામે મળેલી 10 વિકેટની ઐતિહાસિક જીત જ ટીમ માટે ‘આશીર્વાદને બદલે શ્રાપ’ સાબિત થઈ છે.
ઐતિહાસિક જીત અને અહંકારનો ઉદય
વર્ષ 2017 પછી પાકિસ્તાન ભારત સામે માત્ર ત્રણ જ મેચ જીતવામાં સફળ રહ્યું છે. મોહમ્મદ યૂસફે વિશ્લેષણ કરતા જણાવ્યું કે, 2021માં દુબઈ ખાતે ભારતને હરાવ્યા બાદ ખેલાડીઓની મનોદશા બદલાઈ ગઈ હતી. તેઓએ માનવું શરૂ કરી દીધું હતું કે હવે તેઓ સર્વશ્રેષ્ઠ છે અને કોઈ તેમને હરાવી શકે તેમ નથી.
યૂસફે ગંભીર આરોપ લગાવતા કહ્યું કે, “જ્યારે કોચ મેદાન પર કે ડ્રેસિંગ રૂમમાં વ્યૂહરચના સમજાવતા હોય, ત્યારે ખેલાડીઓ તેમની વાત સાંભળવાને બદલે મોબાઈલ ફોનમાં વ્યસ્ત રહેતા અથવા નજર ફેરવી લેતા હતા. શિસ્તનો આ અભાવ કોઈપણ ટીમ માટે પતનની શરૂઆત છે.” તેમણે વધુમાં ઉમેર્યું કે ઇન્ઝામમ-ઉલ-હક અને સૈદ અનવર જેવા લેજેન્ડ્સ હંમેશા જમીન સાથે જોડાયેલા (Grounded) રહેતા અને કોચનું સન્માન કરતા, જે હાલના ખેલાડીઓમાં જોવા મળતું નથી.
શાદાબ ખાનનો વળતો પ્રહાર અને વિવાદ
યૂસફના આ આક્ષેપોને પુષ્ટિ આપતું હોય તેમ ઓલરાઉન્ડર શાદાબ ખાનનું તાજેતરનું નિવેદન સામે આવ્યું છે. શાદાબે પૂર્વ ક્રિકેટરોની ટીકાનો જવાબ આપતા કહ્યું કે, “અમારા પૂર્વ ક્રિકેટરો ભલે લેજેન્ડ્સ હોય, પરંતુ તેઓ વર્લ્ડ કપમાં ક્યારેય ભારતને હરાવી શક્યા નહોતા. અમે જ એ ટીમ છીએ જેણે 2021માં આ સિદ્ધિ મેળવી છે.” શાદાબના આ નિવેદને સાબિત કર્યું છે કે ટીમમાં હજુ પણ ભૂતકાળની જીતનો અહંકાર જીવંત છે, જે વર્તમાન પ્રદર્શનમાં અવરોધરૂપ બની રહ્યો છે.
બાબર આઝમની ટેકનિક અને પીસીબીમાં રાજકારણ
ટીમના સુપરસ્ટાર બેટ્સમેન બાબર આઝમ વિશે વાત કરતા યૂસફે જણાવ્યું કે તેમની બેટિંગ ટેકનિકમાં મોટો ઘટાડો થયો છે. બેટિંગ કોચ તરીકેના પોતાના અનુભવને ટાંકીને યૂસફે કહ્યું કે, “બાબર લાંબા સમયથી ફોર્મમાં નથી. મેં અનેકવાર તેમને ટીમમાંથી આરામ આપવાની સલાહ આપી હતી જેથી તેઓ પોતાની ભૂલો સુધારી શકે, પરંતુ બોર્ડ અને પસંદગીકારોના દબાણને કારણે તેમ થઈ શક્યું નહીં. આખરે કંટાળીને મેં ત્રણ મહિનામાં જ પદત્યાગ કરી દીધો હતો.”
બાબરની નિષ્ફળતા અને ટીમમાં સતત થતા રાજકીય હસ્તક્ષેપને કારણે પાકિસ્તાન ક્રિકેટ બોર્ડ (PCB) પણ શંકાના દાયરામાં છે. કોચિંગ સ્ટાફને યોગ્ય સત્તા ન આપવી અને ખેલાડીઓને છાવરવાની નીતિએ ટીમના ‘વિનિંગ મોમેન્ટમ’ને તોડી નાખ્યું છે.
