સુપ્રીમ કોર્ટના ઝટકા બાદ ટ્રમ્પનું મોટું નિવેદન: ‘ભારત માટે કંઈ બદલાશે નહીં, તેમણે ટેરિફ આપવો જ પડશે’
અમેરિકી સુપ્રીમ કોર્ટ દ્વારા ટેરિફને ગેરકાનૂની ગણાવ્યાના માત્ર ત્રણ જ કલાકમાં રાષ્ટ્રપતિ ડોનાલ્ડ ટ્રમ્પે પ્રેસ કોન્ફરન્સ કરીને દુનિયાભરને ચોંકાવી દીધી છે. ખાસ કરીને ભારત સાથેના વેપાર સંબંધો પર બોલતા ટ્રમ્પે સ્પષ્ટ કર્યું છે કે કોર્ટના આદેશ છતાં ભારત સાથેની ટ્રેડ ડીલમાં કોઈ ફેરફાર થશે નહીં. ટ્રમ્પના મતે, ભારત પહેલાની જેમ જ નક્કી કરેલો ટેરિફ ચૂકવતું રહેશે, જ્યારે અમેરિકા કોઈ ટેરિફ આપશે નહીં.
પીએમ મોદીના વખાણ પણ ટેરિફમાં કોઈ છૂટ નહીં
પ્રેસ કોન્ફરન્સ દરમિયાન જ્યારે ટ્રમ્પને પૂછવામાં આવ્યું કે શું સુપ્રીમ કોર્ટના નિર્ણયની અસર ભારત સાથેની ડીલ પર પડશે? ત્યારે તેમણે આક્રમક અંદાજમાં કહ્યું, “કંઈ જ બદલાશે નહીં. તેઓ ટેરિફ આપતા રહેશે અને અમે નહીં આપીએ.” ટ્રમ્પે વડાપ્રધાન નરેન્દ્ર મોદીના વખાણ કરતા તેમને ‘મહાન વ્યક્તિ’ અને ‘સ્માર્ટ નેતા’ ગણાવ્યા હતા, પરંતુ સાથે જ ઉમેર્યું કે અગાઉ ભારત અમેરિકાનો ફાયદો ઉઠાવી રહ્યું હતું, જે હવે બંધ થઈ ગયું છે. ટ્રમ્પના મતે, હવે થયેલી ડીલ એકદમ યોગ્ય છે અને તે વસૂલાત ચાલુ રહેશે.
શું ભારત માટે ટેરિફ 18% થી ઘટીને 10% થશે?
અત્યારે સૌથી મોટો પ્રશ્ન એ છે કે શું ભારત પરનો ટેરિફ રેટ ઘટશે? અમેરિકા અને ભારત વચ્ચે થયેલી ટ્રેડ ડીલ મુજબ, ભારતીય સામાન પર 18% ટેરિફ લગાવવાની વાત હતી (જે અગાઉના 50% કરતા ઓછો હતો). પરંતુ હવે ટ્રમ્પે સમગ્ર વિશ્વ માટે 10% ગ્લોબલ ટેરિફની જાહેરાત કરી છે. કાયદાકીય નિષ્ણાતોનું માનવું છે કે જો ગ્લોબલ ટેરિફ 10% હોય, તો ભારત જેવા પાર્ટનર દેશોને પણ તેનો લાભ મળવો જોઈએ અને ટેરિફ રેટ ઘટીને 10% પર આવવો જોઈએ.
ટ્રમ્પની નવી ચાલ: 10% ટેરિફ માત્ર કામચલાઉ?
વ્હાઇટ હાઉસના અધિકારીઓના જણાવ્યા અનુસાર, ટ્રમ્પે જાહેર કરેલો 10% ગ્લોબલ ટેરિફ કદાચ કાયમી નથી. ટ્રમ્પ પ્રશાસન એવા કાયદાકીય રસ્તાઓ શોધી રહ્યું છે જેના દ્વારા ભારત જેવા દેશો પાસેથી અગાઉ નક્કી થયેલા ઊંચા ટેરિફ રેટ (જેમ કે 18%) વસૂલી શકાય. સુપ્રીમ કોર્ટના નિર્ણય બાદ ટ્રમ્પ હવે ‘સેક્શન 122’ જેવા કાયદાઓનો ઉપયોગ કરીને પોતાની શરતો મનાવવા માટે મક્કમ દેખાઈ રહ્યા છે.
