બાંગ્લાદેશ ક્રિકેટમાં મોટી કાર્યવાહી: યૌન ઉત્પીડનના આરોપમાં પૂર્વ ક્રિકેટર મંજુરુલ ઇસ્લામ પર પ્રતિબંધ
બાંગ્લાદેશ ક્રિકેટ બોર્ડ (BCB) એ રમત જગતમાં શિસ્ત અને સુરક્ષાના મુદ્દે કડક વલણ અપનાવતા પૂર્વ ક્રિકેટર મંજુરુલ ઇસ્લામ પર તમામ પ્રકારની ક્રિકેટ પ્રવૃત્તિઓ માટે પ્રતિબંધ લાદી દીધો છે. રવિવારે શેર-એ-બાંગ્લા નેશનલ ક્રિકેટ સ્ટેડિયમ ખાતે મળેલી બોર્ડની બેઠકમાં આ ઐતિહાસિક નિર્ણય લેવામાં આવ્યો હતો.
જહાનારા આલમના આરોપો અને તપાસ સમિતિનો અહેવાલ
આ સમગ્ર વિવાદની શરૂઆત ત્યારે થઈ જ્યારે બાંગ્લાદેશ મહિલા ટીમની પૂર્વ કેપ્ટન જહાનારા આલમે મંજુરુલ ઇસ્લામ સામે યૌન ઉત્પીડનના ગંભીર આક્ષેપો કર્યા હતા. જહાનારાના જણાવ્યા અનુસાર, 2022ના વર્લ્ડ કપ દરમિયાન તત્કાલીન સિલેક્ટર અને ટીમ મેનેજર તરીકે કાર્યરત મંજુરુલ ઇસ્લામનું વર્તન અત્યંત અયોગ્ય હતું.
BCB દ્વારા રચવામાં આવેલી સ્વતંત્ર તપાસ સમિતિએ આ મામલે ઊંડાણપૂર્વક તપાસ કરી હતી.જહાનારા દ્વારા લગાવવામાં આવેલા ચાર આક્ષેપોમાંથી બે આક્ષેપોમાં સત્યતા જણાઈ હતી.સમિતિએ નોંધ્યું કે મંજુરુલનું વર્તન વ્યાવસાયિક ધોરણોની વિરુદ્ધ હતું અને સુપ્રીમ કોર્ટની ગાઈડલાઈન્સ મુજબ તે ‘ઉત્પીડન’ની વ્યાખ્યામાં આવે છે.જોકે, અન્ય બે આક્ષેપો પુરાવાના અભાવે સાબિત થઈ શક્યા નહોતા.
મહિલા BPL ની જાહેરાત: એપ્રિલમાં જામશે જંગ
શિસ્તભંગની કાર્યવાહીની સાથે જ BCB એ મહિલા ક્રિકેટને પ્રોત્સાહન આપવા માટે એક મોટો નિર્ણય લીધો છે. દેશમાં પ્રથમવાર મહિલા બાંગ્લાદેશ પ્રીમિયર લીગ (BPL) નું આયોજન કરવામાં આવશે.
તારીખ: 4 એપ્રિલ થી 14 એપ્રિલ, 2026
સ્થળ: ઢાકા અને ચટ્ટોગ્રામ
હેતુ: મહિલા ક્રિકેટરોને વૈશ્વિક સ્તરનું પ્લેટફોર્મ પૂરું પાડવું.
પસંદગી સમિતિમાં ફેરફારના સંકેત
બોર્ડે નેશનલ સિલેક્શન પેનલના અધ્યક્ષ ગાઝી અશરફ હુસૈનની મુદતમાં એક મહિનાનો વધારો કર્યો છે. સૂત્રોના જણાવ્યા અનુસાર, પૂર્વ રાષ્ટ્રીય સિલેક્ટર હબીબુલ બશાર આગામી સમયમાં આ મહત્વની જવાબદારી સંભાળી શકે છે.
