ગાંધીનગરમાં મોર્નિંગ વોક પર નિકળેલા અધિકારીને જોઇને પોલીસે શું કર્યું જાણો…

ગાંધીનગર – ગાંધીનગરમાં કોરોના સંક્રમણના કેસો વધતાં શહેર અને જિલ્લાને રેડઝોનમાં મૂકી દેવામાં આવ્યું છે અને લોકડાઉનનો કડક અમલ શરૂ કરવામાં આવ્યો છે છતાં લોકડાઉન ભંગના અનેક કિસ્સા સામે આવે છે. ખુદ સરકારી અધિકારીઓ હવે તો ભંગ કરી રહ્યાં છે. મોર્નિંગ અને ઇવનિંગ વોકમાં નિકળતા અધિકારીઓ પોલીસની ઝપટમાં આવી રહ્યાં છે.ગાંધીનગરમાં મોર્નિંગ વોકમાં નિકળેલા એક અધિકારીને પેટ્રોલિંગ કરી રહેલી પોલીસે રોક્યા હતા અને પૂછ્યું હતું કે લોકડાઉન છે છતાં તમે ઘરની બહાર કેમ નિકળ્યાં છે. આ અધિકારીએ કહ્યું કે – તમે જુઓ છો, હું મોર્નિંગ વોક કરૂં છું. પોલીસે કહ્યું પરંતુ અત્યારે આ બધી પ્રવૃત્તિ પર પ્રતિબંધ છે તમે આમ નિકળી શકો નહીં. પોલીસે આવું બોલતાં એ અધિકારીનો પિત્તો ગયો અને હોદ્દાનો ઉપયોગ કરી પોલીસ કર્મચારીને ધમકી આપી તેમ છતાં પોલીસ કર્મચારી ગભરાયો નહીં અને કહ્યું—સાહેબ તમે મને સસ્પેન્ડ કરાવી શકો છો પરંતુ લોકડાઉનનું પાલન તો હું કરાવીને રહીશ. છેવટે આ પોલીસ કર્મચારીએ અધિકારી સામે ફરિયાદ દાખલ કરી હતી. છેલ્લા એક સપ્તાહમાં મોર્નિંગ વોક કરતાં કુલ 10 ઓફિસરો પોલીસની ઝપટમાં આવી ચૂક્યાં છે.ગાંધીનગરમાં લોકડાઉન ભંગના રોજના 30 થી 40 કિસ્સા નોંધાય છે. હવે પોલીસ સવારે અને સાંજે પેટ્રોલિંગ પર નિકળે છે ત્યારે મોર્નિંગ વોક કરતાં અધિકારી અને કર્મચારીઓ બહાર આવતા દેખાય છે. ઘણાં કિસ્સામાં અધિકારીઓ છટકી જાય છે પરંતુ પ્રામાણિકતાથી પાલન કરાવતા પોલીસ કર્મચારીની ઝપટે પણ અધિકારી આવી જાય છે. મહત્વની બાબત એવી હતી કે ગાંધીનગરમાં વહીવટી તંત્રએ માસ્ક ફરજીયાત બનાવ્યું હોવા છતાં આ અધિકારીએ માસ્ક પહેર્યું ન હતું અને રોફ જમાવતા નજરે પડ્યા હતા.