પશ્ચિમ બંગાળમાં મતદાર વેરિફિકેશન પર સુપ્રીમ કોર્ટનો મોટો નિર્ણય: ઓડિશા-ઝારખંડથી આવશે જજ
પશ્ચિમ બંગાળમાં આગામી વિધાનસભા ચૂંટણી પહેલા મતદાર યાદીને શુદ્ધ કરવાની પ્રક્રિયા તેજ બની છે. ચૂંટણી પંચના ‘સ્પેશિયલ ઇન્ટેન્સિવ રિવિઝન’ (SIR) હેઠળ મતદાર યાદીમાં નોંધાયેલા વાંધાઓની તપાસ કરવા માટે સુપ્રીમ કોર્ટે કલકત્તા હાઈકોર્ટને વિશેષ સત્તા આપી છે. સુપ્રીમ કોર્ટે કલકત્તા હાઈકોર્ટના ચીફ જસ્ટિસને ત્રણ વર્ષનો અનુભવ ધરાવતા સિવિલ જજોને તૈનાત કરવાની મંજૂરી આપી છે. એટલું જ નહીં, જો જરૂર પડે તો ઝારખંડ અને ઓડિશાના ચીફ જસ્ટિસ પાસેથી ન્યાયિક અધિકારીઓની મદદ લેવાની પણ છૂટ આપી છે.
કેમ પડી વધારાના જજોની જરૂર?
ભારતના મુખ્ય ન્યાયાધીશ (CJI) સૂર્યકાંતની આગેવાની હેઠળની બેન્ચે આ સૂચનાઓ ત્યારે જારી કરી જ્યારે કલકત્તા હાઈકોર્ટના ચીફ જસ્ટિસે અધિકારીઓની અછત હોવાનું જણાવ્યું હતું. હકીકતમાં, પશ્ચિમ બંગાળમાં ‘લોજિકલ ડિસ્ક્રીપન્સી’ શ્રેણી હેઠળ 50 લાખથી વધુ વાંધા અરજીઓ આવી છે. હાઈકોર્ટનું કહેવું હતું કે જો 250 ન્યાયિક અધિકારીઓ પણ આ કામમાં લાગે, તો પણ આ પ્રક્રિયા પૂરી કરવામાં લગભગ 80 દિવસનો સમય લાગી શકે તેમ છે. સમયમર્યાદામાં આ કામ પૂરું કરવા માટે વધુ મેનપાવરની જરૂરિયાત હતી.
પડોશી રાજ્યોની ભૂમિકા અને ખર્ચ
સુપ્રીમ કોર્ટે સ્પષ્ટ કર્યું છે કે કલકત્તા હાઈકોર્ટ ઓડિશા અને ઝારખંડ હાઈકોર્ટના ચીફ જસ્ટિસનો સંપર્ક કરીને ત્યાંના વર્તમાન અથવા નિવૃત્ત ન્યાયિક અધિકારીઓની સેવાઓ માંગી શકે છે. આ અધિકારીઓના પ્રવાસ, રહેવા-જમવાની વ્યવસ્થા અને માનદ વેતન (Honorarium) સહિતનો તમામ ખર્ચ ભારતીય ચૂંટણી પંચ (ECI) દ્વારા ઉઠાવવામાં આવશે. સુપ્રીમ કોર્ટે ઓડિશા અને ઝારખંડના ચીફ જસ્ટિસને પણ વિનંતી કરી છે કે જો કલકત્તા હાઈકોર્ટ તરફથી કોઈ વિનંતી આવે, તો તેના પર સકારાત્મક વિચાર કરવામાં આવે.
સમયસર વેરિફિકેશનનું મહત્વ
ન્યાયિક મેનપાવર વધારવાનો મુખ્ય હેતુ એ છે કે આગામી વિધાનસભા ચૂંટણી પહેલા મતદાર યાદી એકદમ સચોટ અને વિવાદમુક્ત હોય. લાખોની સંખ્યામાં આવેલા વાંધાઓનું વેરિફિકેશન જો સમયસર નહીં થાય, તો ચૂંટણી પ્રક્રિયા પર તેની અસર પડી શકે છે. સુપ્રીમ કોર્ટના આ એક્શનથી હવે આશા છે કે પશ્ચિમ બંગાળમાં મતદાર યાદી સુધારવાનું કામ ઝડપથી અને પારદર્શક રીતે પૂર્ણ થશે.
