મારુતિ બ્રેઝાનું નવું અવતાર: લક્ઝરી ફીચર્સ અને શાનદાર માઈલેજ સાથે બજારમાં મચાવશે ધૂમ
ભારતીય ઓટોમોબાઈલ માર્કેટમાં મારુતિ સુઝુકી તેની સૌથી લોકપ્રિય SUV બ્રેઝાનું અપડેટેડ વર્ઝન લોન્ચ કરવાની તૈયારી કરી રહી છે. 2022માં લોન્ચ થયેલી બીજી જનરેશનની સફળતા બાદ, હવે કંપની ગ્રાહકોને વધુ પ્રીમિયમ અનુભવ આપવા માટે તેમાં મોટા ફેરફારો કરવા જઈ રહી છે. ટેસ્ટિંગ દરમિયાન જોવા મળેલી તસવીરો મુજબ, આ નવી બ્રેઝા માત્ર દેખાવમાં જ નહીં પણ ફીચર્સમાં પણ હાઈ-ટેક હશે.
ડિઝાઇનમાં જોવા મળશે આધુનિક ફેરફાર
નવી બ્રેઝાનો મૂળ લુક જાળવી રાખીને તેના આગળ અને પાછળના ભાગમાં મહત્વના ફેરફારો કરવામાં આવ્યા છે. તેમાં નવું આકર્ષક બમ્પર અને નવી ડિઝાઈન કરેલી ફ્રન્ટ ગ્રિલ જોવા મળશે. જોકે, પાછળના ભાગમાં કનેક્ટેડ ટેલ લેમ્પ્સની અછત વર્તાઈ શકે છે, પરંતુ એકંદરે કારનો લુક પહેલા કરતા વધુ બોલ્ડ અને પ્રીમિયમ લાગશે.
પ્રીમિયમ ઇન્ટિરિયર અને મોટી ટચસ્ક્રીન
કારની અંદર પ્રવેશતા જ તમને એક લક્ઝરી ફીલ આવશે. નવા સેન્ટર કન્સોલ અને અપડેટેડ સીટિંગ અરેન્જમેન્ટ સાથે ઇન્ટિરિયરને નવો લુક આપવામાં આવ્યો છે. સૌથી મોટું આકર્ષણ તેની મોટી ઇન્ફોટેનમેન્ટ ટચસ્ક્રીન હશે, જે વાયરલેસ એપલ કારપ્લે અને એન્ડ્રોઇડ ઓટોને સપોર્ટ કરશે. આ સિવાય હેડ-અપ ડિસ્પ્લે, ક્રુઝ કંટ્રોલ, ઓટોમેટિક એસી અને સિંગલ-પેનલ સનરૂફ જેવા ફીચર્સ મુસાફરીને વધુ આરામદાયક બનાવશે.
વેન્ટિલેટેડ સીટ્સ: હવે ગરમીમાં પણ મળશે ઠંડક
મારુતિએ આ વખતે ગ્રાહકોની સુવિધા પર વિશેષ ધ્યાન આપ્યું છે. નવી બ્રેઝામાં વેન્ટિલેટેડ ફ્રન્ટ સીટ્સ આપવામાં આવશે, જે આ સેગમેન્ટની અન્ય કાર જેવી કે મહિન્દ્રા XUV3XO અને હ્યુન્ડાઈ વેન્યુને ટક્કર આપશે. આ ફીચર ખાસ કરીને ભારતના ગરમ વાતાવરણમાં ડ્રાઈવર અને પેસેન્જર માટે વરદાન સાબિત થશે.
એન્જિન અને પાવરટ્રેનમાં નવો વિકલ્પ
એન્જિનની વાત કરીએ તો, તેમાં ભરોસાપાત્ર 1.5-લિટર પેટ્રોલ એન્જિન યથાવત રાખવામાં આવશે. હાલમાં તે 5-સ્પીડ મેન્યુઅલ અને 6-સ્પીડ ઓટોમેટિક ટ્રાન્સમિશન સાથે આવે છે, પરંતુ એવી ચર્ચા છે કે હવે તેમાં 6-સ્પીડ મેન્યુઅલ ગિયરબોક્સનો વિકલ્પ પણ ઉમેરાઈ શકે છે. આ ઉપરાંત, પર્ફોર્મન્સ પ્રેમીઓ માટે 1.0-લિટર ટર્બો એન્જિનની શક્યતા પણ નકારી શકાય તેમ નથી.
સીએનજી વેરિઅન્ટમાં મળશે વધુ બૂટ સ્પેસ
સીએનજી કાર ખરીદનારાઓ માટે સૌથી મોટી સમસ્યા સામાન રાખવાની જગ્યા (બૂટ સ્પેસ) ની હોય છે. મારુતિ આ સમસ્યાનો ઉકેલ લાવવા માટે અન્ડરબોડી સીએનજી ટેન્ક ટેકનોલોજીનો ઉપયોગ કરી રહી છે. આ ટેકનોલોજીમાં ગેસની ટેન્કને કારની નીચેના ભાગમાં ફિટ કરવામાં આવશે, જેનાથી સીએનજી મોડલ હોવા છતાં તમને સામાન રાખવા માટે પૂરતી જગ્યા મળી રહેશે.
