‘મારા વહાલા પતિ’, રશ્મિકા મંદાના અને વિજય દેવરકોંડાએ શેર કરી લગ્નની તસવીરો; પ્રેમમાં ડૂબ્યું ફિલ્મી જોડું
લાંબા સમયની અટકળો અને ચાહકોની આતુરતાનો અંત આવ્યો છે. સાઉથ અને બોલિવૂડના સુપરસ્ટાર રશ્મિકા મંદાના અને વિજય દેવરકોંડા આજે લગ્નના પવિત્ર બંધનમાં બંધાઈ ગયા છે. ઉદયપુરમાં શાહી ઠાઠ સાથે યોજાયેલા આ લગ્નની તસવીરો સોશિયલ મીડિયા પર વાયરલ થઈ રહી છે. રશ્મિકાએ પોતાના ઇન્સ્ટાગ્રામ પર લગ્નની સુંદર તસવીરો શેર કરવાની સાથે એક અત્યંત ભાવુક નોંધ પણ લખી છે, જેણે નેટીઝન્સના દિલ જીતી લીધા છે.
ઉદયપુરના ભવ્ય પેલેસમાં યોજાયો શાહી વિવાહ
રશ્મિકા અને વિજયના લગ્ન છેલ્લા બે દિવસથી ઉદયપુરની પ્રખ્યાત હોટેલ ‘ITC મેમેન્ટોસ’માં ચાલી રહ્યા હતા. ગતરોજ હળદી અને મહેંદીની સેરેમની ધામધૂમથી ઉજવવામાં આવી હતી, જેના વીડિયો અને ફોટાએ ઇન્ટરનેટ પર ધૂમ મચાવી હતી. આજે આ કપલે સત્તાવાર રીતે એકબીજાનો હાથ પકડીને નવી જિંદગીની શરૂઆત કરી છે. રશ્મિકાએ ફોટા શેર કરતા લખ્યું કે, તે દુનિયાની સૌથી નસીબદાર સ્ત્રી છે જેને વિજય જેવો જીવનસાથી મળ્યો છે.
રશ્મિકાની ભાવુક પોસ્ટ: ‘વિજ્જુ, હું તારી પત્ની બનીને ઉત્સાહિત છું’
પોતાના પતિનો પરિચય કરાવતા રશ્મિકાએ લખ્યું, “નમસ્કાર વહાલા લોકો, હું તમને મારા પતિ મિસ્ટર વિજય દેવરકોંડા સાથે મળાવવા માંગુ છું. એવો માણસ જેણે મને સાચો પ્રેમ કરતા શીખવ્યું, જેણે મને શાંતિથી રહેતા અને મોટા સપના જોતા શીખવ્યું. વિજ્જુ, તે મારા પર મારા કરતા પણ વધુ વિશ્વાસ કર્યો છે. તે મને ક્યારેય બેફિકર થઈને નાચતા રોકી નથી. હું જે સ્ત્રી બનવાનું સપનું જોતી હતી, આજે તારા કારણે હું એ બની શકી છું. તારી પત્ની કહેવડાવવામાં મને ગર્વ છે. ચાલો સાથે મળીને શ્રેષ્ઠ જીવન જીવીએ.”
6 વર્ષની દોસ્તી હવે પ્રેમમાં પરિણમી
રશ્મિકા મંદાના અને વિજય દેવરકોંડાની લવ સ્ટોરી કોઈ ફિલ્મી વાર્તાથી ઓછી નથી. બંને 2018માં આવેલી સુપરહિટ ફિલ્મ ‘ગીતા ગોવિંદમ’ના સેટ પર મળ્યા હતા. ત્યારથી તેમની દોસ્તી ગાઢ બની હતી. જોકે, બંનેએ ક્યારેય જાહેરમાં પોતાના સંબંધો વિશે વાત કરી નહોતી, પરંતુ અવારનવાર વેકેશન પર સાથે જવું અને એકબીજાની પોસ્ટ પર કોમેન્ટ કરવાથી ચાહકોને અણસાર આવી ગયો હતો. હવે આ ‘રૂમર્ડ કપલ’ સત્તાવાર રીતે પતિ-પત્ની બની ગયું છે.
View this post on Instagram
ચાહકો અને સેલેબ્સ તરફથી મળી રહી છે શુભેચ્છાઓ
જેવા રશ્મિકાએ લગ્નના ફોટા શેર કર્યા, કે તરત જ સોશિયલ મીડિયા પર અભિનંદનની વર્ષા શરૂ થઈ ગઈ છે. સામંથા રૂથ પ્રભુ, અલ્લુ અર્જુન અને બોલિવૂડના અનેક સિતારાઓએ આ નવદંપતીને શુભેચ્છા પાઠવી છે. ચાહકો પણ આ જોડીને ‘મેડ ફોર ઈચ અધર’ ગણાવી રહ્યા છે. દક્ષિણ ભારતથી લઈને ઉત્તર ભારત સુધી આજે માત્ર આ ‘નેશનલ ક્રશ’ના લગ્નની જ ચર્ચા જોવા મળી રહી છે.
