ટીમ ઈન્ડિયાની હાર બાદ કેપ્ટન ગુસ્સામાં: ખરાબ બેટિંગ પર ઠીકરું ફોડતા કહ્યું – ‘અમે વારંવાર એક જ ભૂલો કરી રહ્યા છીએ’
ભારતીય મહિલા ક્રિકેટ ટીમને ઓસ્ટ્રેલિયા સામેની વનડે શ્રેણીની બીજી મેચમાં 5 વિકેટે કારમી હારનો સામનો કરવો પડ્યો છે. આ હાર સાથે જ ટીમ ઈન્ડિયાએ શ્રેણી પણ ગુમાવી દીધી છે. મેચ બાદ ભારતીય કેપ્ટન હરમનપ્રીત કૌર ખૂબ જ નિરાશ જણાઈ હતી અને તેણે ટીમની નબળી બેટિંગને હારનું મુખ્ય કારણ ગણાવ્યું હતું. હરમનપ્રીતે સ્પષ્ટ શબ્દોમાં સ્વીકાર્યું કે ટીમ મેદાન પર જૂની ભૂલોનું પુનરાવર્તન કરી રહી છે.
બેટિંગમાં ફેલ ગઈ ટીમ ઈન્ડિયાની રણનીતિ
ભારતીય મહિલા ટીમ હાલમાં ઓસ્ટ્રેલિયાના પ્રવાસે છે. ટી20 શ્રેણી 2-1થી જીત્યા બાદ વનડે શ્રેણીમાં ટીમ પાસેથી ઘણી અપેક્ષાઓ હતી, પરંતુ શરૂઆતની બંને મેચોમાં ભારતને પરાજય મળ્યો છે. હોબાર્ટમાં રમાયેલી બીજી વનડેમાં ટોસ જીતીને પહેલા બેટિંગ કરવાનો નિર્ણય ખોટો સાબિત થયો હતો. ભારતીય ટીમ નિર્ધારિત 50 ઓવરમાં માત્ર 251 રન જ બનાવી શકી હતી. ઓસ્ટ્રેલિયાએ આ લક્ષ્યાંક 5 વિકેટ ગુમાવીને આસાનીથી પાર પાડી લીધો હતો.
‘અમે 300 રન બનાવવા માંગતા હતા પણ…’ : હરમનપ્રીત
મેચ બાદ પ્રેઝન્ટેશન દરમિયાન હરમનપ્રીત કૌરે કહ્યું, “એ વાત સાચી છે કે અમે આ મેચમાં બિલકુલ સારી બેટિંગ નથી કરી. અમે ટોસ જીતીને પહેલા બેટિંગ કરવાનો નિર્ણય લીધો હતો કારણ કે અમારું લક્ષ્ય 300 કે તેથી વધુ રન બનાવવાનું હતું. આ મેચની પિચ અગાઉની મેચો કરતા બેટિંગ માટે ઘણી સારી હતી. તેમ છતાં અમે મોટો સ્કોર બનાવી શક્યા નહીં કારણ કે મધ્ય ઓવરોમાં અમે સતત વિકેટો ગુમાવી દીધી. અમે સતત એ જ ભૂલો દોહરાવી રહ્યા છીએ જે પાછલી મેચોમાં કરી હતી.”
હાર વચ્ચે પણ પોઝિટિવ પાસાઓ શોધતી કેપ્ટન
ભલે ટીમને હાર મળી હોય, પરંતુ હરમનપ્રીત હજુ પણ આશાવાદી છે. તેણે આગળ ઉમેર્યું, “હાર છતાં અમારા માટે કેટલીક બાબતો સકારાત્મક રહી છે. ઘણી યુવા ખેલાડીઓ આગળ આવીને પોતાની જાતને સાબિત કરવાનો પ્રયાસ કરી રહી છે. મારે માત્ર એટલું જ કહેવું છે કે આપણે આપણી પ્રક્રિયાને યોગ્ય રાખવી પડશે. જો આપણે બેટિંગમાં સારું પ્રદર્શન કરીએ છીએ, તો પરિણામો આપણા પક્ષમાં ચોક્કસ આવશે. હવે અમારી નજર ત્રીજી મેચ પર છે.”
