NZ vs ENG: ‘કરો અથવા મરો’ મેચમાં ન્યૂઝીલેન્ડનો ધબડકો, માત્ર 159 રન જ બનાવી શક્યું; પાકિસ્તાનની આશા જીવંત
ટી20 વર્લ્ડ કપ 2026ના સેમીફાઈનલના સમીકરણો હવે અત્યંત રસપ્રદ બન્યા છે. ઇંગ્લેન્ડ વિરુદ્ધની અત્યંત મહત્વની મેચમાં ન્યૂઝીલેન્ડની ટીમ નિર્ધારિત ઓવરોમાં માત્ર 159 રન જ બનાવી શકી છે. સેમીફાઈનલની રેસમાં ટકી રહેવા માટે કીવી ટીમ માટે આ સ્કોર ડિફેન્ડ કરવો અનિવાર્ય છે. બીજી તરફ, ન્યૂઝીલેન્ડનો આ ઓછો સ્કોર પાકિસ્તાન માટે સારા સમાચાર લાવ્યો છે, કારણ કે પાકિસ્તાનનું ભાવિ આજે ન્યૂઝીલેન્ડની હાર પર ટકેલું છે.
કોઈ બેટ્સમેન 40 રન સુધી પણ ન પહોંચી શક્યો
કોલંબોના આર. પ્રેમદાસા સ્ટેડિયમમાં રમાઈ રહેલી આ મેચમાં ન્યૂઝીલેન્ડે ટોસ જીતીને પ્રથમ બેટિંગ કરવાનો નિર્ણય લીધો હતો. ટીમ સાઈફર્ટ (35 રન) અને ફિન એલન (29 રન) એ 64 રનની મજબૂત ભાગીદારી કરીને ટીમને સારી શરૂઆત અપાવી હતી. જોકે, માત્ર 2 રનના અંતરે આ બંને ઓપનરો આઉટ થતા જ કીવી ટીમ મુશ્કેલીમાં મુકાઈ ગઈ હતી. ગ્લેન ફિલિપ્સે 28 બોલમાં 39 રન ફટકારી થોડો સંઘર્ષ કર્યો હતો, પરંતુ તે પણ મોટી ઇનિંગ રમવામાં નિષ્ફળ રહ્યો હતો. આખી ઇનિંગમાં ન્યૂઝીલેન્ડનો એક પણ બેટ્સમેન 40 રનના આંકડાને સ્પર્શી શક્યો નહોતો.
ઇંગ્લિશ સ્પિનરોની જાળમાં ફસાઈ કીવી ટીમ
આ મેચમાં ઇંગ્લેન્ડની રણનીતિ સ્પષ્ટ દેખાઈ આવતી હતી. ઇંગ્લેન્ડના સ્પિનરોએ ન્યૂઝીલેન્ડના રન રેટ પર બ્રેક લગાવી દીધી હતી. રસપ્રદ વાત એ છે કે, ન્યૂઝીલેન્ડની તમામ વિકેટો ઇંગ્લેન્ડના સ્પિનરોએ જ ઝડપી હતી.
- રેહાન અહેમદ અને આદિલ રશીદ: બંનેએ 2-2 મહત્વની વિકેટો ઝડપી.
- ‘વિલ જેક્સ: તેણે પણ 2 બેટ્સમેનોને પેવેલિયન ભેગા કર્યા.
- લિયામ ડોસન: તેને 1 વિકેટ મળી.
પાકિસ્તાન માટે કેમ છે આ સારા સમાચાર?
ન્યૂઝીલેન્ડ દ્વારા બનાવવામાં આવેલા આ 159 રને પાકિસ્તાન ટીમની ચિંતામાં ઘટાડો કર્યો છે. જો આજે ઇંગ્લેન્ડ આ લક્ષ્યાંકનો પીછો કરી લે છે અને ન્યૂઝીલેન્ડ હારી જાય છે, તો પાકિસ્તાનની સેમીફાઈનલમાં પહોંચવાની આશા જીવંત રહેશે. ન્યૂઝીલેન્ડે બહુ મોટો સ્કોર બનાવ્યો ન હોવાથી ઇંગ્લેન્ડ માટે આ જીત આસાન જણાઈ રહી છે, જે આડકતરી રીતે પાકિસ્તાન માટે ફાયદાકારક સાબિત થશે.
હવે જોવાનું એ રહેશે કે ન્યૂઝીલેન્ડના બોલરો આ નાનકડા સ્કોરને બચાવીને પોતાની ટીમને સેમીફાઈનલની રેસમાં રાખે છે કે પછી ઇંગ્લેન્ડ આ મેચ જીતીને પાકિસ્તાન માટે રસ્તો સાફ કરે છે.
