IND vs AUS: ઓસ્ટ્રેલિયાની નવી રણનીતિ! ભારત સામે ત્રીજી વનડેમાં 19 વર્ષીય ઘાતક બોલર કરી શકે છે ડેબ્યૂ
ભારતીય મહિલા ક્રિકેટ ટીમ અત્યારે ઓસ્ટ્રેલિયાના પ્રવાસે છે, જ્યાં બંને ટીમો વચ્ચે વનડે શ્રેણી ખેલાઈ રહી છે. ત્રણ મેચોની આ શ્રેણીમાં ઓસ્ટ્રેલિયા 2-0 થી આગળ છે અને હવે રવિવારે, 1 માર્ચના રોજ હોબાર્ટના બેલરિવ ઓવલ મેદાન પર અંતિમ મુકાબલો રમાશે. આ મેચ પહેલા ઓસ્ટ્રેલિયન કેમ્પમાંથી મોટા સમાચાર મળી રહ્યા છે. કાંગારૂ ટીમ ભારત વિરુદ્ધ ક્લીન સ્વીપ કરવાના ઈરાદા સાથે 19 વર્ષીય યુવા તેજ બોલર લૂસી હેમિલ્ટનને મેદાનમાં ઉતારી શકે છે.
ઈજાના કારણે લૂસીને મળી તક
ઓસ્ટ્રેલિયન ટીમ અત્યારે ઈજાની સમસ્યાઓથી ઘેરાયેલી છે. સ્ટાર ઓલરાઉન્ડર એલિસ પેરી અને તેજ બોલર કિમ ગર્થ ‘ક્વાડ ઈન્જરી’ (સ્નાયુની ઈજા) ના કારણે ટીમની બહાર છે. આ પરિસ્થિતિમાં પસંદગીકારોએ 19 વર્ષીય લૂસી હેમિલ્ટન પર ભરોસો મૂક્યો છે. લૂસી છેલ્લા કેટલાક દિવસોથી ટીમ સાથે સતત પ્રેક્ટિસ કરી રહી છે. બીજા વનડે દરમિયાન તેણે નેટ્સમાં કલાકો સુધી પરસેવો પાડ્યો હતો, જે તેના ડેબ્યૂના સ્પષ્ટ સંકેત આપે છે.
ઓસ્ટ્રેલિયન પસંદગીકાર શૉન ફ્લેગલરે એક ચેનલ સાથેની વાતચીતમાં જણાવ્યું હતું કે, “ત્રીજી વનડેમાં લૂસીને રમતી જોવાની પૂરેપૂરી શક્યતા છે. તે અપેક્ષા કરતા વહેલી ટીમમાં સામેલ થઈ છે, પરંતુ અમે તેની ક્ષમતા જોવા માટે આતુર છીએ. તેનું ભવિષ્ય ઉજ્જવળ છે.”
બેલરિવ ઓવલની પિચ અને ટીમમાં ફેરફાર
ત્રીજી વનડે જૂની પિચ પર રમાવાની શક્યતા છે. જો પિચ ધીમી રહેશે તો લેગ સ્પિનર જ્યોર્જિયા વેરહામને પ્લેઈંગ-11 માં સ્થાન મળી શકે છે. બીજી તરફ, ટીમ મેનેજમેન્ટ પર્થમાં રમાનાર ડે-નાઈટ ટેસ્ટને ધ્યાનમાં રાખીને મુખ્ય તેજ બોલર ડાર્સી બ્રાઉનને આરામ આપી શકે છે, કારણ કે તેણે આ પ્રવાસની તમામ પાંચેય મેચો રમી છે.
બીજી વનડેમાં નિકોલા કેરીને તક મળી હતી, પરંતુ તે મોંઘી સાબિત થઈ હતી. તેણે 8 ઓવરમાં 55 રન આપ્યા હતા. આવી સ્થિતિમાં લૂસી હેમિલ્ટનનું આગમન ઓસ્ટ્રેલિયન બોલિંગ એટેકને નવો જોશ આપી શકે છે. લૂસી પોતાની ગતિ અને સચોટ લાઇન-લેન્થ માટે જાણીતી છે, જે ભારતીય બેટ્સમેનો માટે મુશ્કેલી ઊભી કરી શકે છે.
ટ્રોફી સુરક્ષિત કરવા પર ઓસ્ટ્રેલિયાની નજર
મલ્ટી-ફોર્મેટ સીરીઝમાં ઓસ્ટ્રેલિયા હાલમાં 6-4 થી આગળ છે. જો ટીમ રવિવારની વનડે જીતી લે છે, તો તે પર્થ ટેસ્ટ પહેલા જ સીરીઝની ટ્રોફી પર પોતાનું નામ નિશ્ચિત કરી લેશે. બીજી તરફ, ભારતીય ટીમ માટે આ મેચ સાખ બચાવવાની લડાઈ છે. હરમનપ્રીત કૌરની સેના અંતિમ મેચ જીતીને આત્મવિશ્વાસ સાથે ટેસ્ટ મેચમાં ઉતરવા માંગશે.
ઓસ્ટ્રેલિયાની મહિલા વનડે ટીમ:
એલિસા હીલી (કેપ્ટન), સોફી મોલિનક્સ (વાઈસ કેપ્ટન), ડાર્સી બ્રાઉન, નિકોલા કેરી, એશ્લે ગાર્ડનર, લૂસી હેમિલ્ટન, અલાના કિંગ, ફોબે લિચફિલ્ડ, બેથ મૂની, તાહલિયા મેકગ્રા, મેગન શટ, એનાબેલ સધરલેન્ડ, જ્યોર્જિયા વોલ, જ્યોર્જિયા વેરહામ.
