થલપથી વિજય અને સંગીતાના છૂટાછેડાના સમાચાર વચ્ચે તૃષા કૃષ્ણનનું જૂનું નિવેદન વાયરલ
તમિલ સિનેમાના દિગ્ગજ અભિનેતા વિજય અને તેની પત્ની સંગીતા સોર્નાલિંગમ વચ્ચેના લગ્નજીવનમાં ભંગાણ પડ્યું હોવાના અહેવાલોથી દક્ષિણ ભારતીય ફિલ્મ ઉદ્યોગમાં ખળભળાટ મચી ગયો છે. શુક્રવારે આવેલા અહેવાલો અનુસાર, સંગીતાએ છૂટાછેડા માટે અરજી કરી છે, જેમાં તેણે આક્ષેપ કર્યો છે કે અભિનેતા અન્ય એક અભિનેત્રી સાથે “શારીરિક સંબંધ” માં છે. જોકે, અરજીમાં કોઈનું નામ સ્પષ્ટપણે લેવામાં આવ્યું નથી, પરંતુ સોશિયલ મીડિયા પર યુઝર્સે વિજયની લાંબા સમયની કો-સ્ટાર તૃષા કૃષ્ણનનું નામ આ ઘટના સાથે જોડવાનું શરૂ કરી દીધું છે.
શા માટે તૃષા કૃષ્ણનનું નામ ચર્ચામાં આવ્યું?
વિજય અને તૃષા વચ્ચેના સંબંધોની અફવાઓ પાછળનું મુખ્ય કારણ તેમની ઓન-સ્ક્રીન કેમિસ્ટ્રી અને લાંબો ઈતિહાસ છે. આ વિવાદની વચ્ચે તૃષાનું એક જૂનું ભાષણ સોશિયલ મીડિયા પર વાયરલ થઈ રહ્યું છે. ગયા વર્ષે દુબઈમાં યોજાયેલા SIIMA એવોર્ડ્સ દરમિયાન, જ્યાં તૃષા ફિલ્મ ઉદ્યોગમાં તેની 25મી વર્ષગાંઠની ઉજવણી કરી રહી હતી, તેણે વિજય વિશે કહ્યું હતું કે, “હું તેની નવી સફર માટે તેને શુભેચ્છા પાઠવું છું. તેના તમામ સપના સાચા થાય, કારણ કે તે ખરેખર તેના માટે લાયક (Deserve) છે.” તૃષાના આ શબ્દોને અત્યારે વર્તમાન પરિસ્થિતિ સાથે જોડીને જોવામાં આવી રહ્યા છે.
વિજય અને તૃષાની ઓન-સ્ક્રીન જોડી અને ભૂતકાળની અફવાઓ
એક સમયે વિજય અને તૃષા તમિલ સિનેમાની સૌથી લોકપ્રિય જોડી ગણાતી હતી. ‘ગિલ્લી’ (2004), ‘થિરુપાચી’ (2005), ‘આથી’ (2006) અને ‘કુરુવી’ (2008) જેવી ફિલ્મોએ તેમની જોડીને સુપરહિટ બનાવી હતી. જોકે, ‘કુરુવી’ પછી બંનેએ લાંબા સમય સુધી સાથે કામ કર્યું ન હતું. તે સમયે એવી ચર્ચા હતી કે વિજયના પરિવારે તેને તૃષાથી અંતર રાખવાની સલાહ આપી હતી. જોકે, બંને કલાકારોએ હંમેશા આ અફવાઓને નકારી છે અને પોતાને માત્ર “સારા મિત્રો” ગણાવ્યા છે. 15 વર્ષના લાંબા વિરામ બાદ 2023માં ફિલ્મ ‘લિયો’માં તેમની જોડી ફરી જોવા મળી હતી, જેણે જૂની યાદો તાજી કરી હતી.
વિજય અને સંગીતાના લગ્નજીવન વિશે
થલપથી વિજય અને સંગીતાના લગ્ન વર્ષ 1999માં થયા હતા. આ દંપતીને બે બાળકો છે – પુત્ર જેસન સંજય અને પુત્રી દિવ્યા સાશા. વિજય હંમેશા પોતાના અંગત જીવનને લાઈમલાઈટથી દૂર રાખવા માટે જાણીતો છે. અત્યાર સુધી છૂટાછેડાના અહેવાલો અથવા તૃષા સાથેના જોડાણ અંગે વિજય કે તૃષા તરફથી કોઈ સત્તાવાર પ્રતિક્રિયા આપવામાં આવી નથી. ચાહકો અત્યારે આ મામલે સત્તાવાર નિવેદનની રાહ જોઈ રહ્યા છે.
