IND vs ENG: શું વરસાદ બગાડશે ભારત-ઇંગ્લેન્ડ સેમીફાઈનલનો રોમાંચ? જાણો મુંબઈના હવામાનનો તાજો મિજાજ
T20 વર્લ્ડ કપ 2026ની બીજી સેમીફાઈનલ ભારત અને ઇંગ્લેન્ડ વચ્ચે મુંબઈના ઐતિહાસિક વાનખેડે સ્ટેડિયમમાં રમાવા જઈ રહી છે. આ હાઈ-વોલ્ટેજ મુકાબલાને લઈને ક્રિકેટ પ્રેમીઓમાં ભારે ઉત્સાહ જોવા મળી રહ્યો છે. 5 માર્ચના રોજ રમાનારી આ મેચમાં બંને ટીમો ફાઈનલની ટિકિટ મેળવવા માટે એડીચોટીનું જોર લગાવશે. જોકે, ફેન્સના મનમાં સૌથી મોટો સવાલ એ છે કે શું આ મહત્વની મેચમાં મેઘરાજા વિલન બનશે?
ફાઈનલની ટિકિટ માટે જંગ
આ સેમીફાઈનલમાં જે ટીમ વિજેતા બનશે તે સીધી ખિતાબી મુકાબલામાં પ્રવેશ કરશે. ઉલ્લેખનીય છે કે, પ્રથમ સેમીફાઈનલમાં ન્યુઝીલેન્ડે સાઉથ આફ્રિકાને 9 વિકેટે હરાવીને ફાઈનલમાં પોતાની જગ્યા પાકી કરી લીધી છે. ફિન એલનની તોફાની બેટિંગના સહારે ન્યુઝીલેન્ડ હવે કોલકાતામાં ફાઈનલ રમશે. હવે જોવાનું એ રહેશે કે ભારત સતત બીજી વાર ફાઈનલમાં પહોંચીને ન્યુઝીલેન્ડ સામે ટકરાશે કે પછી ઇંગ્લેન્ડ બાજી મારી જશે.
કેવું રહેશે મુંબઈનું હવામાન?
ક્રિકેટ ચાહકો માટે રાહતના સમાચાર છે. હવામાન વિભાગ અને એક્યુવેધરના રિપોર્ટ અનુસાર, મેચ દરમિયાન મુંબઈમાં વરસાદની શક્યતા નહિવત છે. આકાશ ચોખ્ખું રહેવાની ધારણા છે, જેનો અર્થ છે કે દર્શકોને પૂરેપૂરી 40 ઓવરની રમત જોવા મળી શકે છે.
તાપમાનની વાત કરીએ તો તે 27 ડિગ્રી સેલ્સિયસની આસપાસ રહેશે, જે ખેલાડીઓ માટે અનુકૂળ છે. જોકે, મુંબઈના દરિયાકાંઠાના વિસ્તારને કારણે ભેજનું પ્રમાણ 70% થી વધુ રહી શકે છે. આ ભેજને કારણે ફિલ્ડરો અને ફાસ્ટ બોલરોને થોડી મુશ્કેલી પડી શકે છે, કારણ કે ઝાકળ ફેક્ટર પણ મેચમાં મહત્વની ભૂમિકા ભજવી શકે છે.
ભારતીય ટીમ
સૂર્યકુમાર યાદવ (કેપ્ટન), અભિષેક શર્મા, તિલક વર્મા, સંજુ સેમસન, શિવમ દુબે, ઈશાન કિશન, હાર્દિક પંડ્યા, અર્શદીપ સિંહ, જસપ્રિત બુમરાહ, મોહમ્મદ સિરાજ, વરુણ ચક્રવર્તી, કુલદીપ યાદવ, અક્ષર પટેલ, વોશિંગ્ટન સુંદર, રિંકુ સિંહ.
ઇંગ્લેન્ડની ટીમ
હેરી બ્રુક (કેપ્ટન), રેહાન અહેમદ, જોફ્રા આર્ચર, ટોમ બેન્ટન, જેકબ બેથલ, જોસ બટલર, સેમ કરન, લિયામ ડોસન, બેન ડકેટ, વિલ જેક્સ, જેમી ઓવરટન, આદિલ રાશિદ, ફિલ સોલ્ટ, જોશ ટંગ, લ્યુક વુડ.
