છોટા ઉદેપુરના રણવેદ ગામમાં દીપડી કુવામાં પડી જવાની ઘટના બની છે. દીપડી કુવામાં પડી જવાની ઘટના આજે વહેલી સવારના સમયે બની હતી. જે ખેતરમાં આ કૂવો આવેલો છે તેના માલિકે જ દીપડીને જોઈ હતી. આ અંગે ખેડૂતે ફોરેસ્ટ ડિપાર્ટમેન્ટને જાણ કરી. જ્યારે ટીમ દીપડીને રેસ્ક્યુ કરવા માટે આવી તો જોયું કે તે કૂવામાં એક લોખંડની એંગલ પર બેઠી હતી. ફોરેસ્ટ ડિપાર્ટમેન્ટના કર્મચારીએ જણાવ્યું કે, “અમે ખાટલો કૂવામાં ઉતારીને દીપડીને બહાર કાઢવા માટે પ્રયત્ન કરીશું.”
વિડીયોમાં દેખાય છે કે દીપડી પણ ડરીને કૂવામાં બેસી રહી છે, તેને બહાર કાઢતી વખતે રેસ્ક્યુ ટીમ સાવધાની રાખવી પડશે કારણ કે તે આક્રામક બની શકે છે. મળતી માહિતી મુજબ ગામમાં દીપડો આવ્યો હોવાની વાત વાયુવેગે ફેલાઈ જતા તેને જોવા માટે લોકો ટોળે વળ્યા હતા. ફોરેસ્ટ વિભાગના કર્મચારીએ જણાવ્યું કે, “અમે લોકોને એકઠા થવાનો ઈનકાર કરી રહ્યા છે, કારણ કે દીપડી આટલા લોકોને એક સાથે જોઈને આક્રામક થઈ શકે છે.” માનવામાં આવી રહ્યું છે કે, આ દીપડો રાત્રે અંધારાના કારણે કૂવામાં પડ્યો હોઈ શકે છે.
